He no lissen to all who talk to him. (Numba 1 From John 5:14) If you hurt peopo an do all kine bad stuff, he goin turn one deaf ear. ( John 9:31) Jus like da Israelite peopo who wen do bad kine stuff an be hard head, Jehovah not goin hear dem. Jehovah like us pray wit one good kine heart. No mattah how pilau you stay, if you sorry an stop doin um, he goin lissen.​—Read Isaiah 1:15; 55:7.

Watch da video Does God Lissen to Any Kine Prayas?

You gotta pray only to Jehovah, he da only true God. (Matthew 4:10; 6:9) Us guys keep messin up, we gotta go thru Jesus cuz he wen mahke fo kokua us. ( John 14:6) He kno all da pilau kine stuff we do. Dats why he wen mahke fo us. Jehovah no like wen we say da same tings ova an ova, gotta come from da na’au or deep inside.​—Read Matthew 6:7; Mark 8:6.

Jehovah can hear even wen you pray in your head. (Nehemiah 2:4) Jehovah like us guys talk story wit him anytime, like wen we eat, befoa we go sleep, wen we get up, an wen we get plenny pilikia.​—Read Numba 1 From Peter 5:7; Matthew 15:36.

We stay togedda, fo come moa solid wit Jehovah. Get guys who no undastan why, dey make fun of wat we believe in, dats why hard. (Numba 2 Fo Timoty 3:1, 4; Numba 2 From Peter 3:3, 13) We gotta help each odda out.​—Read Fo Da Hebrew Peopo 10:24, 25.

 Wen we hang aroun guys who love Jehovah, dat goin help us stay tight wit God. Da meeting place fo Witnesses fo Jehovah, get plenny chance fo kokua each odda fo trus God.​—Read Fo Da Rome Peopo 1:11, 12.

Gotta tink hard bout wat da Bible tellin you an keep doin um. It tell you wat Jehovah wen do befoa, wat he doin now, an wat he goin do bumbye. Dat way we goin kno da tings God goin promise us. So wen we pray to God, our love grow, an us guys come akamai.​—Read Numba 1 Fo Timoty 4:15, 16.

Gotta tink hard bout wat you wen learn. Dat goin help you trus God. Like one kalo plant need watta all da time fo grow good, same ting wit our faith, no can jus read da Bible once in a while, gotta use um all da time.​—Read Matthew 4:4; Fo Da Hebrew Peopo 11:1, 6.

Jehovah goin give you da bes kine life foeva. But you gotta let him kokua you, so you no goin get too much pilikia. Den your faith goin come strong. (Numba 1 Fo Da Corint Peopo 12:9,10) Dats gonna show dat you love Jehovah an trus um, an nottin goin stop you from being hau’oli.​—Read From James 1:25; From James 4:4, 8.