In waʼtsin ti Leipzig, ban antigua República Democrática Alemana, utat ban frontera ti Polonia ani an República Checa. Tam ti u kwaʼalak 6 i tamub u kʼalej tu kʼwajíl ti Brasil kom tanáʼ u tʼojnalak u papá ani talbél u kʼalej tu kʼwajíl ti Ecuador.

Tam ti u kwaʼalak 14 i támub u papá tin abaʼ ti Alemania abal tin exobal.  Xowéʼ kwaʼalak ku beletnaʼ tu kwetemtal kom in kʼwajílak kwetém. U ujnaʼ kin kʼwajiy kwetém ani yab u tʼajalak ti kwéntaj max u odhnalak axi kʼeʼat kʼal jawaʼ u tʼajalak.

U papá ani u mamá wichiychik ti Alemania tam ti nanáʼ u kwaʼalakits 17 i támub. In kʼwajiy tin kʼwajíl kʼal jajáʼchik weʼ i kʼij, pero kom yab u leʼak ku belkaʼchik, tam ti u putuw 18 i támub in kʼalej tin kʼwajíl kwetém.

Yab u atsʼalak in kulbél, jaxtam u tujchi ku ali i tolmixtalab. U tʼilmay talchik i atiklab ani u tsalpay abal jawa más alwa pel kin xeʼetsin tin belelel, ani ku exla i alubel tsabal.

U tsʼaʼiy jun i motocicleta, ani in kʼalej ti África. Talbél, koʼoy kin wichiy ti Europa, kom odhkʼin an moto. U tsʼejkaʼ an moto, ani in kʼalej tin belelél ba jun i playa ti Portugal. Tanáʼ u tsalpay abal más alwaʼ kin xeʼtsin tin belelél ba jun i barco.

Tanáʼ u exlaʼ talchik i kwitól ani i tsʼikʼách axi jayej neʼetsak ti belelél ban océano Atlántico. Tanáʼ u exlaʼ a Laurie, kʼal jitaʼ talbél tin tomkin. U ulits ti Puerto Rico ani u kʼwajiy tanáʼ jun i weʼ i kʼij, talbél u wichiy ti Europa. A Laurie ani nanáʼ i leʼak ki tsʼaʼiy jun i tsakam barco ani ki tʼojojoy abal tu kʼwajíl tanáʼ. Pero ox a ítsʼ talbel in neʼdháj kʼal an ejército alemán.

In kʼwajiy jun i tamub kʼal ox i ítsʼ ban ejército alemán, ani al nixéʼ xi kʼij in tomkin kʼal a Laurie. I leʼak ki aynanchij tu belelél. Okʼxidh kin baliyat ban ejército i tsʼaʼiy jun i lancha ani kʼwajiy i tʼojojiyal abal tu belelél. An tsalap axi i kwaʼalak pelak ku kʼwajiy tu kʼwajíl ban lancha ani ku xeʼtsin tu belelél abal ki exlaʼ kʼeʼat i bichowchik. Okʼxidh kin kalej ban ejército, yabayej i taʼpálak ki tʼojojoy an barco, tu tʼilmay an ólchixchik kʼal a Jehová ani i tujchij ku pidhan i exobintaláb kʼal an Biblia.

Yabak u tsalpayamalak max neʼetsak kin yejenchij ku tʼajaʼ más i jalkʼuxtaláb: in tomkinenekits kʼal u kʼimádhil, ani yabáts in jutsʼulak (Efesios 5:5). Jayej u tsalpayalak abal max kin xeʼtsin ku exlaʼ jawaʼ a Dios in tsʼejkámal, kʼwajatak u eyendhál alwaʼ u ejatal.

Pero kwaʼalak ku tʼajaʼ talchik i jalkʼuxtaláb kʼal jantʼiniʼ jatsak u ey. Lej kʼadhatak u ey ani yab u batsʼuwalak i exobchixtaláb, ani u lej kulbetanalak ku olnaʼ jawaʼ u éjtowalak ku tʼajaʼ, ani jawaʼ u kwaʼalak. Expidh u tsalpayalak kʼal u kweteʼ leʼnomtal.

