Yeah. Da Bible, one ol book full of smarts from long time ago, give us ansas to importan questions about life. It can help you feel betta an be happy wit yoa life. Try look at some questions da Bible ansa.

1.   Get somebody dat wen make eryting? Da Bible tell dat God “wen make eryting.” (Jesus Show 4:11) Cuz of dat God kno wat we need fo feel good an live one happy life.

2.   God kea about me? Instead of saying dat God iz too high makamaka fo deal wit peopo, da Bible tell: “He no stay far away from all us guys.” (Jesus Guys 17:27) He like kno all da stuff you goin tru an like help you so tings work out good fo you.​—Isaiah 48:17, 18; 1 From Peter 5:7.

3.   How knowing God goin help me feel betta? Da Bible tell: “Da guys dat know dey need God stay happy.” (Matthew 5:3 NWT) Dis mean we get one strong need fo undastan how come we hea, an wat life mean. On top of dat, we really like kno who da God dat wen make eryting an be close wit him. God like wen you try get fo kno him cuz da Bible tell: “Come close to God, an he goin come close to you.”​—From James 4:8.

 Plenny peopo wen see dat coming moa tight wit God wen make dem feel betta an wen make dea lifes moa betta. Jus cuz you kno God, no mean dat you no goin get any problems, but his smarts dat stay in da Bible can help you fo

•   Be moa happy in yoa ohana.

•   Get peace wit oddas.

•   Hando diffren kine problems like depression, presha cuz of bills an healt problems.

 Get religions dat use da Bible but dey no follow wat it teach. But, da tru religion dat stick to wat da Bible tell, goin help you get fo kno God.