LESSON 44
Eryting We Celebrate Make God Happy O Wat?
Jehovah like us fo live good an even fo throw parties sometimes. But eryting we celebrate make God happy o wat? Wen come to dis kine stuff, how we show Jehovah we love him?
1. How come plenny tings peopo celebrate no make Jehovah happy?
Maybe you neva know dat plenny tings peopo celebrate go agains wat da Bible tell o come from da bulai kine religion. Maybe get someting fo do wit spirit kine stuffs o tinking dat part of you still stay alive even afta you mahke. Some tings peopo celebrate, dey do um cuz dey believe in luck o in stuffs dat no stay true. (Isaiah 65:11) Jehovah tell da guys who worship him fo watch out: “No be jalike dem. No touch da pilau kine stuffs anymoa.”—2 Fo Da Corint Peopo 6:17. a
2. How Jehovah feel wen we celebrate humans by giving dem too much respeck?
Jehovah tell us fo watch out fo no “ony trus peopo.” (Read um Jeremiah 17:5.) Some holidays show respeck to one rula guy o one war hero. Oddas celebrate da day dey wen come one country o someting dat rep da nation dey come from jalike one flag. (1 From John 5:21) An still yet, odda peopo celebrate stuff dey tink goin make one change. How you tink Jehovah goin feel if we give too much respeck to somebody o one hui, speshly one dat believe o do tings dat go agains wat he like?
3. How da way peopo ack can make da tings peopo celebrate no good?
Da Bible tell dat is no good fo “get piloot . . . ack wild . . . [an] party too much.” (1 From Peter 4:3) Wen some peopo celebrate, dey go buckaloose an do stuffs dat no stay pono. Fo stay frenz wit Jehovah, we gotta stay far away from dat kine pilau kine stuffs.
DIG MOA DEEP
Check out how you can make Jehovah happy by wat you choose fo do wen come to holidays an tings you celebrate.
4. No celebrate tings dat no show respeck to Jehovah
Read um Fo Da Efesus Peopo 5:10, an den talk story about dese questions:
-
Wat kine tings we gotta make shua of wen we choose if we goin celebrate one holiday o not?
-
Wat kine holidays peopo celebrate wea you live?
-
You tink dose holidays make Jehovah happy o wat?
You eva wen wonda wat God tink about birthday parties? Da ony two guys da Bible tell wen celebrate dea birthday neva worship Jehovah. Read um Da Start 40:20-22 an Matthew 14:6-10. Den talk story about dese questions:
-
Wat is same same in bot of dese birthday parties?
-
From wat wen happen in da Bible, how you tink Jehovah feel about birthdays?
Still yet, maybe you stay tinking, ‘Jehovah really kea if I go one birthday party o celebrate someting dat no stay in da Bible?’ Read um Outa Egypt 32:1-8. Den, play um da VIDEO an den talk story about da questions afta.
-
Why we gotta make shua we know wat Jehovah tell is ok?
-
How we do dat?
How fo know if Jehovah no like someting we celebrate
-
Come from stuffs dat no stay in da Bible o wat? Fo find out, go learn how wen start.
-
Give too much respeck to humans, huis, o stuff dat rep one nation o wat? We respeck Jehovah moa den anyting an we trus dat he goin fix all da pilikia in da world.
-
Da stuff you do fo celebrate um go agains da Bible o wat? Gotta stay clean in eryting we do.
5. Kokua oddas fo respeck wat you believe
Can be hard fo say no wen oddas try presha you fo celebrate someting dat no make Jehovah happy. Take yoa time fo tell um how come you not goin do um, an say um in one nice kine way. Fo check out how you can do dis, play um da VIDEO.
Read um Matthew 7:12, an den talk story about dese questions:
-
From wat tell inside da Bible, you goin tell yoa ohana who no trus God dat dey no can celebrate one holiday o wat?
-
Wat you can do so dat yoa ohana know dat even if you no celebrate wit dem, you still get love an aloha fo dem?
6. Jehovah like us fo be happy
Jehovah like us fo have good fun wit oua ohana an frenz. Read um Da Teacha 8:15, an den talk story about dis question:
-
How dis scipcha show Jehovah like us be happy?
Jehovah like his guys fo have good fun times togedda. Play um da VIDEO fo learn how you can spock dis at oua Intanational Big Kine Meetings.
Read um Fo Da Galatia Peopo 6:10, an den talk story about dese questions:
-
Us gotta celebrate holidays fo “do da good kine stuff fo erybody” o wat?
-
Wat kine giving goin make you moa happy—cuz you feel you gotta cuz is one holiday o weneva you like?
-
Plenny Witnesses sometimes plan someting spesho fo dea kids an even give dem presents. If you get kids, wat kine spesho tings you can do fo dem?
WAT SOME PEOPO TELL: “Neva mind wat one holiday is about. Main ting you wit yoa ohana an yoa frenz.”
-
Wat you goin tell?
WAT WE WEN TALK ABOUT
Jehovah like us fo have good fun wit oua ohana an frenz. But he no like us celebrate anyting dat no make him happy.
Wat You Wen Learn
-
Wat kine questions us can ask fo figga out if someting we celebrate no goin make Jehovah happy?
-
How we can kokua oua ohana an frenz fo undastan wat we choose fo do wen come to da holidays?
-
How you know dat Jehovah like us fo be happy an fo have good fun?
LEARN SOME MOA
Try look some holidays dat Christians no celebrate.
“Why Don’t Jehovah’s Witnesses Celebrate Certain Holidays?” (Web article)
Go look four reasons how come we believe dat fo celebrate one birthday no make Jehovah happy.
“How Come Witnesses Fo Jehovah No Celebrate Birthdays?” (Web article)
Check out how da keiki who love Jehovah can make him happy aroun da holidays.
Uku million Christians choose not fo celebrate Christmas. How dey feel about um?
“They Found Something Better” (The Watchtower, December 1, 2012)
