1. Wat you wen learn wen you firs wen study da Bible?

 YOU rememba da tings you wen firs learn from da Bible? You probly wen trip out wen you wen find out God get one name. O made you feel good fo know dat if you bad you no going burn in hell. An rememba how happy you was fo know dat all da guys dat you love who wen mahke, you can be wit dem again inside one paradise on earth?

2. Afta learning Bible truts, wat kine odda ways you wen grow? (Fo Da Efesus Peopo 5:1, 2)

² Da moa you wen study da Bible, da moa yoa love fo Jehovah wen grow. Dat love wen affeck da way you wen ack. Da Bible wen help you fo make good choices. You wen learn fo tink good an do da right ting cuz you wanted fo make Jehovah happy. Jalike one keiki like copy dea parent, you wen copy yoa Faddah in da heaven, Jehovah.—Read um Fo Da Efesus Peopo 5:1, 2. 

3. Wat kine questions we can ask ouaself?

³ Some questions we can ask ouaself: “I love Jehovah moa now den befoa wen I firs wen get baptize? An since den, I tink an ack moa like Jehovah speshly wen come to loving my braddahs an sistahs?” If yoa love an aloha not az solid az was befoa, no need feel bad. Dass someting dat wen happen to da firs Christians. Jesus neva tell dem laytas, an he no going do dat to us too. (Jesus Show 2:4, 7) Cuz he know dat da love dat we had befoa wen we firs wen learn da trut, we can get um back.

4. Wat we going go ova in dis lesson?

 ⁴ Inside dis lesson we going learn how fo make oua love fo Jehovah an oddas grow. An den we going learn da good tings dat going happen to us an odda peopo wen oua love come moa strong.

5-6. Wat kine hard time Paul wen go thru wen serving Jehovah, but wat wen help him fo keep going?

⁵ Da aposal Paul wen love wat he was doing fo Jehovah. Still yet he had go thru some hard times. He had fo travel real far an no was easy back den. An “plenny tings wen almos kill” Paul. He had fo cross “big rivas,” face “robba guys,” an even had guys who wen buss him up. (2 Cor 11:23-27) An den da braddahs he wen go help out no was always tankful fo da stuff he wen do.—2 Cor 10:10; Php 4:15.

⁶ Wat wen help Paul keep serving Jehovah? Paul wen learn plenny about Jehovah from da scripchas an da stuff he wen go thru. Dat wen make him know fo shua dat Jehovah love him. (Rome 8:38, 39; Efe 2:4, 5) Cuz of dat, his love fo Jehovah wen grow moa strong. Paul had show his love fo Jehovah wen he “wen kokua God spesho peopo.”—Heb 6:10.

7. How oua love fo Jehovah can come moa strong?

⁷ Wen you study da Bible real good yoa love fo Jehovah going come moa strong. Wen you read um, try figga wat you learn about Jehovah. Try ask yoaself, how wat I stay reading show Jehovah love me? How all dis stuff going help me fo love Jehovah?

8. How praya can help oua love fo God come moa strong?

⁸ Anodda way fo make oua love fo Jehovah come moa strong is wen we pray to him eryday an tell him how we really feel. (Songs 25:4, 5) An den we going see Jehovah ansa oua prayas. (1 John 3:21, 22) Dis wat wen happen to one sistah named Khanh in Asia. She wen say, “At firs I wen love Jehovah cuz all da stuff I wen learn about him. But wen I had see him ansa my prayas my love fo him wen come even moa strong. An dat wen make me like do da tings dat going make him happy.” b

9. How Timoty wen show dat his love fo da braddahs an sistahs wen come moa strong?

⁹ Afta Paul wen come one Christian, he wen meet one unreal guy name Timoty. Timoty wen love Jehovah an peopo. Paul wen tell da Philippi peopo, “Timoty, he da ony guy ova hea by me dat tink bout tings jalike me. Fo real kine, he tink plenny how fo kokua you guys.” (Php 2:20) Even tho Timoty was one good organiza an one good speaka, he neva say notting about dat. Paul wen like Timoty cuz he wen love da braddahs an sistahs. Cuz of dat, da local huis no could wait fo Timoty come visit dem.—1 Cor 4:17.

