LESSON 10
How You Going Spock True Worship?
1. Get only one true religion?
“Watch out da guys dat say dey talk fo God an teach stuff dat not true.”—MATTHEW 7:15.
Jesus had teach his guys only get one true religion. Is jalike one road dat stay hele on to life dats foeva. Jesus wen tell, only litto bit peopo goin find um. (Matthew 7:14) God only like worship dat match up wit wat da Bible tell. Da peopo dat worship God da way he like, stay all tight togedda, cuz a da same kine faith dey get.—Read John 4:23, 24; 14:6; Fo Da Efesus Peopo 4:4, 5.
Watch da video God Like All Kine Worship?
2. Wat Jesus wen tell bout fake Christians?
“Dey stand up in front evrybody an tell, “God, I kno him!” But den, dey go turn aroun an ack jalike dey donno him.”—FO TITUS 1:16.
Jesus wen tell bout da pilau guys who like mess up da true religion. Dey only ack like dey true worshipahs, inside dey stay only lepo. All kine churches say dey Christian, but how you kno if dey stay fo real? Jesus sed goin be easy fo see da guys dat worship God da right way.—Read Matthew 7:14-23.
3. How you can tell da guys who worship God da right way?
Five tings fo look fo.
-
Guys who worship God da right way respeck da Bible, cuz is from Jehovah. Dey go all out fo do wat da Bible tell. Dey not da same az da peopo who only lissen to dea church leadas, who make up anykine dat no come from God. (Matthew 15:7-9) Guys who worship God da right way, not two faced, preachin one ting den doin da odda.—Read John 17:17; Numba 2 Fo Timoty 3:16, 17.
-
Jesus’ guys respeck God’s name, Jehovah. Jesus had sho plenny respeck by telling evrybody bout God’s name. Den he help peopo fo see da good tings bout God, an teach his guys fo pray dat God’s name goin get plenny respeck. (Matthew 6:9, NW ) Try look aroun, wat religion tellin God’s name?—Read John 17:26; Fo Da Rome Peopo 10:13, 14.
-
True Christians tell peopo bout God’s Govament. God wen sen his boy, cuz peopo no moa hope witout God’s Govament. Dey needed fo kno bout God’s Govament. Dats why Jesus wen give um all he get, tellin da good kine tings God wanted da peopo fo kno. He wen do um all da way until he wen mahke. (Luke 4:43; 8:1; 23:42, 43) Jesus wen tell dat his guys wuz goin preach bout God’s Govament too. If somebody like talk story wit you bout God’s Govament, wat religion you tink he stay in?—Read Matthew 24:14.
-
Jesus’ guys no stay tie up wit dis pupule world. You can see, dey no stay in plenny stuffs like politics an social pilikia. ( John 17:16; 18:36) Dey no copy da bad kine stuff inside da world, dey no make anykine!—Read From James 4:4.
-
True Christians get fo real kine love an aloha fo each odda. From God’s Word, dey learn fo respeck peopo from all ova. Da odda religions stay all wrap up in wars, da true religion stay out of um. (Micah 4:1-3) Dey no need tell dat dey love an respeck peopo, dey show um, by using dea time an money fo help peopo.—Read John 13:34, 35; Numba 1 From John 4:20.
4. You can spock da true religion?
Which religion follow da Bible, respeck God’s name to da max, tell God’s Govament is da only hope for peopo, no stay wrap up in wars, an only show love an aloha? Wat you tink?—Read Numba 1 From John 3:10-12.
