LESSON 07

Wat Jehovah Stay Like?

PLAY

Wat you tink Jehovah stay like wen you tink about him? You tink da tings he do blow yoa mind, but you feel he too far away fo get fo know who him? O you tink he get choke mana, but no can even get close to um jalike one tundastorm? So wat Jehovah really stay like? Jehovah use da Bible fo show you who him, an dat he kea about you.

1. How come we no can see God?

“God, he one spirit.” (John 4:24) Jehovah, he no moa one body jalike us. He one person who live in heaven wea we no can see um.

2. Wat kine person Jehovah stay?

We no can see Jehovah, but wen we get fo know who him, we come fo love him cuz of da kine Person he stay. Da Bible tell: “Cuz Da One In Charge, he like fo peopo do wass right, an he no foget da peopo dat stay tight wit him.” (Songs Fo God 37:28) He “feel pity fo us guys, an give us chance,” speshly fo da guys who stay suffa. (From James 5:11) “If you sad inside, Da One In Charge goin stay real nea you. Da peopo dat feel all bus up inside, Da One In Charge get um outa all dat.” (Songs Fo God 34:18) An you wen know, da stuff we choose fo do can make Jehovah happy o sad? Somebody who choose fo do da bad kine stuff, make him soa inside an make him sad. (Songs Fo God 78:40, 41) But somebody who do da good kine tings, make him feel real good inside an supa happy.—Read um Smart Guys 27:11.

3. How Jehovah show he love us?

Da ting dat Jehovah show da mos is love. Fo shua “God erytime get love an aloha fo erybody—dass how he stay.” (1 From John 4:8) Jehovah show us his love thru da Bible, an thru da tings he wen make. (Read um Jesus Guys 14:17.) Try tink how he wen make us. He wen make us so we can see pretty kine colors, hear good kine music, an taste onolicious kine grindz. Garans he like us fo live good.

DIG MOA DEEP

Try learn wat Jehovah use fo do all kine awesome kine tings. Den see how Jehovah show da tings dat make us like fo get fo know an love him.

4. Da spesho spirit—How God do tings

Da way we use oua hands fo do work, dass how Jehovah use his spesho spirit. Da Bible show us dat da spesho spirit is not one person, but is da mana Jehovah use fo do da tings he like. Read um Luke 11:13 an Jesus Guys 2:17, an den talk story about dese questions:

God goin make his spesho spirit take charge of all da peopo who ask fo um. So wat you tink? Da spesho spirit, az one person, o az da mana God use fo do tings da way he like? How come?

Jehovah use his spesho spirit fo do tings dat blow oua mind. Read um Songs Fo God 33:6 an 2 From Peter 1:20, 21, an den talk story about dis question:

Wat kine ways Jehovah wen use his spesho spirit?

5. Jehovah make um easy fo get fo know an love him

Moses wen trus an stick tight wit God but he wanted fo know da One who wen make him moa betta. So Moses wen tell um: “I like you make me know wat kine stuff you plan fo do. Den I goin know you fo real kine.” (Outa Egypt 33:13) So den, Jehovah wen show Moses wat kine person Him. Read um Outa Egypt 34:4-6, an den talk story about dese questions:

Wat Jehovah wen show to Moses dat show wat kine person him?
Which one of dose tings you like da bes?

6. Jehovah kea about peopo

God’s peopo, da Hebrew peopo, was slave guys in Egypt. How Jehovah had feel wen his peopo had suffa? Play um da AUDIO an lissen, o read um Outa Egypt 3:1-10. Den talk story about dese questions.

AUDIO: Jehovah Wen Kea About How Dey Wen Suffa (2:45)

Wat dis story teach you about how Jehovah feel about peopo who suffa?—Try look verses 7 an 8.
You tink dat Jehovah really like an can help peopo? How come?

7. We can learn who Jehovah stay by da tings he wen make

Jehovah show us who him by da tings he wen make. Play um da VIDEO. Den read um Fo Da Rome Peopo 1:20, an den talk story about da question afta.