Jantʼiniʼ ti tsuʼuw ban exobintaláb axi watʼey, a Jesús in eyendhaʼ in ejatal abal kin ólnaʼ in «Eyaltal a Dios» (Lucas 8:1). In lej tsápnanchij, kʼalej tin puwél an bichow Israel abal kin ólnaʼ tin kwentaj axéʼ xi Eyaltaláb. Jayej ba tseʼ i Evangelios, kʼwajat dhuchadh patal an olnomtaláb axi in tʼajaʼ, in olnál watʼadh cien i kalel tin kwéntaj in Eyaltal a Dios. Axéʼchik xi kaw in uluw a Jesús. Axéʼ expidh pel jun i tʼiplab kʼal patal jawaʼ in ólnaʼ tin kwéntaj in Eyaltal a Dios (Juan 21:25).

¿Jaleʼ ti lej exbadhak abal a Jesús in Eyaltal a Dios? Kom takuyat kʼal a Dios abal kin tʼajaʼ ti eyal (Isaías 9:6; Lucas 22:28-30). Jajáʼ yab in leʼak ka puwénchat (Mateo 11:29; Marcos 10:​17, 18). Abal jajáʼ lej exbadhak kin ólnaʼ in Eyaltal a Dios. Jajáʼ in exlál abal in Eyaltal a Dios neʼets kin tólmiy: in Tatáj ani in aykólilchik. *

A Jesús in lej kʼanidhál in Tatáj (Proverbios 8:30; Juan 14:31). In lej jikʼpál kom in Tatáj lej kʼanidhom, yajnanchix ani etsʼey in tʼajál jawaʼ tekedh (Deuteronomio 32:4; Isaías 49:15; 1 Juan 4:8). Jaxtám in lej pojkál patal an janamtaláb axi uluwámej tin bij in Tatáj. Jun i tʼiplab, yanchik in ulal abal a Dios yab in tʼajál ti kwéntaj an yajchiktaláb axi i watʼál ani abal pel Jajáʼ axi in tʼajál ki yajchiknaʼ. Axéʼ jats in tʼajaʼ abal a Jesús kin tsápnanchij kin ólnaʼ an alwaʼ kaw, kom in Eyaltal a Dios neʼets kin tʼokedhanchij in bij in Tatáj (Mateo 4:23; 6:​9, 10). ¿Jantʼiniʼ ti neʼets kin tʼajaʼ?

Neʼets kin tʼajaʼ yan i alwaʼtaláb abal kin tólmiy yan i atiklábchik. A Jehová neʼets kin eyendhaʼ in Eyaltal, abal kin talaʼ patal jawaʼ in tʼajál ku ukʼin. Ejtíl, «an tsemláj, an ukʼil, an tʼeʼpintaláb, an yajchiktaláb, yabáts waʼats jawaʼ yab alwaʼ, ejtíl ti jaykʼiʼ» (Revelación [Apocalipsis] 21:​3, 4). Expidh kʼal in Eyaltal a Dios neʼets ki jilaʼ ki yajchiknaʼ. *

Jaxtám, yab i jikʼpál abal a Jesús in leʼnaʼ kin ólnaʼ tin kwéntaj axéʼ xi Eyaltaláb. Kom axéʼ xi Eyaltaláb neʼets kin tejwamédhaʼ abal a Dios, lej yajnanchix ani abal in kwaʼal patal an tsapláb (Santiago 5:11). Pero axéʼ xi Eyaltaláb yab expidh neʼets kin tólmiy a Dios. Jayej neʼets kin tólmiy kʼeʼat i atiklábchik axi a Jesús in kʼanidhál: in aykolilchik.

A Jesús kʼwajiy yan i tamub tiwaʼ ti eb, okʼxidh ka chích ti Tsabál. Ani in tólmiy in Tatáj abal kin tsʼejkaʼ an galaxias, an otchik, an Tsabál ani patal jawaʼ waʼats tejéʼ (Colosenses 1:​15, 16). Kʼal patal jawaʼ a Jesús in tsʼejkámal, jawaʼ jajáʼ in lej kʼanidhál, pel an atiklábchik (Proverbios 8:31).

Axéʼ xi kʼanidhomtaláb, jats in tʼajaʼ abal kin ólnaʼ tin kwéntaj in Eyaltal a Dios. Ma tin tujtal, a Jesús in uluw abal jajáʼ chích, abal kin exóbchij an tsʼejwantalchik an alwaʼ kaw (Lucas 4:18). Pero a Jesús yab expidh olnomáts kʼal in káwintal jayej kʼal in tʼajbilábil. Jun i tʼiplab, jun a kʼicháj tamkun an atiklábchik abal kin otsʼowiy a Jesús, jajáʼ «in yajnanchij ani in tujchij kin lejkiy an yaʼulchik» (Mateo 14:14). Jun a kʼicháj, chich kin tsuʼuw a Jesús jun i inik axi lej yaʼul, ani in uchaʼ: «Ajatik max a leʼak a witʼál ti kin jeldhaʼ» Tam, a Jesús in yajnanchij ani in uchaʼ: «U léʼ tu jeldhaʼ», ani ma xowéʼ i jeldháchits (Lucas 5:​12, 13). Tam ti a Jesús in tsuʼuw u ukʼnal a María kom tsemets a Lázaro, jayej in yajnaʼ ani «tujey ti ukʼnál» (Juan 11:​32-36). Tam in tʼajaʼ jantʼoj axi i lej jikʼpál. A Lázaro in neʼdhalakits tseʼ a kʼicháj ti tsemenek, pero a Jesús in tsʼakbaʼ (Juan 11:​38-44).

