LESSON 05
Da Bible Is How God Talk to Us
Jehovah wen give us da Bible. Is one awesome gif dat get 66 small kine books all put togedda. But maybe you tink: ‘Wea da Bible wen come from? Who wen write um?’ Fo ansa dese questions, we go check out how God talk story to us in da Bible an how we wen get um.
1. If man wen write um, how come we tell da Bible come from God?
About 40 diffren guys wen write da diffren books of da Bible. Dey wen write da firs one about 3,500 years ago an dey wen pau da las one about 1,900 years ago. Da guys who wen write um was all diffren. Had farma guys, fishamans an ali’i. Even if dey was all diffren, all da parts of da Bible still line up wit each odda. How can? Is cuz da Bible is wat God tell. (Read um 1 Fo Da Tessalonika Peopo 2:13.) Da guys who wen write um, neva write wat dey had tink. “Wat dey wen write, az wat God wen give um. Dey tell wat da Good An Spesho Spirit wen show um fo tell.” a (2 From Peter 1:21) God wen use his good an spesho spirit fo help da guys write down wat he was tinking.—2 Fo Timoty 3:16.
2. Who can get da Bible?
Da stuff dat stay inside da Bible can help “all da diffren countries, an ohanas, an diffren language, an peopos.” (Read um Jesus Show 14:6.) God wen make shua dat was goin get da Bible in moa languages den any odda book eva. Almos erybody can get da Bible. Dass true no matta wea peopo live o wat kine language dey talk.
3. How Jehovah wen proteck da Bible?
Dey wen write da Bible on stuffs dat no las too long. Da guys who really wen love da Bible wen copy um ova an ova an dey made shua dey did um real good. Had guys wit plenny powa dat wen try fo get rid of da Bible. But had odda guys who wen go all out fo proteck um. No moa nobody o notting dat goin stop Jehovah from talking wit us. Da Bible tell: “But wat oua God tell, dat goin stay foeva.”—Isaiah 40:8.
DIG MOA DEEP
Learn moa about how God wen use his spirit fo help man write da Bible, how he wen proteck um, an how he wen make um so erybody could get um.
4. Da Bible show who wen write um
Play um da VIDEO. Den read um 2 Fo Timoty 3:16, an den talk story about dese questions afta.
-
If dese guys wen write da Bible, how come dey call um da Word of God?
-
You believe dat God can tell humans wat he tink?
Maybe one office helpa wen write one letta but wat tell came from da boss. Same ting da Bible, humans wen write um, but wat tell wen come from God.
5. Da Bible still stay hea even tho had guys dat wen try get rid of um
If God wen give us da Bible, garuntee he goin proteck um. Fo long time had guys wit plenny powa dat wen try fo get rid of da Bible. Some religious leada guys even wen try hide um. But even if had guys dat went agains an threaten fo kill dem, had plenny peopo dat wen go all out fo proteck da Bible. Fo learn about one of dese guys, play um da VIDEO, an den talk story about da questions afta.
-
Now dat you know wat all dese guys wen do fo proteck da Bible, dat make you like read um moa? How come?
Read um Songs Fo God 119:97, den talk story about dis question:
-
How come had plenny peopo dat wen go fo broke fo make shua dat peopo could get da Bible in dea own language?
6. One book fo erybody
Moa peopo can get da Bible in dea own language den any odda book eva. Read um Jesus Guys 10:34, 35, an den talk story about dese questions:
-
How come God like erybody get da Bible in dea own language?
-
Wat you like about da Bible?
Almos
100%
of da peopo in da world
can get da Bible in one language dat dey undastan
Get
da whole ting o part of um in ova
3,000
languages
5,000,000,000
Dass about how many copies of da Bible dat was eva made,
an dass way moa den any odda book
WAT SOME PEOPO TELL: “Da Bible, dass ony one old book peopo wen write.”
-
Wat you tink?
-
Wat kine tings get dat show us dat da Bible is God’s Word?
WAT WE WEN TALK ABOUT
Da Bible is God’s Word an he wen make shua dat erybody can get um.
Wat You Wen Learn
-
Wen we tell dat God wen use his spirit fo help men write da Bible, wat dat mean?
-
Wat blow yoa mind about how da Bible still stay hea an how erybody can get um in dea language?
-
Now dat you know how much God wen do fo talk to you, how dat make you feel about him?
LEARN SOME MOA
Learn about da history of da Bible from wen dey wen write um down to wat we get now.
Three times peopo wen try wipe out da Bible. Wat wen happen?
“Da Bible—How Wen Survive?” (Da Place Fo Watch From No. 4 2016)
Look wat kine pilikia peopo had fo go thru fo translate da Bible.
Peopo wen copy an translate da Bible choke times. How you can be shua dat wat stay inside still da same?
