LESSON 11

How You Can Learn Plenny From Da Bible

PLAY

You eva wen look at one projeck an tink to yoaself, ‘Ho, dis ting is too much fo hando!’ But fo make um moa easy, maybe you wen do um litto by litto. Same same wen you read da Bible. Maybe you tink, ‘Wea I goin start?’ In dis lesson, we goin talk about some easy kine tings you can do dat goin make um moa fun fo read an learn from da Bible.

1. How come we gotta read da Bible ery time?

Somebody who read da Bible ery time, o “da Rules From Da One In Charge,” Jehovah, goin be happy an tings goin go good fo dem. (Read um Songs Fo God 1:1-3.) Fo start, try jus read da Bible fo couple minutes ery day. Da moa you get fo know da Bible, da moa fun you goin get wen you read um.

2. How you goin get da good kine tings from wat you read inside da Bible?

Fo get da good kine tings from wat we read inside da Bible, us gotta take da time fo tink hard about um. We gotta read um, an “tink bout um day time an nite time.” (Joshua 1:8) Wen you read da Bible, try tink, ‘Wat dis tell me about Jehovah God? How I can use dis in my life? How I can use dese scripchas fo help odda peopo?’

3. How you goin make time fo read da Bible?

Is hard fo make time fo read da Bible. So we gotta try fo “pick da bestes kine stuff.” (Fo Da Philippi Peopo 1:10) You can do dis by picking one time fo read da Bible ery day. Some guys make time fo read da Bible early morning time. Odda peopo do um layta on, maybe wen dey stay eating lunch. An den get odda peopo who read da Bible nite time, befoa dey go sleep. Wass da bes time fo you read da Bible?

DIG MOA DEEP

Learn how fo make reading da Bible moa good fun. See wat you can do fo make ready fo learn plenny from da Bible.

You can learn fo like eat diffren kine food. Same same, you can learn fo have good fun wen you read da Bible.

4. You can learn fo have good fun wen you read da Bible

How you goin know if you like one food dat you neva eat befoa? Gotta try um, aah? Same same, we no goin know if we like fo read da Bible until we try um. Read um 1 From Peter 2:2, an den talk story about dis question:

You tink dat if you read da Bible ery day, you goin like do um?

Play um da VIDEO an see how some peopo start fo love reading da Bible. An den talk story about da questions afta.

VIDEO: Younga Guys Learn Fo Love Da Bible (5:33)

Inside da video, wat kine stuff da young guys had hard time wit?
Wat wen help dem fo keep reading da Bible ery day?
Wat kine tings dey wen do fo make um so dey wen like read da Bible?

Tings dat can help you start fo read da Bible:

Try pick one translation dass correck an easy fo undastan. Try go look da New World Translation if get um in yoa language o anodda language you undastan.
Fo start, go read parts of da Bible dat you like read. Fo get some ideas, go check out da chart “How Fo Start Reading Da Bible.”
No foget wat you wen read, aah? Use da chart dat stay inside hea, “Keep Track Of Wat You Wen Read Inside Da Bible.”
Use um da JW Library^®app. Wit da app you can read an lissen to da Bible wea eva you stay using one smart phone o anodda kine device.
Use da appendixes, da part in da back of da Bible in da New World Translation. Inside dea, get maps, charts, an one lis of Bible words an wat dey mean dat can help you like fo read da Bible.

5. Make ready fo learn da Bible

Read um Songs Fo God 119:34, an den talk story about dis question:

How come az good fo pray befoa you read da Bible o befoa you make ready fo learn da Bible wit somebody?

How you can make shua you ready fo learn da Bible wit somebody? Wen you make ready fo one lesson, try do um lidis:

Read um wat tell in da firs part of da lesson.
Look um up an read um da scripchas, an try fo undastan how dey line up wit wat you stay learning.
Mark um da main parts dat ansa da questions; dis goin help you talk story about um wit yoa teacha.

You wen know?

Witnesses Fo Jehovah wen use diffren kine translations of da Bible. But da New World Translation of the Holy Scriptures, we like dat one plenny cuz is correck, is easy fo undastan, an use God’s name.—Check um out da web article “Do Jehovah’s Witnesses Have Their Own Bible?”

WAT SOME PEOPO TELL: “I no moa time fo learn da Bible. Az too hard. I tried.”