LESSON 43
Wat Da Bible Tell About Drinking Alcohol?
All ova da world, peopo no tink da same way wen come to alcohol. Some guys drink ony wen dey togedda wit dea frenz. Get some guys who no even drink. An odda guys suck um up so much dey get piloot. So wat da Bible tell about alcohol?
1. Is wrong fo drink alcohol o wat?
Da Bible no tell is wrong fo drink alcohol. Wen da Bible talk about da good tings God wen give us, it talk about “da wine dat make um feel good inside.” (Songs Fo God 104:14, 15) Had some solid braddahs an sistahs da Bible wen talk about who wen drink alcohol.—1 Fo Timoty 5:23.
2. Wat good kine words from da Bible can help you if you goin drink?
Jehovah tell az no good fo suck um up too much an get piloot. (Fo Da Galatia Peopo 5:21) Da Bible tell: “No come jalike some a da guys dat suck um up too much erytime.” (Smart Guys 23:20) So if we goin drink—wit odda peopo o by ouaself—az no good fo drink so much us no can tink straight, tell o do any kine, o jam up oua body. So if us no can hando wen we drink, maybe we no should drink anymoa.
3. How us can show respeck fo how oddas tink about alcohol?
Each person gotta choose if dey goin drink alcohol o not. Az no good fo judge somebody who choose fo drink even litto bit, an az no good fo presha somebody fo drink if dey no like. (Fo Da Rome Peopo 14:10) An if us drinking goin make trouble fo oddas, maybe we no goin drink. (Read um Fo Da Rome Peopo 14:21.) “Mo betta us no try fo do ony da stuff dat us guys like do. Mo betta us do da stuff dat help da odda peopo too.”—Read um 1 Fo Da Corint Peopo 10:23, 24.
DIG MOA DEEP
Try look some truts inside da Bible dat can help you tink if you goin drink o not, an how much if you goin. An try find out wat you can do if you get hard time cuz of one drinking problem.
4. Wat, you goin drink?
Wat Jesus wen tink about drinking alcohol? Fo learn da ansa, try look da firs miracle dat he wen do. Read um John 2:1-11, an den talk story about dese questions:
-
Wat we learn from dis miracle about how Jesus tink about alcohol an da guys dat drink um?
-
Cuz Jesus neva tell drinking alcohol was bad, how one Christian gotta tink about somebody who drink?
But, jus cuz one Christian can drink alcohol, dat no mean dass smart fo dem do um erytime. Read um Da Smart Guys 22:3, an try tink how dese tings goin help you figga if you goin drink o not:
-
You goin drive o run one machine.
-
You stay hapai.
-
One docta tell you no good fo you drink alcohol.
-
You get hard time fo hold back how much you drink.
-
Az agains da law fo you drink alcohol.
-
You stay wit somebody who no drink cuz befoa time dey had one drinking problem.
You goin get alcohol at yoa wedding o anodda party o wat? Fo see wat can help you figga out wat fo do, play um da VIDEO.
Read um Fo Da Rome Peopo 13:13 an 1 Fo Da Corint Peopo 10:31, 32. Afta reading each scripcha, talk story about dis question:
-
How dis can help you pick da ting dat goin make Jehovah happy?
Ery Christian gotta figga fo demself wedda o not dey goin drink alcohol. Even if he drinks sometimes, get odda times wea he jus no goin drink
5. Figga how much you goin drink
If you goin drink alcohol, try rememba: even if Jehovah no tell drinking alcohol is bad, he tell is bad fo suck um up too much. How come? Read um Hosea 4:11, 18, an den talk story about dis question:
-
Wat can happen wen somebody suck um up too much?
Wat can help us fo no suck um up too much? We gotta be humbo an know how much we can hando. Read um Smart Guys 11:2, an den talk story about dis question:
-
If you goin drink, how come az good fo know wen you goin stop?
6. Wat can help somebody stop sucking um up too much?
Try look wat wen help one guy fo stop abusing alcohol. Play um da VIDEO, an den talk story about da questions afta.
-
Inside da video, how Dmitry wen ack wen he wen drink?
-
He was able fo stop drinking right away o wat?
-
Wat wen help him no need alcohol anymoa?
Read um 1 Fo Da Corint Peopo 6:10, 11a, an den talk story about dese questions:
-
Coming all piloot, how come dass serious?
-
How we know somebody who abuse alcohol can change?
Read um Matthew 5:30, an den talk story about dis question:
-
Wen Jesus used da word picha fo cut um off yoa hand, dass jalike giving up someting fo make Jehovah happy. If you sucking um up too much an get hard time stop, wat can help you? a
Read um 1 Fo Da Corint Peopo 15:33, an den talk story about dis question:
-
Wat can happen if you hang out wit guys dat suck um up too much?
WAT SOME PEOPO TELL: “Az wrong o wat fo drink alcohol?”
-
Wat you goin tell?
WAT WE WEN TALK ABOUT
Jehovah wen give us alcohol so notting wrong wit um. But he tell is bad fo suck um up too much an get piloot.
Wat You Wen Learn
-
Wat da Bible tell about alcohol?
-
Wat bad kine stuff can happen if we suck um up too much?
-
How us can show respeck fo da way oddas tink about alcohol?
LEARN SOME MOA
How teenagers can be akamai wen come to alcohol?
Go look wat you can do fo get ova one drinking problem.
“Keeping Alcohol in Its Place” (The Watchtower, January 1, 2010)
Az ok fo one Christian fo toast?
“Questions From Readers” (The Watchtower, February 15, 2007)
Inside da story “I Was a Bottomless Barrel,” try look how one guy wen stop sucking um up too much.
a Da guys who no can stop drinking alcohol, maybe dey need professional kine help fo stop. Plenny doctas tell dat somebody who had one drinking problem, moa betta if dey no drink at all.
