In yejey ti al an bichow Puerto Limón ani in tonídh, axi kʼwajat junpokʼeʼ ti Costa Rica. U tatájchik in koʼoy ocho i tsakam, ani nanáʼ pel an bukchíl tsakam. U papá tsemets tam ti u kwaʼalak ocho i támub, ani u mamá tu béletnaʼ kwetém.

Etʼsey u lej kulbetnámal an béisbol, ma tu tsakamtal u lej kulbetnámal tin ubatʼ. Tam tin kwitólej in ubatʼin al jun i equipo axi yab lej exladh. Tam tin ubatʼak kʼal nixéʼ xi equipo u kwaʼalak 20 i támub, jun axi in okʼnálak jun i equipo axi más exladh, tin kániy tin ubatʼ kʼal jajáʼ ti Nicaragua. Pero kom u beletnálak u mamá kom jajáʼ yaʼúlak, yab u léʼnaʼ kin kʼalej ti Nicaragua abal tin ubatʼ kʼal jajáʼchik. Talbél kʼeʼat axi in okʼnál jun i equipo ti Costa Rica, tin kániy kin ubatʼin kʼal jajáʼchik axi u ubatʼakchik tanáʼ yabayakej lej exladhchik. Xowéʼ u batsʼuw kin ubatʼin kʼal jajáʼchik. In ubatʼin kʼal nixéʼ xi equipo ti 1949 ma ti 1952 in ubatʼin ti Cuba, ti México ani ti Nicaragua. Nanáʼ jatsák axi u yekʼwalak an pelota abal yabchik kin ataʼ ani in lej witʼadhak. In ubatʼin 17 i kalel ani yab in ukʼpin kʼal ni jun. U lej kulbetnálak jantʼiniʼ an atiklábchik tin dhájanchalak u bij.

In tújey ku tʼajaʼ i kidháb tʼajbiláb. Bélits abal u kwaʼalak kʼal jitaʼ kin tomkin, in xeʼetsak kʼal kʼeʼatchik i uxum. Etsʼey in xeʼetsak lej utsʼál. Ti jun a kʼicháj in lej wilej ani ma yab u exlaʼ jantʼiniʼ tin ulits tu kʼimaʼ. Jayej in ubatʼak kʼal an dominó ani kʼal an lotería abal ku ataʼ i tumín.

Al nixéʼ xi kʼij u mamá in tʼajaʼ ti ólchix kʼal a Jehová. Jajá in tsápnanchij tin exóbchij jawaʼ in ulalak an Biblia, pero yab u tʼajaʼ ti kwéntaj kom in kʼwájatak tin ubatʼ. Tam in kʼwájatak tin ubatʼ ban campo yab u atsʼálak ma xin kʼaʼíl. Kom expidh u tsálpayalak tin ubatʼ. Tin ubatʼ kʼal an béisbol, játs axi más u kulbetnálak.

Pero tam ti u kwaʼalak 29 i támub, in lej tsʼojbéj kom u leʼak ku yekʼwaʼ an pelota. U jilaʼ tin ubatʼ kom u léʼak kin lejkin. Bélits antsanáʼ i áynanchij kʼal an béisbol ani u exóbchalak ti ubatʼ jun i equipo axi yab lej exladh.

Ti 1957, in kʼalej al jun i púlik tamkuntaláb in kʼal an ólchixchik kʼal a Jehová axi kʼwájatak ti tʼajnál al jun i estadio juʼtáj tin ubatʼnének ti biyál. Tam tin kʼwájatak ketel ban auditorio u tsuʼuw abal an ólchixchik kʼal a Jehová in lej tʼajálak ti kwéntaj an olchixtaláb ani yab u jumbinál kʼal an atiklábchik axi in tsuʼtal an béisbol. Jawaʼ u tsuʼuw al nixéʼ xi púlik tamkuntaláb in tʼajaʼ abal ku léʼnaʼ ti exóbal kʼal an Biblia kʼal an ólchixchik kʼal a Jehová ani in kʼalej al patal an tamkuntalábchik.

U lej kulbétnaʼ yan jantʼoj axi u exóbnaʼ ti Biblia. Ejtíl, a Jesús in uluw abal tin taltal a kʼicháj in aykólilchik neʼetsakchik kin ólnaʼ an alwaʼ kaw tin kwéntaj in Eyaltal a Dios tin puwél an tsabál (Mateo 24:14). Jayej u exóbnaʼ abal an ólchixchik kʼal a Jehová yab in bátsʼuwal ni jun i tumín abal ka kʼalejchik ti ólnom. A Jesús in uluw: «A batsʼuw anikʼij, ka bínaʼ anikʼij» (Mateo 10:8).

