Wen we stay wit oua braddahs an sistahs, we feel jalike King David: “Good, you know, wen all da braddah guys stick togedda jalike dey one. Dass goin make erybody feel real good inside.” (Songs Fo God 133:1) Fo us guys stick togedda, no happen by itself. All us get one part in keeping um.

1. Wat God’s peopo get dat stay unreal?

If you go one meeting wit da local hui in one odda place, maybe you no undastan da language, but still yet you feel like you stay home. How come? Cuz no matta wea we stay, we all using da same tings fo learn da Bible, an we work hard fo show love an aloha to each odda. No matta wea we live, we all “call out to [Jehovah an] work togedda fo [him].”​—Zefaniah 3:9.

2. Wat you can do fo help erybody stick togedda?

“Now show even mo plenny love an aloha fo each odda cuz you get one good heart.” (1 From Peter 1:22) How you can do dat? Instead of tinking about all da stuff dat not good about odda peopo, try look at da good stuff about dem. No ony hang out wit guys dat jalike you, but get tight wit yoa braddahs and sistahs dat diffren den you. Anodda ting we like do is work hard fo get rid of any bad kine feelings, o prejudice, fo some peopo.​—Read um 1 From Peter 2:17. a

3. Wat you goin do if you get beef wit anodda Christian?

We stick togedda, but we not perfeck. Sometimes, we let each odda down, even hurt each odda. So da Bible tell us fo “let um go,” an tell too: “Da One In Charge wen let you guys go, fo you make jalike him an let dem go too.” (Read um Fo Da Colosse Peopo 3:13.) We wen hurt Jehovah plenny times, an he wen let us go. So he like us do da same fo oua braddahs. If you find out dat you wen hurt somebody, go be da firs one fo take kea tings.​—Read um Matthew 5:23, 24. b

 DIG MOA DEEP

4. Get ova prejudice

We like love all oua braddahs. But sometimes is not easy fo be good wit somebody who not da same az us. Wat can help us? Read um Jesus Guys 10:34, 35, an den talk story about dese questions:

• Jehovah take in all kine peopo fo be his Witnesses. How dat gotta make you feel about da peopo dat not da same az you?

• Wat kine prejudice get wea you live dat you like stay away from?

Read um 2 Fo Da Corint Peopo 6:11-13, an den talk story about dis question:

• How you can learn fo love all yoa braddahs an sistahs moa an moa?

5. Let um go an make peace

Even tho Jehovah no need fo anybody let him go, he always stay ready fo let us go. Read um Songs Fo God 86:5, an den talk story about dese questions:

• Wat we learn from dis verse about how Jehovah stay ready fo let us go?

• Why you stay tankful he ready fo let you go?

• Wat kine tings might come up dat can make um hard fo us get along wit each odda?

How we can copy Jehovah an stick togedda wit oua braddahs an sistahs? Read um Smart Guys 19:11, an den talk story about dis question:

• If somebody make you supa irraz, o get you all nutz, wat you can do fo make tings betta?

 Wat you should do if you da one dat make peopo come all nutz o irraz? Play um da VIDEO, an den talk story about da question afta.

• Inside da video, wat da sistah wen do fo make peace?

 WAT WE WEN TALK ABOUT

You can help erybody in da local hui fo stick togedda by showing love to yoa braddahs an sistahs an letting dem go.

Wat You Wen Learn

• How you can get ova prejudice?

• Wat you goin do if you get beef wit one odda Christian?

• How come you like copy Jehovah wen you let odda peopo go?