5 Wen Jesus had see all da peopo he wen go on top da mountain. Afta he wen sit down, his followas had come by him, 2 an he wen start fo teach um:

3 “Da guys dat know dey need God stay happy, cuz his Govament in da heaven going be fo dem.

4 “Da guys who sad stay happy, cuz God going make um feel betta.

5 “Da guys who humbo stay happy, cuz da earth going be fo dem.

6 “Da guys who like do da right ting stay happy, cuz God going give dem wat dey like.

7 “Da guys dat show pity an give chance stay happy, cuz God going show dem pity an give um chance too.

8 “Da guys who get good heart inside stay happy, cuz dey going know who God.

9 “Da guys who make peace wit oddas stay happy, cuz dey going be God’s kids.

10 “Da guys who suffa fo doing da right ting stay happy, cuz God’s Govament in da heaven going be fo dem.

11 “You stay happy wen peopo talk stink about you, make you suffa, tell all kine bulais an pilau kine tings about you cuz of me. 12 Dass how dey wen make to da guys who talk fo God befoa time. Be supa happy, God going give you someting awesome.

13 “You guys jalike salt fo da earth. But if da salt lose da taste, can come salty again? No can. Da ony ting lef fo do wit um is throw um outside wea da guys going walk all ova um.

14 “You no can hide one town wen stay on top one mountain. In dis dark world, you jalike one light. 15 Wen peopo light one lamp, dey no put um unda one basket. Dey put um on one table so dat erybody in da house can see. 16 Same ting you guys, shine yoa light so odda guys can see um. Dat way dey going see da good kine tings you do an show respeck to yoa Faddah who stay in da sky.

17 “No tink I wen come fo get rid of da Rules an da words of da guys who wen talk fo God befoa time. I neva come fo do dat. I wen come fo make um all come true. 18 Fo shua all da tings in da Rules going come true. In fact, going be moa easy fo da sky an da earth fo come pau den fo da smalles part of da Rules fo no happen. 19 Whoeva broke even one of da smalles rules an tell oddas fo do da same ting, dey no can be part of God’s Govament in da sky. Da guys dat follow um an teach oddas fo lissen, can. 20 You gotta have moa trus den da Pharisees a an da guys dat teach da Rules. Odda wise, no ways you going be part of God’s Govament.

  21 “You wen hea dey wen tell da guys befoa time, “No murda nobody. If you do dat, dey going take you court fo get judge.” 22 But you know wat, da guy who get mad at his braddah an stay lidat, he going get judge too. An whoeva talk pilau to his braddah going get  judge by da highes court. An whoeva tell, “You stupid an good fo notting!” going get judge fo go Gehenna. b

23 “So den, if you going make one sacrifice to God an you rememba yoa braddah stay huhu wit you, 24 leave um yoa gif in front da alta. Go fix um an make peace wit yoa braddah firs. Den go back an make yoa sacrifice.

25 “If somebody like take you court, fix da problem fas kine befoa you get dea, cuz if you no do dat he going take you in front da judge. If da judge tell you guilty, he going give you to da cops. An den dey going throw you in jail. 26 An garans you not going come outa dea until you pay back all da money you owe.

27 “You wen hea, “No fool aroun wit somebody you no stay marry to” 28 But I tell you dis, anybody dat stay look one wahine long time cuz he like fool aroun wit her, he awready wen do um in his heart. 29 So if yoa right eye stay jamming you up, rip um out an throw um away. Moa betta you lose ony one part of yoa body den yoa whole body go Gehenna. c 30 An if yoa right hand stay jamming you up, cut um off an throw um away. Moa betta you lose ony one part of yoa body den yoa whole body go Gehenna. d

31 “Anodda ting you wen hea, “If you divorce yoa wife, you gotta give her divorce paypas” 32 But, I tell you dis, you betta not divorce yoa wife if she neva fool aroun. e Cuz if you do dat, you set her up fo fool aroun. An if anybody marry her, dey going be fooling aroun too.

33 “An you know dis wat yoa ancestas wen hea, “No promise fo do someting an den no do um. You gotta do wateva you wen promise Jehovah.” 34 But, I tell you dis, wen you make one promise no swear by heaven, cuz dass God’s throne. 35 No swear by earth, cuz dass wea God’s feet stay. No swear by Jerusalem, cuz dass God’s spesho city. 36 An no swear by yoa life, cuz you no can even turn one hair on yoa head white o black. 37 If you tell you going do someting, do um. If you tell you not going do someting, den no do um. If you say tings you no mean, you jalike da Devil.

38 “You wen hea, “If somebody buss anodda guys eye, den his eye should get buss. If somebody knock out anodda guys teeth, den his teeth should get knock out.” 39 But, I tell you dis, no fight back da guy who going hurt you. If somebody slap yoa face, let um slap da odda side. 40 If somebody take you court cuz he like take yoa shirt, give um yoa jacket too. 41 If somebody who get powa tell you fo do someting, do even moa den he tell. 42 If somebody ask you fo someting, give um. If somebody like borrow someting, let um.

43 “You wen hea, “You gotta love da guys aroun you but hate da guys dat like hurt you.” 44 But, I tell you dis, “You gotta keep loving da guys who like hurt you an pray fo da guys who make you suffa.” 45 If you do dis, you show dat you jalike yoa Faddah in heaven. He make da sun come up fo da good kine peopo an da bad kine peopo. He make um rain on da guys who do good kine tings an da guys who do bad. 46 If you love ony da guys who love  you, you expeck someting good fo dat o wat? Even da guys dat colleck da tax money f do dat 47 If you tell howzit to ony yoa frenz, dat going make you spesho? Erybody all ova da world do dat too aah? 48 You gotta show perfeck kine love jalike yoa Faddah in da heaven.

6 “No do good tings in front oddas ony fo look good to dem. If you do dat, you not going get notting from yoa Faddah in da heaven. 2 Wen you do someting good, no toot yoa horn an tell erybody about um. Dass wat da guys who ony ack an make like dey good do wen dey worship an wen dey stay outside on da streets. Dey ony do dat so odda guys talk good about dem. I tell you dis, dass all dey going get. 3 But wen you do good to oddas, no let yoa lef hand know wat yoa right hand stay do. 4 No let nobody see da good tings you stay do. Cuz yoa Faddah who stay watching going give you good kine tings fo dat.

5 “Anodda ting, wen you pray, no make like da guys who ony ack like dey good. Dey like fo stand up an pray in da Jew church an on da street corna so erybody can see dem. Fo shua, dass all dey going get. 6 But wen you pray, go inside yoa room by yoaself an close da door. Den go pray to yoa Faddah. Nobody can see him, but he can see you. An he da one going do good tings fo you. 7 Wen you pray, no say da same tings ova an ova. Da peopo who donno how fo worship God do dat. Dey tink God stay lissen to dem cuz dea prayas real long. 8 No make like dem. Yoa Faddah know wat you need befoa you even ask um.

9 “Dis how you gotta pray:

““Oua Faddah in da heaven, we pray dat peopo get plenny respeck fo yoa name. 10 We pray fo yoa Govament rule da earth, an dat tings happen on da earth da way you like um, jalike in heaven. 11 Give us oua food fo today, 12 an let us go wen we do wrong tings, da same way we wen let oddas go wen dey do wrong tings to us. 13 An help us fo no give in wen we get presha fo do someting wrong. Proteck us from da Devil.”

14 “If you let guys go wen dey do wrong tings to you, yoa Faddah in da heaven going let you go too. 15 But if you no do dat, den yoa Faddah no going let you go.

16 “Wen you skip food, g no go aroun make sad face like da guys who ony ack like dey good. Dey make sad face fo let erybody know dey skip food. Fo shua, dass all dey going get. 17 But wen you skip food, brush yoa hair an wash yoa face. 18 Den nobody going know you skip food. Ony yoa Faddah going know wat you do. Den yoa Faddah who see eryting going do good tings fo you.

19 “No work hard ony fo come rich an get plenny tings ova hea on earth. Da bugs an da rus can make um come rotten, an da steala guys going broke in an cockaroach um. 20 Moa betta work hard an do tings fo God who stay in heaven. Wen you do dat, bugs an rus no can do notting to um, an da steala guys no can cockaroach um. 21 Wateva is da mos importan ting to you, dass wea yoa heart going be.

22 “Yoa eye jalike one lamp dat give you light. If yoa eye see clear, den you going have all da light you need. 23 If yoa eye look tings da wrong way, you going be dark. Bummahs fo you if yoa light stay dark an not bright!

 24 “Nobody can work fo two bosses. He going hate one an love da odda, o he going stick to one an no respeck da odda one. If money is da mos importan ting in yoa life, you no can work fo God.

