Yeah. Try look at four Bible truts dat can help wit money problems an bills:

1.   Plan wat you goin spend yoa money on. “Peopo dat work hard . . . wen dey make one plan how dey goin work, fo shua dey goin come rich. But da ones dat like come rich fas, fo shua dey goin come pooa.” (Smart Guys 21:5) No run out fo buy someting jus cuz stay on sale. Plan wat you goin spend yoa money on. Tink real good about wat you really need, how much you can afford fo spend an no spend moa den dat.

2.   No make bills you no need. “Da guys dat borrow money, dey jalike one slave dat gotta do wateva da guy tell um fo do dat lend um da money.” (Smart Guys 22:7) If you get bills dat you no can pay, try work out one new plan fo pay um wit da guys you owe money to. No stop trying. Use wat da Bible tell about somebody who wen co-sign an got stuck wit da bill. “Dis odda guy get powa ova you . . . Go in front him an make jalike you notting . . . No stop . . . No even tink fo go sleep till you fix um! No close yoa eye even litto bit!” (Smart Guys 6:1-5) No give up if dey no like make one new plan. Keep asking fo um.

3.   No make money da main ting. “Da greedy kine peopo dat like come rich real fas, dey donno dat bumbye, dey goin come broke an no mo notting.” (Smart Guys 28:22) Wen you like get wat odda peopo get an fo be greedy, goin jam you up wen come to money an spiritual kine tings.

4.   Be happy wit wat you get. “If we get food an clotheses, az enuff fo us, an we still yet stay good inside.” (1 Fo Timoty 6:8) Jus cuz somebody get plenny money, dat no mean he goin be happy. Some of da mos happy peopo in da world, no moa plenny money. You know wat dey get? Frenz an family dat love dem, an dey good frenz wit God.​—Smart Guys 15:17; 1 From Peter 5:6, 7.