God Wen Use Evolution fo Make Tings?
Wat da Bible tell
Aole. Da Bible tell God wen make peopo an “all kine” animals an plants. (Da Start 1:12, 21, 25, 27; Wat Jesus Show John 4:11) It tell dat evrybody wen come from Adam an Eve. (Da Start 3:20; 4:1) Peopo who believe in evolution tink dat evryting wen come from one livin ting, an had change into all diffren livin tings. Some peopo believe dat God wen make all diffren livin stuff thru evolution. Da Bible no match up wit dat. But same time da Bible no tell dat tings no change litto bit. a
God wen use evolution?
Da belief dat God wen use evolution fo make tings, dey call um “theistic evolution”. One encyclopedia explain um lidis “God control wat livin tings make um an wat die out”.
Some peopo who believe dis tink:
Evryting livin today all come from da same roots from long time ago.
One kine livin ting can change into someting das way diffren.
Bottom line dey tink God is behind dis.
Evolution match up wit da Bible?
God usin evolution fo make livin tings no match up wit how da Bible tell He wen make stuff in da book Da Start. (Da Start 1:26, 27; 2:18-24) Jesus wen talk bout all da stuff ova dea like wen garuntee happen. (Matthew 19:4-6) An he could! Cuz da Bible tell befo he wen come to da eart he was right dea wit his Faddah in heaven wen dey wen make evryting! (John 1:3) So tinking dat God had use evolution fo make all livin tings no match up wit wat da Bible tell.
Wat bout plants an animals changing litto bit?
Da Bible no say dat plants an animals no change wen day make bebes or wen dey gotta live in one new place das moa hot or moa cold. Some peopo tell wen get dat kine small changes das evolution but iz not, cuz iz still da same kine animal or plant. It neva turn into someting new.
a Sometimes dey call dis microevolution.