Pero a Jesús in exlálak abal patal axéʼ xi labidh tʼajbiláb pelak jun watʼelkʼij. Kom an atiklábchik axi in lejkiy ani in tsʼakbaʼ, neʼetsak ka wichiy ka yawʼláts ani ka tsemets junílekʼij. Pero jayej in exlalak abal an alwaʼtaláb axi neʼets kin chiʼdhaʼ in Eyaltal a Dios pel abal etsʼey, jaxtám yab in jeldhaʼ patal an yaʼulchik. In eyendhaʼ in ejatal abal kin ólnaʼ an «alwaʼ kaw, tin kwéntaj in Eyaltal a Dios» (Mateo 9:35). Jawaʼ in tʼajaʼ tam ti kʼwajiy tejéʼ ti Tsabál, expidh pel jun i tʼiplab kʼal jawaʼ neʼets kin tʼajaʼ in Eyaltal a Dios tin puwél an tsabál. ¿Jantʼoj neʼets ka watʼey? Jawaʼ in olnál an Biblia.

• Neʼets ka taley an yawʼláts.

  «Al nixéʼ xi kʼij an jokʼtsej neʼets ka tsúʼuxin, ani jitaʼchik yab u otsʼox neʼets ka otsʼoxin. Al nixéʼ xi kʼij, axi yab in éjtowal ti bélal, neʼets ti kʼadhadhál jantʼiniʼ an itsʼámal, ani an moʼ neʼets kin ejtow ti kaw.» Jayej, «nibal jun i kʼwajíl neʼets kin uluw ‹in kʼwajat yaʼul›» (Isaías 33:24; 35:​5, 6).

• Neʼets ka taley an tsemláj.

  «Axi bolidhchik in ichích neʼets kin kʼalnaʼ an tsabál, ani neʼets ka kʼwajiy abal etsʼey.» (Salmo 37:29.)

  «An Púlik Eyal Jehová, neʼets kin talabédhaʼ abal etsʼey kʼal an tsemláj, ani neʼets kin kʼwiʼchinchij in jaʼlíl in wal patal an atiklábchik.» (Isaías 25:8.)

• An tsemélomchik neʼets ka tsʼakbáj.

  «Neʼets kin tawnaʼ ka edháj patal an tsemélomchik ani neʼets ka kaldháj ti al an jolimtaláb.» (Juan 5:​28, 29.)

  «Neʼets ka edháj an tsemélomchik.» (Hechos 24:15.)

• Patalchik neʼets kin koʼoy in kʼimáʼ ani jun i tʼojláb.

  «Neʼets kin tsʼejkaʼchik i atáj abal ka kʼwajiy tanáʼ. Neʼets kin koʼoychik i tʼayabláb ani neʼets kin kʼapchij in walíl. Yabchik neʼets kin tsʼejkaʼ i atáj abal kʼeʼatchik kin kʼalnaʼ. Neʼets kin koʼoychik i tʼayabláb ani kin kʼapchij in walíl, ani patal axéʼ xi tʼojlab neʼets kin lej kʼijidhnaʼ.» (Isaías 65:​21, 22.)

• Talíts an pextaláb.

  «A Dios neʼets kin talabédhaʼ an pextaláb tin puwél an Tsabál.» (Salmo 46:9.)

  «An bichowchik yabáts neʼets ti tomolnáx, nibal neʼets kin dhaykʼaʼ i pextaláb.» (Isaías 2:4.)

• Yab jitaʼ neʼets kin watʼaʼ i jayil.

  «An Tsabál neʼets kin waʼtsindhaʼ yan i kʼapnél. A Dios neʼets tu ku lábliy.» (Salmo 67:6.)

  «Neʼets kin bajuw ka waʼtsin yan i tʼayabláb ti tsabál, ma tin okʼ an tsʼen neʼets ka waʼtsin watʼadh yan i tʼayabláb.» (Salmo 72:16.)

• Talíts an tsʼejwantaltaláb.

  «Jitaʼchik tsʼejwantal yab neʼets ka ukʼchiyat.» (Salmo 9:18.)

  «A Jehová neʼets kin kʼaniy an tsʼejwantal axi in konoyal i tolmixtaláb, jayej jitaʼ yab in kwaʼal kʼal jitaʼ ka tólmiyat. Neʼets kin yajnanchij an tsʼejwantal, ani neʼets kin jekʼondhanchij in ejatal.» (Salmo 72:​12, 13.)

Talbél ti exobnámal axéʼchik xi lablixtaláb. ¿A exbayal jaleʼ ti lej exbadh abal a Jesús in Eyaltal a Dios? Jajáʼ in ólchij tin kwéntaj in Eyaltal a Dios patal an atiklábchik axi in leʼak kin atsʼaʼ, kom in exlálak abal yab waʼats jantʼoj más axi kin ejtow kin tixkʼaʼ patal an kʼibataláb.

¿A kulbetnál patal jawaʼ neʼets kin tʼajaʼ a Dios? ¿Jantʼoj a éjtowal ka tʼajaʼ abal ka batsʼuw axéʼchik xi lablixtaláb? Neʼets ki tsuʼuw axéʼ tin aytal an artículo.