LESSON 57

Wat If You Do Someting Really Bad?

PLAY

Even if you love Jehovah plenny, an you try hard fo no do anyting dat would make him sad, you goin make mistakes sometimes. But some sins is moa worse den oddas. (1 Fo Da Corint Peopo 6:9, 10) If you do someting really bad, rememba dat Jehovah neva stop loving you; he like let you go an help you.

1. Wat we gotta do so Jehovah goin let us go?

Da guys who love Jehovah stay supa sad wen dey figga dey wen do someting really bad. But dey can res inside fo know wat Jehovah wen promise his peopo: “No matta all da bad kine stuff you wen do look jalike one big red spot now, but dey goin come white jalike da snow.” (Isaiah 1:18) If we feel fo real kine sorry, den Jehovah goin let us go fo real kine. How we show we fo real kine sorry? Cuz we feel supa bad about wat we wen do, we stop doing wat stay bad, an ask Jehovah fo please let us go. Den we work hard fo change da way we wen tink, an wat we was doing dat wen make us start fo sin. We try live in one clean way, da way Jehovah like.—Read um Isaiah 55:6, 7.

2. How Jehovah use da eldas fo help us wen we sin?

If we do someting really bad, Jehovah tell us fo “call da eldas of da local hui.” (Read um From James 5:14, 15.) Dese eldas love Jehovah an dey love da guys who serve him. Dey wen learn how fo help us so we can come tight wit Jehovah again.—Fo Da Galatia Peopo 6:1.

How da eldas help us if we do someting really bad? Two o three eldas goin use da scripchas from da Bible fo show us how come wat we wen do was wrong. Dey goin give us tings we can do an good kine words fo help us no sin again. If somebody who do someting really bad no stay sorry fo wat he stay doing, da eldas goin hemo him from da local hui so oddas no copy him.

DIG MOA DEEP

Be tankful an learn how fo betta undastan how Jehovah help us if we do someting really bad.

3. Telling wat we wen do help us fo get betta

Any time we do someting wrong, dat hurt Jehovah. Dass how come we gotta fess up to him. Read um Songs Fo God 32:1-5, an den talk story about dis question:

How come is good fo us tell Jehovah oua sins an not try fo hide um?

Wen we ask da eldas fo help afta telling Jehovah oua sins, we goin feel way betta. Play um da VIDEO, an den talk story about da question afta.

VIDEO: “Jehovah Sho His Aloha Wen He Teach and Correct” (3:01)

Inside da video, how da eldas wen help Canon come back to Jehovah?

We gotta tell da trut an no hold back wen we talk to da eldas, cuz dey stay dea fo help us. Read um From James 5:16, an den talk story about dis question:

How come is moa easy fo da eldas help us wen we no hold back fo tell da trut?

Tell yoa sin, no hold back, an tell da trut to da eldas, an take da help Jehovah give you cuz he love you

4. Jehovah give chance to da guys who sin

If get somebody who wen do someting really bad an no like do wat Jehovah tell, he goin get hemo from da hui an we no goin cruz wit him. Read um 1 Fo Da Corint Peopo 5:6, 11, an den talk story about dis question:

Jalike yeast make da bread dough come big, if we hang out wit somebody who wen do someting bad an no like change, how dat goin affeck da local hui?

Jus like how Jehovah give chance to guys who no stay perfeck an sin, da eldas try reach an help da guys who wen get hemo from da hui. Plenny of da ones who wen get hemo from da local hui wen come back in. How come? Even if was soa, da correcktion wen help dem fo see wat dey wen do was wrong.—Songs Fo God 141:5.

How da way Jehovah treat guys who sin show dat he stay fair, give chance, an get love an aloha?

5. Jehovah let us go wen we stay fo real kine sorry an change

Jesus wen use one word picha dat help us fo undastan how Jehovah feel wen somebody feel fo real kine sorry, an change. Read um Luke 15:1-7, an den talk story about dis question: