An Biblia lej pílits k’al k’e’at i libros axi u kaw tin kwéntaj i religión. Al miles i támub, in exobchámal yan jant’oj an atiklábchik. Pero jayej, játs an libro axi más kawiliyámej ani ets’ey k’wajat ti alchinal max uk’pinének.

Jun i t’iplab, talchik i atikláb in ulal abal an biblias axi wa’ats xowe’, yabáts in olnál jawa’ k’wajatak ban k’a’ál dhuchlab. Jun i inik axi in exobnál tin kwéntaj an religiones in uluw: «Yab i exlál max patal jawa’ in ulal xowé’ an Biblia, k’wajatak ban k’a’ál dhuchlab». Jayej in uluw: «An copias in k’ál an biblias axi xowé’ i kwa’al, jalk’unchámej yan i kaw. Jayej, an copias ts’ejkáj yan i támub talbél tam ti k’wajatakits an k’a’ál dhuchlab ani tejwa’ abal an biblias axi xowé’ i kwa’al u lej jálk’unalits k’al an k’a’ál dhuchlab».

K’e’atchik yab in belál jawa’ in ulal an Biblia, kom tin tsákamtal exóbchat k’e’at jant’oj. Jun i t’iplab, in tátajchik a Faizal yab in lej belálak k’al a Dios. A Faizal exóbchat abal kwa’al kin k’ak’na’ an Biblia, pero abal wé’ jalchinének i kaw. Jajá’ in ulal abal nixé’ in t’aja’ abal yab kin belchij an atiklábchik k’al axi u le’nábak ka t’ilchin tin kwéntaj an Biblia. «U tsálpayalak abal yabáts in tomnál ku bela’, kom yabáts pelak an k’a’ál dhuchlab in k’ál an Biblia».

Pero, ¿walám in tomnál ki jila’ ki ajiy an Biblia kom u tsalpayáb abal jalchámej talchik i kaw? Ka tsalpay k’al axé’, ti Biblia i elal abal a Dios in ulal abal ne’ets kin chi’dha’ yan i alwataláb. Max a tsálpayal abal an Biblia axi xowé’ i kwa’al jalchámej i kaw, ¿walám ne’ets ka bela’ k’al axé’ xi alwataláb? (Romanos 15:⁠4). Max a tsálpayal abal an Biblia yab junat k’al an k’a’ál dhuchlab, ¿walám ne’ets ka eyendha’ abal ka exla’ jant’oj ka t’aja’ ta ejatal?

Bélits abal xowé’ yabáts i kwa’al an k’a’ál dhuchlab in k’ál an Biblia, i éjtowal ki ela’ i copias in k’ál an Biblia axi lej biyálits. ¿Jant’ini’ in kuxuyámal an Biblia, bélits abal ts’ejkáj k’al i úw axi u talél, ani bélits abal exámej ka talabedháj ani ka jalchin i kaw? Tam ka exla’ patal axé’, ne’ets ti tólmiy abal ka bela’ k’al an biblias axi wa’ats xowé’ ta k’icháj. Tin aytal an ajumtaláb ne’ets ka exla’ jant’ini’ an Biblia in kuxuyámal patal axé’.