25 “Dass how come I going tell you dis. No worry about yoaself anymoa, about wat you going eat o wat you going drink. An no worry anymoa about da clotheses you going wea. Yoa life moa importan den all dat. 26 Try look da birds. Dey no plant seed, o pick wat grow, o put um away fo layta. But still yet, yoa Faddah in da sky feed um. You moa importan den dem, no? 27 Anybody can add one hour to yoa life wen you stay worry? 28 So why you worry about yoa clotheses? Try look da flowas dat grow wild. Dey no work hard o make clotheses. 29 But I tell you wat, not even King Solomon wit all his fancy clotheses wen look az good az one of dem. 30 If God make da plants dat grow wild look nice, dass hea today an gone tomorrow, moa so he going do dat fo you, you guys wit ony litto bit faith? 31 So no eva worry an tell, “Wat we going eat?” o, “Wat we going drink?” o, “Wat we going wea?” 32 Dis da kine stuff da peopo dat donno God stay worry about. Yoa Faddah in heaven, he awready know you need all dat.

33 “Make God’s Govament an doing wat he tell da mos importan tings in yoa life. Den God going give you all da tings you need. 34 So no worry about tomorrow! Tomorrow get odda stuff fo worry about. You get nuff fo worry about today.

7 “No judge anymoa, bumbye da same ting going happen to you. 2 How you judge peopo, dass how dey going judge you too. How you make to dem, dass how dey going make to you. 3 Why you look da sawdust in yoa braddah’s eye, wen you get one big piece lumba in yoa own eye? 4 Who you tink you fo tell yoa braddah, “Let me hemo da sawdust in yoa eye,” wen get one big piece lumba in yoa own eye? 5 No ack you! Firs hemo da lumba from yoa own eye, den you going see moa betta how fo hemo da sawdust from yoa braddah’s eye.

6 “No give God’s tings to dogs o throw yoa pearls in front pigs. Dey ony going step all ova um an den dey going afta you fo hurt you.

7 “If you no stop asking, you going get um. If you no stop looking, you going find um. If you no stop knocking, da door going open. 8 Erybody dat ask, going get. Erybody dat look, going find. Erybody dat knock, da door going open fo dem. 9 If yoa boy ask you fo food, you not going give um one rock aah? 10 O if he ask you fo one fish fo eat, you going give um one snake? 11 Even tho you do bad kine stuff, you still know how fo give good kine tings to yoa kids. So fo shua yoa Faddah in da heaven going give good kine tings to da guys dat ask him!

12 “Make to odda peopo da way you like dem make to you. Dis wat Moses an da guys who had talk fo God wen teach.

13 “Go inside da skinny gate, cuz get one big gate wit one road dat get plenny room an choke peopo stay go thru um. Dey going mahke cuz dey go dat way. 14 But da skinny gate wit da small road dat take you to life, ony litto bit peopo stay find um.

15 “Watch out fo guys dat tell dey talk fo God but ony bulai. Dey ack jalike sheep but dey moa like one hungry wolf dat like hurt you. 16 Jalike you going know wat kine tree wen  you look da fruit, you going know who dem cuz of wat dey do. You not going find grapes on da thornbush o any kine sweet fruit growing on da weeds. 17 So den, one good tree going make good fruit, but one bad tree going give rotten fruit. 18 One good tree no can make rotten fruit, an one bad tree no can give good fruit. 19 If one tree no give good fruit, peopo going cut um down an burn um. 20 Same ting, you going know who da guys dat bulai cuz of da tings dey do.

21 “Not erybody who call me “Lord” an tell dey work fo me going be part of God’s Govament. Ony da guys dat lissen to my Faddah in da heaven going. 22 Plenny guys going tell me “Lord, you no rememba? We wen tell oddas about you, we wen use yoa name fo kick out da bad kine spirits, an we wen do plenny unreal tings cuz of yoa powa.” 23 Den I going tell dem, “Who you?! Beat it! You guys ony do da bad kine stuff!”

24 “So, da guy who lissen to me an do wat I tell um, is jalike one guy who akamai enuff fo build his house on solid rock. 25 Wen da rain stay dumping an start fo flood, an get big wind, da house neva fall down cuz he wen build um on top da rock. 26 But if anybody hea wat I tell an no do um, he jalike one real stupid guy who wen build his house on top da sand. 27 Wen da rain stay dumping an start fo flood, an get big wind, da whole house wen fall down an eryting wen come all wipe out.”

28 Wen Jesus pau talk, all da peopo no could believe how good he wen teach dem. 29 He no was like da law teachas dat time, cuz wat he wen teach had come from God.