LESSON 8
How Come God No End Evil an Suffering?
1. How all da pilau stuffs wen start?
God let man rule fo long nuff time fo sho dat dey no can fix da pilikia in da world
Da pilau kine stuffs wen start wen Satan had tell da firs bulai. Satan wuz one importan angel fo God, but he had come high makamaka an like be God. ( John 8:44) Satan wen make up one bulai dat wen make da firs wahine Eve side wit him. Same ting wit Adam, he had team up wit Eve an neva lissen to God. Cuz a dat all us guys suffa an mahke.—Read Da Start 3:1-6, 19.
Wen Satan tell Eve fo no lissen to God, dat sneaky buggah wuz making one way fo go agains God’s right fo rule. Plenny peopo wen hui up wit Satan an go agains God. Az why, Satan, “he in charge a da peopo inside dis world.”—Read John 14:30; Numba 1 From John 5:19.
2. Wuz God’s fault since he had make dem?
Get peopo who tink God had make good and bad from da start, dat he da one who choose who goin be one good or pilau guy. But das not wat da Bible say. He tell evryting God wen make wuz perfeck, peopo and da angel guys. (Da Rules Secon Time 32:4, 5) God neva make peopo fo be like one robot dat no can choose fo demselves. He had make evrybody wit da powah fo chose fo do good or da bad tings. God give us dat powah fo chose wat we like do, cuz den can sho dat we love him fo real, not cuz he make us.—Read From James 1:13-15; Numba 1 From John 5:3.
3. How come God no hemo all oua suffering yet?
Satan wen trick Adam and Eve into tinking dey could choose wats right and wrong an neva need God fo tell dem wat fo do. So Jehovah wen let um try figga um out for demself. How come? So they can see dat fo be really happy, gotta lissen to God. (Da Start 6:12) Afta 6,000 years, dats moa den nuff time fo give um chance. Notting wen get betta, stay moa jam up den eva, and only goin get moa worse. Da govament leadas no can fix um. But Jehovah, he da only one get da powah fo do dat.—Read Jeremiah 10:23, NW; Fo Da Rome Peopo 9:17.
Jehovah, he teach us da bes way fo go. (Isaiah 48:17,18) Pretty soon, he goin hemo all da govaments. Den, only da guys who lissen to him goin live foeva.—Isaiah 11:9.—Read Daniel 2:44.
Watch da video How Come God No Hemo All Oua Suffering Yet?
4. Cuz God stay holdin back, wat we get chance fo do?
God stay waiting, how come? Cuz Satan dat pilau buggah he had say, nobody goin love Jehovah if dey no get someting back. You like sho das one lie? How we live can sho dat we like lissen to God, not Satan.—Read Job 1:8-12, NW; Numba 2 From Peter 3:9.
5. How can we sho we like God fo be oua rula?
Wat we choose goin sho if we like God fo be oua rula or not
Us guys can sho dat we like God be da one fo tell us wat fo do, wen we read da Bible and do um. ( John 4:23) We turn oua back away from dis world, an no make niele wit da govament stuff cuz Satan own um all.—Read John 17:14.
Satan like use his powah fo set us up. He like make us tink is good fun fo party plenny, suckum up and make anykine. Cuz dey no undastan how come us guys no make like dem, da frens and ohana come all huhu wit us and talk stink bout us. (Numba 1 From Peter 4:3, 4) We go choose fo hang out wit da guys dat get plenny love fo God and do all the good tings he tell fo do. Wen we lissen to God, goin sho dat Satan one big liar wen he sed we give up easy wen we unda presha.—Read Numba 1 Fo Da Corint Peopo 6:9, 10; 15:33.
Cuz God get choke love fo peopo, garanz he goin hemo all da bad stuffs an all da tings dat make us suffa. If we tink das true an we sho um by how we ack den us guys can live foeva in paradise on eart.—Read John 3:16.
