Da Aposal Paul wen say: “Wen I like do wass good, right dea inside me I like do da bad kine stuff too.” (Fo Da Rome Peopo 7:21) You eva wen feel lidat? Dis goin help you hando wen you get presha fo do someting wrong.

•  Wat you gotta kno

•  Wat you can do

•  Wat odda guys yoa age say

 Presha fo do someting wrong an presha from oddas stay conneckted. Da Bible tell dat “da bad kine guys…goin jam you up fo you no be one good guy!” (1 Fo Da Corint Peopo 15:33) Presha from da media or odda peopo can make you like do someting wrong, put you in one bad spot, an could even make you like follow wat dey do.​—Outa Egypt 23:2.

 “Cuz you like odda peopo like you, dat presha can make you copy wateva dey doin.”​—Jeremy.

 Someting fo tink about: Goin be moa hahd fo no do someting wrong if you kea too much bout wat oddas tink bout you?​—Smart Guys 29:25.

 Da bottom line: No let guys yoa age presha you fo do someting you know iz wrong.

 Kno wat you believe. If you donno wat you believe, you goin be jalike one puppet dat oddas can control: “Mo betta, go check out eryting, den stay tight wit da good stuff.” (1 Fo Da Tessalonika Peopo 5:21) Iz way betta fo follow wat da Bible tell. If you undastan wat you believe, goin be moa easy fo stick to um.

 Someting fo tink about: How come you believe dat da way God tell you fo live iz da bes?

 “I wen see dat oddas respeck me moa wen I stick to wat I believe an no give in.”​—Kimberly.

 Somebody fo copy in da Bible: Daniel. Probly wen Daniel wuz one teenaga, he “wen make up his mind” fo follow God’s rules.​—Daniel 1:8.

 Know yoa weak spots. Da Bible talk about how wen you young, you “like do any kine stuff.” (2 Timoty 2:22) Dese tings might be wanting fo have sex, wanting fo fit in, an wanting fo be away from yoa parents befoa you ready.

 Someting fo tink about: Da Bible tell: “Da bad kine tinking pull us all ova. We come jalike da fish dat go afta da bait.” (From James 1:14) Wass da hardest ting fo stay away from?

 “Be honest wit yoaself bout wat tings iz da mos hahd fo you stay away from. Do research on how fo fight agains dose tings an write down da stuffs dat can help you. Dat way, da nex time you goin like do someting wrong, you goin kno wat fo do so you no cave in.”​—Sylvia.

 Somebody fo copy in da Bible: David. Sometimes he wen cave in to da presha from oddas an he wen even give in to da bad stuffs he wen like do. But David wen learn from his mistakes an wen try fo do betta. David wen pray to Jehovah: “Put inside me one new kine heart dat ony tink good an clean kine stuff. Give me one new kine attitude dat no change.”​—Songs Fo God 51:10.

 Control yoaself. Da Bible tell: “No let da bad kine stuff get powa ova you.” (Fo Da Rome Peopo 12:21) Dat mean you no gotta cave to da presha fo do wrong, you can choose fo do da right ting.

 Someting fo tink about: Wen you get presha fo do someting wrong, how you can control yoaself an do wass right?

 “I tink bout how I goin feel if I cave in to da ting dass tempting me. I goin feel good? Maybe fo litto while. But goin las? No. I ony goin feel moa worse. Wort it or wat? Not even!”​—Sophia.

 Somebody fo copy in da Bible: Paul. He wen admit he wanted fo do bad tings but he wen control himself. He wen write: “I make my body tough an work um hard.”​—1 Fo Da Corint Peopo 9:27.

 Da bottom line: You da one who control how you goin hando wen you like do bad tings.

 Rememba, da bad tings you like do now iz ony temporary. Melissa one 20 yea old wen say: “Plenny of da bad stuffs I wanted fo do in high skool I no even kea bout now. Tinking bout dis make me kno dat da bad stuffs dat I like do now goin pass, an dat layta on I goin look back an be happy cuz I neva give in.”