Biyát u exobnálak an Biblia, u jumbiyalak jawaʼ in olnálak kʼal jawaʼ in tʼajálak an ólchixchik kʼal a Jehová. Kin ólnaʼchik an alwaʼ kaw tin puwél an tsabál. U tsuʼuw abal in tejwamedhálakchik an alwaʼ iniktaláb jantʼiniʼ a Jesús in exóbchichik in aykólil. Jaxtám, tam tu ajiy an kaw axi in olnál a Jesús ti Marcos 10:21 juʼtáj in tʼajál an kanixtaláb axi in tʼajaʼ a Jesús: «Kit chích ani ti kin áynaʼ», u léʼnaʼ ku tʼajaʼ tin ólchix kʼal a Jehová.

U atsʼaʼ tʼojláb ku tʼajaʼ talchik i takuxtaláb. Al yan i támub u kwaʼalak jun i «número» axi u eyendhálak ban lotería abal ku ataʼ an tumín. Pero ti Biblia, u exóbnaʼ abal a Dios yab in kulbetnál «jitaʼ in kʼaʼinchal an tumín». (Isaías 65:11; Colosenses 3:5). Jaxtám u tákuy ku jilaʼ tin ubatʼ. An kʼaʼál domingo tam tu jilaʼ ku tsʼaʼiy an boleto abal tin ubatʼ, an número «axi u eyendhálak» in ataʼ. An atiklábchik tin lej teʼchikiy kom yabáts in ubatʼin nixéʼ xi semana ani tin nixokʼnaʼchik abal kin wichiy tin ubatʼ, pero nanáʼ yabáts u tʼajaʼ.

U «ít xeʼtsintal» jantʼiniʼ in ólchix kʼal a Jehová in koʼoy jun i púlik tomolnaxtaláb tam tin pujan al an púlik tamkuntaláb (Efesios 4:24). Tam ti yajkʼunalits tam tin wichiy ti hotel juʼtáj tin jilkʼonalak, tanáʼ juʼtáj in otselak abal tin wayal u elaʼ ban wiʼleb an tsʼikʼách kʼal axi tin xeʼetsak. Tin uchaʼ: «Sammy ku otsits ani ku kwatsíy junax ani ku kʼijidhbéj». Dhubatkʼij in tókʼtsin: «Imbáj». U uchaʼ abal xowéʼ u léʼ ku tʼajaʼ ti kwéntaj an abatnaxtaláb axi in binál a Dios axi kʼwajat ban Biblia (1 Corintios 6:18). «¿Jantʼoj?». Tam yab in pidhaʼ in jalbíl jawaʼ in ulal an Biblia abal ku kwatsíy junax. Ani tin uchaʼ ku xeʼtsin junílekʼij junax. Jawaʼ u tʼajaʼ, játs kin otsits altáj ani u tʼexkʼey an wiʼleb. Xowéʼ in kʼwajat lej kulbél, kom ma ti 1958 tam ti u tʼajaʼ tin ólchix kʼal a Jehová u tʼajámal tin pútudh kʼal patal an jalkʼuxtaláb axi u tʼajámal tu éjatal.

Max kwaʼal ku tʼilaʼ patal an lablixtaláb axi u bátsʼuwamal kom u tʼajál patal an olchixtaláb axi in ulal an Biblia, in yéjenchal ku dhuchaʼ jun i libro. Xowéʼ u kwaʼal u jaʼúb axi lej chubax ani u elchámal in alwáʼ an ejataláb ani in kʼwajat lej kulbél.

Beléj u kulbetnál tin ubatʼ béisbol, pero xowéʼ u tʼajál ti kwéntaj jawaʼ in kwaʼal más in exbádh. Kʼal an béisbol in lej exláj juʼtamkʼij ani u koʼoy yan i tumín, pero patal nixéʼ yab u ówel. Jawaʼ neʼets ka owey abal etsʼey pel an junkudhtaláb kʼal a Jehová ani kʼal an epchalchik axi ti tamkuntaláb. An Biblia in ulal: «Axéʼ xi xeʼtsintaláb neʼets ti watʼel ani jayej jawaʼ in binál, pero jitaʼ kin tʼajaʼ in kulbétal a Dios neʼets ka kʼwajiy abal etsʼey» (1 Juan 2:17). Jawaʼ xowéʼ u léʼ ku tʼajaʼ pel ku tʼójonchij a Jehová ani kin kʼwajiy tin bichówil. Nixéʼ játs axi más exbadh tu éjatal.