Jun a kʼicháj u ajiy an Sermón del Monte (Mateo, capítulos 5 a 7). U lej jikʼpaʼ kʼal jawaʼ a Jesús in uluw tin kwéntaj jantʼiniʼ ku kʼwajiy kulbél. Jantʼoj axi u jikʼpaʼ pel abal axi u kʼaʼíl ani u chikél pel axi in atsʼálchik kulbél (Mateo 5:6). Ani yab u exbayalak abal jantʼiniʼ neʼetsak kin atsʼaʼ kulbél jitaʼ u kʼaʼíl ani u chikél. Kʼayúm tu exobnaʼ ban Biblia abal ti yaném i yéjenchal ku utey kʼal a Dios ani abal ki ejtow ki tʼajaʼ i yejenchal ki tʼajaʼ ti kwéntaj abal i yejenchal a Dios. Antsanáʼ ti uluw a Jesús: «Kʼijidh jitaʼ in atsʼál abal in yejenchal a Dios» (Mateo 5:3).

A Laurie ani nanáʼ i tujchij ki exobnaʼ an Biblia ti Alemania, talbél u kʼalej ti Francia ani talbél ti Italia. Juʼtámkʼij waʼatsak i ólchixchik. Jantʼoj axi u jikʼpaʼ pel abal u lej kʼanidháx ani lej junkudh. U tsuʼuw abal an ólchixchik axi tin puwél an tsabál lej u kʼanidháx (Juan 13:​34, 35). Ani talbél u pujan.

Belakits abal in pujadh u aynanchij ku jalkʼuy u ey. A Laurie ani nanáʼ i tsalpayamalak ku kʼalej tin naktal an costa ti África, ki watʼenchij an Atlántico ani ku ulits ma ti Estados Unidos. In kʼwajatak kʼal u kʼimadhil ban pulik lejem tam tu tʼajaʼ ti kwéntaj abal tin tamét a Dios wawáʼ yab jantʼoj i ey. Ban lejem yab u kwaʼalak yan jantʼoj ku tʼajaʼ, jaxtám u tujchij ku exobnaʼ an Biblia. Tin lej tolmiy ku tsalpay kʼal jawaʼ a Jesús in tʼajaʼ tejéʼ ban tsabál. Belits abal tʼokatak ani in kwaʼalak yan i awiltaláb ani i tsapláb, yab jaykʼiʼ in kʼadhatnaʼ tin baʼ. Etsʼey in pidhaʼ in exbádh in Tátaj.

Talbél tu lupudh tsalpay kʼal in tʼiplabil a Jesús, u exbay abal kwaʼalak ku eyendhaʼ u ejatal abal ku tʼojonchij a Dios (Mateo 6:33). Tam tu ulits ti Estados Unidos, i takuy ki jilaʼ tu kʼijidhbél, ani i takuy ki tʼojonchij a Dios.

Ti biyál, tam expidh in kʼijidhbelak, yab u exlalak jantʼoj neʼetsak ka watʼey kʼal an takuxtaláb axi ku tʼajaʼ. Xowéʼ u eyendhál an tsalpadhtaláb axi tu pidhál a Dios (Isaías 48:​17, 18). Xowéʼ kʼwajat u eyendhál alwaʼ u ejatal: kom u tʼojonchal a Dios ani u tolmiyal an atiklábchik abal jayej kin exlaʼ.

U kʼwajat mas u kulbél kom i eyendhál an tsalpadh kaw axi ti Biblia.   A Jehová tu pidhámal jun i alubél tsʼikʼách axi jayej in exlámal ani in kʼanidhál.

I koʼoyamal i kʼibataláb ti ejatal. Belits antsanáʼ a Jehová yab jaykʼiʼ tu walbamal ani yab neʼets ku tsekej ani etsʼey neʼets ki belaʼ kʼal a Jehová (Proverbios 3:​5, 6).