TEMA DE PORTADA | NE’ETS KA LEJ K’IJÍDHNA’ KA AJIY AN BIBLIA
¿Jant’oj kwa’al ku t’aja’ ok’ox?
¿Jant’oj a éjtowal ka t’aja’ abal ka k’ijídhna’ ka ajiy an Biblia ani ka exbay jawa’ a ajiyal? Ka tsu’uw bo’ i tolmixtaláb k’al axi ti tolmiyámej yan i atikláb.
Ka aliy ju’táj kit exobláts. Max kit k’wajiy kwetém ju’táj ti tajax ani ju’táj yab jita’ ti it’ixbedha’, ne’ets ka exbay más alwa’ jawa’ a ajiyal.
Ka jila’ kit exóbchat. An Biblia pel jun i ts’ejwalixtaláb axi ti pidhámal a Dios. Abal ka exbay jawa’ tu exóbchal an Biblia, lej alwa’ kit tsálpaxin ejtíl jun i tsakam axi in jilál ka exóbchin k’al in papá. Max a ats’ámal jant’oj axi yab tekedh tin kwéntaj an Biblia, yab ka t’aja’ ti kwéntaj ani ka jila’ abal a Dios ti exóbchij (Salmo 25:4).
Kit oláts ok’xidh ka tujchij tit ajum. Patal jawa’ k’wajat ti Biblia pel in tsalápil a Dios, jaxtám i yéjenchal tu ku tólmiy abal ki exbay. Jajá’ in ulumal abal ne’ets kin pidha’ i espíritu santo k’al jitats ka konchat (Lucas 11:13). K’al an espíritu santo, a Dios in éjtowal ti tólmiy abal ka exla’ jant’ini’ u tsalpax Jajá. K’ayúm k’ayúm, ne’ets ka exla’ «in lupudh tsalap a Dios» (1 Corintios 2:10).
Yab ka ajiy expidh kom kwa’al ka t’aja’. Yab ka ajchikiy an Biblia. Ka tsalpay k’al jawa’ k’wajat a ajiyal. Ka tsalpay: «¿Jant’ini’ játsak in ey an atikláb axi u olnáb al axé’ xi ajumtaláb? ¿Jant’ini’ u éjtowal ku eyendha’ tu ejatal jawa’ k’wajat u exobnál?».
Ka tsalpay jale’ ta lé’ ka ajiy an Biblia. Abal ka k’ijídhna’ ka ajiy an Biblia, ka tsápnanchij ka exóbna’ jant’oj axi ne’ets ti tólmiy ta ejatal. A éjtowal ka tsalpay k’al talchik i ayláb, ejtíl, walám a lé’ ka exla’ más a Dios, ka jalk’uy jant’ini’ játs a ey ani max it tomkidh, walám a lé’ ka exla’ jant’ini’ ka putuw más alwa’ a uchbíl. Talbél, ka tsalpay jawa’ tam pejach axi ti Biblia, in éjtowal ti tólmiy abal ka bajuw nixé’. a
Axé’ xi bo’ i tolmixtaláb in éjtowal ti tólmiy abal ka tujchij ka ajiy an Biblia, pero ¿jant’oj ne’ets ti tólmiy abal ka k’ijídhna’ más? Tin aytal an artículo ne’ets ka exóbna’.
a Max yab a exlál jawa’ tam pejach ka ajiy, an ólchixchik k’al a Jehová in éjtowal ti tólmiy