Da bad news: If you shy, might miss out on having good frens an doin stuffs.

 Da good news: If you shy, dat not always one bad ting. It can help you fo tink befoa you say someting, an can make you pay attention an lissen moa betta.

 Da moa betta news: Jus cuz you shy, dat no mean you always goin feel lidat. You can control um! Dis article goin show how you can do dat.

•  Figga out wat you sked of

•  Put um into action

•  Wat peopo yoa age say

 Wen you shy, dat can make you sked of talking to peopo face to face. Cuz of dat, might feel jalike you all alone in one dark place. Dat can make you sked. But if you figga out wat you stay sked of, you might find out iz not az bad az you tink. Try look dese three exampos.

•   Fear #1: “I donno wat fo talk about.”

   Da trut iz: Peopo goin rememba how you make dem feel moa den dey rememba wat you say. You can control wat you sked of by lissening moa betta an by caring about wat odda peopo get fo say.

   Try tink bout dis: Wat kind fren you like—somebody who talk plenny or somebody dat lissen good?

•   Fear #2: “Peopo goin tink I weird.”

   Da trut iz: Peopo goin tink stuff about you wedda you shy or not. But if you show dem who you iz fo real, dat can help peopo tink good tings bout you.

   Try tink bout dis: If you tink erybody stay judging you, maybe iz you dat stay judging dem.

•   Fear #3: “I goin come shame if I no say da right ting.”

   Da trut iz: Dat happen to erybody sometimes. You can control wat you sked of by looking at yoa mistakes az one chance fo show peopo you no tink you perfeck.

   Try tink bout dis: You like bein aroun da kine guys dat can admit dey not perfeck?

 You wen kno? Some guys tink dey not shy jus cuz dey stay texting all da time. Goin be moa easy fo make fo real kine frens wit somebody wen you talk to dem in person. Sherry Turkle, somebody who kno plenny bout psychology an technology kine stuff, wen write: “Wen we see each oddas face an hea dea voice, dass wen we come moa tight wit each odda.” a

•   No compare. You no gotta be one social butterfly. But try make um one goal fo come litto less shy so you no miss out having good frens an doin cool stuffs.

   “You no gotta talk long time or be da life of da party. Jus introduce yoaself to somebody an ask um coupo simpo questions.”—Alicia.

   Bible trut: “Erybody gotta tink real good bout how dey ack an wat dey do fo see if wat dey do stay pono. Den dey can feel good cuz az wat ony dey do. No good dey look how dey do stuff by how odda guys do stuff.”—Fo Da Galatia Peopo 6:4.

•   Try look aroun. Watch how peopo who not shy talk story. Wat work fo dem? Wat no work az good? Wat you like try copy from dem?

   “Try watch an learn from da guys dat can make frens easy. Try spock out how dey ack an wat dey say wen dey meet somebody fo da firs time.”—Aaron.

   Bible trut: “Fo make sharp someting iron, need iron. Fo make sharp one fren, need anodda fren.”—Smart Guys 27:17.

•   Ask questions. Mos of da time peopo like fo tell wat dey tink. So asking one question iz one good way fo start talking story. Dat goin put way less presha on you too.

   “You can make ready so dat you not so stressed. Befoa you go out somewea, try tink of some tings fo talk about or some questions you can ask. Dis can help you fo no presha out.”—Alana.

   Bible trut: “No good you ony tink bout da tings you tink stay importan. Make shua you tink bout da tings da odda peopo tink stay importan too.”—Fo Da Philippi Peopo 2:4.