¿A ats’ámal ejtíl axé’chik xi atikláb? Walám a exámal ka ajiy an Biblia pero yab a ejtow ka áynanchij. Yan i atikláb in ats’ál t’ojláb kin ajiy an Biblia. Pero, ¿a tsalpayámal abal an Biblia in éjtowal ti tólmiy abal kit k’wajiy más kulbél? ¿A exlálak abal wa’ats i tolmixtaláb abal ka k’ijídhna’ ka ajiy an Biblia? ¿Walám ne’ets ka lé’na’ ka ajiy?

Ka tsu’uw jant’oj in ulal talchik i atikláb axi in tujchij kin ajiy an Biblia ani lej tólmiyat.

A Ezekiel, axi in kwa’al wat’adh 20 i támub, in ulal: «Ti biyál, u ejatal pelak ejtíl an atiklábchik axi ne’ets ti beldhom ani yab in exlál ju’táj ti ne’ets, pero an ajumtaláb k’al an Biblia tin tolmiyámal ku exla’ jant’oj ku t’aja’ k’al u ejatal. In kwa’al lej yan i exobchixtaláb axi u eynal».

A Frieda, jayej in kwa’al wat’adh veinte i támub ani in ulal: «Ti biyál dhubat in it’ixbélak, pero jawa’ u ajiyal ti Biblia tin tolmiyámal ku jalk’uy jant’ini’ u ey. Xowé’ yabáts in dhubat tsakúl ani u kwa’al más u ja’úb».

A Eunice in kwa’al wat’adh 50 i támub ani in ulal: «Tin lej tolmiyámal ku jalk’uy jant’ini’ u ey».

Max tatá’ jayej ka ajiy an Biblia, ne’ets ka ats’a’ it lej kulbél, antsaná’ jant’ini’ axé’chik xi atikláb (Isaías 48:​17, 18). Jayej ne’ets ti tólmiy abal ka exla’ jant’oj ka t’aja’, abal ka ko’oy a alwa’ ja’úb, abal yab kit lej t’e’pin ani abal ka exóbna’ tin kwéntaj a Dios. Patal an exobchixtaláb axi k’wajat ti Biblia tal k’al a Dios, jaxtám ne’ets tu ku lej tólmiy max ki eyendha’ ti ejatal. Patal jawa’ tu ku exóbchij pel abal tu ku tólmiy.

Jawa’ más k’ibat ne’ets ka ats’a’, játs ka tujchij ka ajiy. Tin aytal an artículos, ne’ets ka ela’ i tolmixtaláb abal ka ajiy an Biblia ani ka kulbétna’.