TEMA DE PORTADA | PATAL JAWA’ IN KUXUYÁMAL AN BIBLIA
Jale’ ti an Biblia in ejtowámal kin kuxuy yan jant’oj
An Biblia in kuxuyámal yan jant’oj. Jaxtám, xowé’ tatá’ a éjtowal ka ko’oy jun. Tam ka ajiy jun i Biblia axi tsapnanchámej ka wilk’áj alwa’, tatá’ a éjtowal ka bela’ abal k’wajat patal an tsalap axi k’wajatak ban k’a’ál dhuchlab. * ¿Jale’ tin lej kuxuyámal an Biblia, bélits abal exan ka talabédhaj, bélits abal ts’ejkáj k’al i úw axi yab in kuxuyal ani bélits abal exan ka jálk’unchat an tsalap? ¿Jale’ ti axé’ xi libro yab ejtowámej ka talabedháj?
«U lej belál abal an Biblia pel jun i ts’ejwalixtaláb axi a Dios tin pidhámal»
Yan i atikláb axi in exobnámal an Biblia, in tsálpayalchik ejtíl jawa’ in dhucha’ an abatwálej Pablo: «Patal jawaʼ dhuchadh ti al an t’okat dhuchlab [pel] in káwintal a Dios» (2 Timoteo 3:16). In lej belálchik abal an Biblia yab ejtowámej ka talabedháj, kom pel in káwintal a Dios. A Faizal, axi i t’ila’ ban k’a’ál artículo, in takuy kin exóbna’ an Biblia, abal kin tsu’uw max yab jalchinének an tsalap. In lej jik’pa’ jawa’ in exóbna’, kom in t’aja’ ti kwéntaj abal yan k’al jawa’ exobchinének yab k’wajat ti Biblia. Jayej, in lej kulbétna’ kin exla’ jawa’ a Dios ne’ets kin t’aja’ k’al an Tsabál.
A Faizal in áynanchal kin uluw: «U lej belál abal an Biblia pel jun i ts’ejwalixtaláb axi a Dios tin pidhámal. A Dios in ts’ejkámal patal jawa’ wa’ats ban k’aylál, axé’ in tejwamédhal abal in kwa’al an tsapláb kin t’aja’ abal yab ka talabedháj an Biblia. Max ku uluw abal yab u belál, pel ejtíl max k’wajat u ulal abal a Dios yab in kwa’al in tsap. Ani naná’ yab in tomnál ku tsalpay antsaná’» (Isaías 40:8).
^ párr. 3 Ka tsu’uw an artículo «Cómo escoger una buena traducción de la Biblia», k’wajat al axé’ revista, 1 de mayo de 2008.