TRYING FO TALK STORY DA FIRS TIME
LESSON 4
Be Humbo
Bible trut: “No go do stuff cuz you tink you mo betta den da odda guys . . . No get big head.”—Php 2:3.
Wat Paul Wen Do
1. Watch um da VIDEO, o read um Jesus Guys 26:2, 3. Den tink about da questions:
-
How Paul show he humbo wit da way he talk to King Agrippa?
-
How Paul wen focus on Jehovah an da Scripchas instead of himself?—Check out Jesus Guys 26:22.
Wat We Learn From Paul?
2. Wen we humbo an talk wit respeck to peopo, dey going like lissen to wat we like share.
Copy Paul
3. No talk down to peopo. No make like you know eryting an da odda guy know notting. Talk to dem wit respeck.
4. Make um clear dat you stay teaching from da Bible. God’s Word can affeck da way peopo tink an feel. Wen we use um, we help dem build solid kine trus.
5. Stay cool. No keep trying fo prove dat you right. We no like argue. Show you humbo by staying cool an know wen fo dig out. (Smart Guys 17:14; Titus 3:2) If we stay cool, den maybe da person going like lissen to us anodda time.
