An Biblia yab pel jun i alk’idh libro, kom pel a Dios axi in abna’ ka ts’ejkáj (2 Timoteo 3:​16). Ma an Biblia in ulal: «In káwintal a Dios tu lej ejatlinchal ani tu lej tsáplinchal i ichích» (Hebreos 4:12). Axé’ xi libro in éjtowal ti lej tólmiy ta ejatal: In éjtowal ti tólmiy ka exla’ jant’oj ka t’aja’ chudhél chudhél, ne’ets ti tólmiy ka exla’ más a Dios ani jawa’ ne’ets kin t’aja’ (1 Timoteo 4:8; Santiago 4:8).

In éjtowal ti tólmiy ka exla’ jant’oj ka t’aja’ chudhél chudhél. An Biblia tu exóbchal yan jant’oj, ejtíl jant’ini’ ki béletna’ i ejatal.

• Jant’ini’ ku ne’dháxin alwa’ k’al k’e’at (Efesios 4:​31, 32; 5:​22, 25, 28, 33).

• Jant’ini’ ki béletna’ ti ba’ ani yab ku lej t’e’pin (Salmo 37:8; Proverbios 17:22).

• Jawa’ yab in tomnál ki t’aja’ (1 Corintios 6:​9, 10).

• Jant’ini’ ki eyendha’ an tumín (Proverbios 10:4; 28:19; Efesios 4:​28). a

Jun i tomkinél axi ti Asia in t’aja’ ti kwéntaj abal an Biblia u lej tólmix. Tam ti itejk’ij ti tomkidh, in ats’a’chik k’ibat ka ne’dháxin alwa’ ani ka t’ilmáts. Pero in tújchijchik kin eyendha’ tin ejatal jawa’ in exobnálak ti Biblia. A Vicent, in ulal: «Jawa’ u exobnálak ti Biblia tin tólmiy ku tejwamédha’ más i k’anidhomtaláb ani antsaná’ ku ejtow ku ts’ejka’ an k’ibataláb. Nixé’ in t’aja’ abal ti tsablóm ku k’wajiy más kulbél». In k’imadhil, a Annalou, in ulal: «An t’iplabchik axi ti Biblia tu lej tolmiyámal. Xowé’ u ats’ál más in kulbél ani junat jawa’ i tsálpayal ki t’aja’».

Ne’ets ti tólmiy ka exla’ más a Dios. A Vicent in ulal: «Xowé’ u ats’ál más utat k’al a Jehová kom u ajiyal an Biblia». Axé’ tu exóbchal abal an Biblia in éjtowal tu ku tólmiy ki exla’ más tin kwéntaj a Dios. Jayej ne’ets tu ku tólmiy ti ejatal ani abal ki t’aja’ ti ja’úb a Dios. Ti Biblia jayej ne’ets ka exóbna’ jawa’ a Dios in tsálpayal kin t’aja’ abal ku k’wajiy kulbél abal ets’ey (1 Timoteo 6:​19). Axé’ xi olchixtaláb expidh i elál ti Biblia.

Max tatá’ jayej ka ujna’ ka ajiy an Biblia chudhél chudhél, ne’ets ti tólmiy ta ejatal ani ne’ets ka exla’ más a Dios. Walám yab ne’ets ka exbay patal jawa’ ka ajiy. Ki t’ila’ jawa’ wat’ey k’al jun i inik axi ti Etiopía, jajá’ in kwa’alak yan i konowixtaláb k’al jawa’ k’wajatak in ajiyal. A Felipe, jun i aykol k’al a Jesús, in konoy: «¿A éxbayal jawa’ kwajat a ajiyal?». Jajá’ tók’tsin: «¿Jant’ini’ ku ejtiy an kaw max yab wa’ats jita’ ti kin exóbchij?». b Jaxtám in jila’ abal ka tólmiyat k’al a Felipe (Hechos 8:​30, 31, 34). Jayej, max tatá’ a lé’ ka exbay más an Biblia, tu kaniyal ka t’uchiy an formulario axi k’wajat ti Internet, ti jw.org, o ka konoy i tolmixtaláb ban dirección axi k’wajat ba axé’ xi revista. Jayej a éjtowal ka t’ilmay jun i ólchix k’al a Jehová axi ta kwenchálil o kit k’alej al jun i Atáj Tamkuntaláb. Tu kaniyal ka aliy jun i Biblia ani ka jila’ ti tólmiy.