LESSON 19
Witnesses Fo Jehovah—Fo Real Kine Christians O Wat?
Us guys, Witnesses Fo Jehovah, believe we stay fo real kine Christians. How come? We go look wea da tings we believe come from, da name dat make us diffren, an da love an aloha we get fo each odda.
1. Wea da tings Witnesses Fo Jehovah believe come from?
Jesus wen tell: “[God] erytime tell da trut.” (John 17:17) Same same like Jesus, da tings Witnesses Fo Jehovah believe always come from da Bible. Fo exampo, try look da history of Witnesses Fo Jehovah. Aroun da year 1870, had one group of peopo who really wen like learn da Bible real good an dey wen hui togedda fo find out wat da Bible really tell. Dey wen believe wat da Bible tell, even if was diffren from wat da churches wen tell. Den dey wen start fo tell odda peopo wat dey wen learn from da Bible. a
2. How come we call ouaselfs Witnesses Fo Jehovah?
Jehovah call da guys dat worship him his witnesses cuz dey tell da trut about him. (Fo Da Hebrew Peopo 11:4–12:1) Try look, from long time befoa time, God wen tell his peopo: “You guys goin tell wat you know bout me.” (Read um Isaiah 43:10.) Jesus, “can trus him fo tell da trut bout wat God tell him,” dass how come he one Witness Dat God Can Trus. (Jesus Show 1:5) Az why, in 1931 we wen take da name Witnesses Fo Jehovah. We feel supa spesho fo have dat name.
3. How Witnesses Fo Jehovah show da same kine love an aloha jalike Jesus?
Jesus wen love his guys so much, dey was jalike his ohana. (Read um Mark 3:35.) Same same, Witnesses Fo Jehovah jalike one family dat stay supa tight wit each odda, no matta wea dey stay all ova da world. Dass how come we call each odda braddah an sistah. (Fo Filemon 1, 2) We also lissen wat da Bible tell: “Get love an aloha fo yoa braddahs an sistahs dat trus Christ.” (1 From Peter 2:17) Witnesses Fo Jehovah show dis kine love an aloha plenny diffren kine ways. One of da ways we do um is fo help out oua braddahs an sistahs all ova da world wen dey need um.
DIG MOA DEEP
Learn some moa about da history of Witnesses Fo Jehovah an see how come we stay fo real kine Christians.
Fo real kine Christians believe wat tell inside da Bible an dey share um wit odda peopo
4. Wat we believe come from inside da Bible
Jehovah wen tell from long time befoa time dat us guys was goin undastan da true kine tings inside da Bible moa betta. Read um Daniel 12:4, an den talk story about dis question:
-
Cuz God’s peopo was goin check out da Bible real good, wat was “goin come moa plenny?”
Try look how one hui of Bible learnas, one of dem Charles Russell, wen learn from da Bible. Play um da VIDEO, an den talk story about da question afta.
-
Inside da video, how Charles Russell an da odda Bible Learnas wen learn from da Bible?
You wen know?
Sometimes, da tings we believe gotta change small kine. How come? Wen da sun stay coming up, you can see moa an moa da land, aah? God help us undastan da Bible da same way. (Read um Smart Guys 4:18.) So even if wat da Bible tell no change, wat we believe change az we undastan da Bible moa betta.
5. We do wat oua name tell us gotta do
How come we wen take da name Witnesses Fo Jehovah? Play um da VIDEO, an den talk story about da question afta.
-
How come da name Witnesses Fo Jehovah is right on?
How come Jehovah wen pick peopo fo be witnesses fo him? Cuz dey was goin figga he da ony God dass fo real even if get plenny bulais about him. Try look two bulais about him.
Some religions tell dea guys dat God like dem use idol kine stuffs wen dey worship him. Dass true o wat? Read um Da Prieses 26:1, an den talk story about dese questions:
-
Wat is da trut? How Jehovah feel about idol kine stuffs?
Some religious leada guys tell dat Jesus, he God. Dass true o wat? Read um John 20:17, an den talk story about dese questions:
-
Wat is da trut? God an Jesus da same person o wat?
-
How dat make you feel fo know dat Jehovah send his Witnesses fo tell da trut about him an his Boy?
6. We get love an aloha fo each odda
Da Bible tell dat Christians jalike diffren parts of da human body. Read um 1 Fo Da Corint Peopo 12:25, 26, an den talk story about dese questions:
-
How fo real kine Christians goin ack wen odda Christians suffa?
-
Wat you wen see about da love an aloha Witnesses Fo Jehovah show fo each odda?
In one place wea get Witnesses Fo Jehovah dat suffa, odda Witnesses Fo Jehovah all ova da world ack real fas. Fo look one way we do dis, play um da VIDEO. Den talk story about da question afta.
-
How Witnesses Fo Jehovah wen help each odda afta da hurricane?
Fo real kine Christians show love an aloha to oddas who need help
WAT SOME PEOPO TELL: “Witnesses Fo Jehovah, dass jus one new religion.”
-
How long awready Jehovah been callin da peopo dat worship him his witnesses?
WAT WE WEN TALK ABOUT
Witnesses Fo Jehovah stay fo real kine Christians. All ova da world we one ohana who worship Jehovah, believe wat tell inside da Bible an tell odda peopo da trut about him.
Wat You Wen Learn
-
How come we wen take da name Witnesses Fo Jehovah?
-
How we ack wit one anodda?
-
Wat you tink? Witnesses Fo Jehovah fo real kine Christians o wat?
LEARN SOME MOA
Learn moa about oua history.
Jehovah’s Witnesses—Faith in Action, Part 1: Out of Darkness (1:00:53)
Try look one way how Witnesses Fo Jehovah show dat someting stay bulai.
You get questions about Witnesses Fo Jehovah? Try look da ansas ova hea.
“Questions Plenny Peopo Ask About Witnesses Fo Jehovah” (web page)
Stephen use to bus up peopo cuz he wen hate dem. Try look how da way Witnesses Fo Jehovah wen ack wen help him fo change.
“My Life Was Going From Bad to Worse” (The Watchtower, July 1, 2015)
a From 1879, Witnesses Fo Jehovah wen make Da Place Fo Watch From magazine fo tell da true kine tings inside da Bible.
