Da spesho spirit is God’s mana in action. (Micah 3:8; Luke 1:35) God sen out his spirit an use his mana fo make wat he like happen happen.​—Songs Fo God 104:30; 139:7.

 Inside da Bible da word spirit stay come from da Hebrew word ruʹach an da Greek one pneuʹma. Mos times those word stay talkin bout God’s mana or spesho spirit. (Da Start 1:2) But da Bible use um in odda kine ways too:

•   Life.​—Habakkuk 2:19; Wat Jesus Show John 13:15.

•   Wind.​—Da Start 8:1; John 3:8.

•   Wat evry livin ting need fo be alive​—Job 34:14, 15.

•   How a person stay or tink inside.​—Da Census 14:24.

•   Spirits, like God an da angels.​—1 Kings 22:21; John 4:24.

 All dese tings no can see, but can see da effects of um. Same lidat, one Bible dictionary wen tell dat God’s spirit “jalike da wind, no can see um, no can hold um but powaful.”

 Sometimes in da Bible dey talk bout God’s spesho spirit az his “hands” or his “fingers” (Songs Fo God 8:3; 19:1; Luke 11:20 NWT; compare Matthew 12:28 NWT.) Jalike one guy who make stuff use his hands an fingers to do his work, God wen use his spesho spirit fo make dese stuff:

•   Da universe.​—Songs Fo God 33:6; Isaiah 66:1, 2. 

•   Da Bible.​—2 From Peter 1:20, 21.

•   Da unreal stuff his guys wen do befoa time, an da preachin.​—Luke 4:18; Jesus Guys Wat Dey Wen Do 1:8; 1 Fo Da Corint Peopo 12:4-11.

•   Da good kine qualities dat peopo who lissen him get.​—Fo Da Galatia Peopo 5:22, 23.

Da spesho spirit not one person

 By talkin bout God’s spirit as his hands, fingers, or breath da Bible sho iz not one person. (Exodus 15:​8, 10 NWT) One worka’s hands no can do nottin by itself witout da brain an da body tellin um wat fo do. Same same God’s spesho spirit ony do wat he tell um fo do (Luke 11:13) Da Bible match up God’s spesho spirit wit watta, trus, an smarts. All dis sho dat God’s spesho spirit iz not one person.​—Isaiah 44:3; Jesus Guys Wat Dey Wen Do 6:5; 2 Fo Da Corint Peopo 6:6.

 Inside da Bible get da names of Jehovah God an his Boy, Jesus Christ, but no moa one name fo da spesho spirit (Isaiah 42:8 NWT; Luke 1:31) Wen God wen give da Christian guy Stephen one vision inside heaven he only seen two guys not three. Da Bible tell in Jesus Guys 7:55 “But da Good An Spesho Spirit take charge a him. He look up to da sky, an see how awesome God stay, an he see Jesus stay stan by da right side a God.” God’s spesho spirit was his mana in action, makin um so dat Stephen could see da vision.

 Wrong idea: 1 John 5:7, 8 in da King James Bible tell da “Holy Ghost”, or God’s spesho spirit, iz one person an da spesho spirit, God, and Jesus all stay one.

 Da truth: In da King James Bible at 1 John 5:7, 8 Ova dea tell “in heaven, the Father, the Word, and the Holy Ghost: and these three are one. And there are three that bear witness in earth.” Research guys wen figga out dat John neva even write those words. Those words no even belong inside da Bible. One guy who kno plenny bout all dis stuff, Bruce Metzger, he wen go write dat those words are bogus.

 Wrong idea: Da Bble talk bout da spesho spirit like iz one person so dat means it iz.

 Da truth: Sometimes da Bible does talk bout da spesho spirit like one person but dat no mean it iz. Da Bible talk bout death, sin, an smarts like iz one person. (Wat Da Smart Guys Tell 1:20; Romans 5:17, 21 NWT) Inside da Bible wisdom or da smarts could sound like one person cuz can do work fo make tings happen an have kids. Same ting wit sin, talk bout um like iz one person dat make us like stuff das not ouas, dat try get us fo da bad tings, an even as one killa​—Matthew 11:19 NWT; Luke 7:35 NWT; Romans 7:8, 11 NWT.

 Same ting wen John wen write down da stuff dat Jesus wen tell, had again sound like one person cuz he had call da spesho spirit one kokua guy dat would talk, listen, an even sho dem wat fo do. He wen use manly kine words like “he” an “guy” wen talkin bout da “kokua guy” inside John 16:7-15. He wen do dis cuz inside da Greek language da word helpah or kokua guy always mean one guy or one man. So always gotta have words like “he” or “guy” wen using um. But wen John neva use da word fo helpah or kokua guy wen talkin bout da spesho spirit he wen use da word “it” instead.​—John 14:16, 17 NWT.

 Wrong idea: Gettin baptized in da name of da spesho spirit sho dat iz one person.

 Da truth: Da word “name” inside da Bible sometimes dat talkin bout wea da powah or da right fo do someting come from. (Deuteronomy 18:5, 19-22 NWT; Esther 8:10) Jalike wen peopo do someting “in da name of da law” dat no mean da law iz one person. Same ting like wen da Bible tell one person stay baptized “in da name of” da spesho spirit no mean da spesho spirit iz one person. But it mean da guy gettin baptized, he kno da powah da spesho spirit get, an how Jehovah use um fo make wateva he like happen.​—Matthew 28:19 NWT.

 Wrong idea: Jesus guys had tink dat da spesho spirit was one person.

 Da truth: Da Bible an history no say dat. One encyclopedia wen tell da tinking dat da spesho spirit was one person wen come way lattah on, ova 250 years afta Jesus guys had mahke.