WEA Babylon was, archaeologists wen dig up choke bricks dey had use fo build da city. Robert Koldewey, one archaeologist, wen say dey wen make dese bricks in ovens “outside da town wea da clay is good an get plenny fuel.”

Archaeologists wen find proof dat da govament in Babylon wen use dose ovens fo someting pilau. Paul-Alain Beaulieu, one professa from da University of Toronto who know plenny about Assyria, wen say, “Babylonian writings show dat da King wen tell dose dat neva lissen him o neva show respeck fo sacred tings gotta be thrown into da oven fo get burn.” One writing from da days of King Nebukadnezzar say, “Destroy dem, burn dem, roas dem . . . to da oven . . . make da smoke go up, throw dem in da fire so dey mahke.”

Dis match up wit wat stay in Daniel chapta 3. Ova dea, King Nebukadnezzar wen make one mangus gold statue an put um in Dura outside Babylon Town. Wen da three young guys, Shadrak, Meshak, an Abednego no was going bow down to da statue, Nebukadnezzar wen get so mad he wen “tell his guys fo make da oven fire place seven times mo hot den befoa.” Den he wen “throw um inside da real hot oven fire place.” One strong angel wen save dem so dey neva mahke.—Dan 3:​1-6, 19-28.

Da bricks dey wen find in Babylon back up da Bible too. Plenny of um get words on top um dat tell how awesome da king. One of um say, “Nebukadnezzar, da Babylon King . . . da palace dat I, da mos awesomes king wen build . . . my kids going live in dis place foeva.” Dass jalike wat tell in Daniel 4:30 wea Nebukadnezzar wen brag, “Dis town, Babylon, stay big now! Az cuz I wen build um lidat fo come my house, da king! I do um cuz I stay real strong an peopo goin know I awesome an importan!”