10. How Anna an her husband wen show dea love fo dea braddahs an sistahs?

¹⁰ Us too like look fo ways fo do good  tings fo oua braddahs an sistahs. (Heb 13:16) You rememba Anna, da sistah from da las lesson? Afta had one mayjah storm, her an her husband wen go visit one Witness family. Ova dea dey wen find out dea roof was all buss an had fall thru da house. Cuz of dat dey neva have no clean clothes. Anna wen tell, “We had wash um, iron um, fold um up, an give um back to dem all clean. Dat was ony small kine to us, but cuz of dat we came real good frenz wit dem even til today.” Anna an her husband wen love dea braddahs an sistahs, an dat had move dem fo kokua.—1 John 3:17, 18.

11. (a) How peopo feel wen we show dem love? (b) In Smart Guys 19:17, wat Jehovah say he going do wen we show peopo love?

¹¹ Wen we treat odda peopo good an show dem love, dey see dat we trying fo copy da way Jehovah tink an ack. An dey might be moa tankful den we eva going know. You know Khanh, da sistah we wen talk about earlia? She wen rememba all da ones dat wen go help her out. She wen say, “I so tankful fo all da sistahs dat wen take me out in service. Dey wen pick me up, go grind wit me, an even take me home fo make shua I was safe. I know dat was plenny work fo dem but dey was happy fo do um. I wish I could pay dem back but I donno know wea dey live. But Jehovah know, an I pray dat he going pay um back.” Not erybody going be tankful an tell us mahalo fo da stuff we do. But Jehovah see even da small tings we do fo odda peopo an he going pay us back wit good stuff.—Read um Smart Guys 19:17.

12. How braddahs show dea love fo da local hui? (Go look da pichas.)

 ¹² If you stay one braddah, wat kine tings you can do fo show love to odda peopo an help dem out? One younga braddah name Jordan wen ask one elda wat moa he can do fo help out in da local hui. Da elda wen tell um dat he doing real good, an den wen give him advice about how fo do even moa. Like maybe he can come early to da meetings fo tell da braddahs an sistahs howzit, he can comment moa, go service ery week wit his group, an look fo odda good ways fo help dem. Wen Jordan wen lissen an do all dis, he had learn plenny new tings. But not ony dat, his love fo his braddahs an sistahs wen come moa strong. He learn dat wen one braddah come one helpa guy fo da local hui, dass not wen you start fo help odda peopo, you awready stay helping peopo an going keep on helping dem.​—1 Tim 3:8-10, 13.

13. How love wen kokua one braddah name Christian fo come one elda again?

¹³ If you was one elda o helpa guy in da local hui befoa, Jehovah no foget dat da work you wen do befoa, wuz cuz of yoa love an aloha. (1 Cor 15:58) An he still see da love dat you showing. Fo one braddah name Christian, was real hard fo him wen dey wen remove him az one elda. He wen say, “I wen figga dat no matta if I was one elda o not, I going serve Jehovah outa love da bes I can.” Layta on he wen come one elda again. Christian wen say, “I was small kine nerjus fo come one elda one moa  time. But I wen tink if Jehovah like me do um, I going cuz I love him an my braddahs an sistahs.”

14. Wat you wen learn from wat one sistah wen say?

¹⁴ Jehovah’s peopo show love fo oddas too. (Mat 22:37-39) Like Elena, one sistah who live in da country of Georgia, she wen say, “At firs da ony ting dat wen make me like preach was cuz I wen love Jehovah. Da moa I wen love Jehovah, da moa I wen love peopo too. I wen try tink wat kine pilikia dey was going thru an wat dey wanted fo talk about. Da moa I wen tink about dem, da moa I wanted fo help dem.”​—Rome 10:13-15.

15-16. Jalike we see in da pichas, wat good tings happen wen we show love to oddas?

¹⁵ Wen we show love fo oua braddahs, is good fo oddas too. Afta COVID-19 wen start one braddah name Paolo an his wife wen help plenny of da olda sistahs learn how fo preach using dea phones, tablets, o computas. One sistah who had hard time fo use her electronics was finally able fo do um. She wen use um fo invite her ohana to da Meeting Fo Rememba Wen Jesus Had Mahke, an sixty of dem wen log in fo join um! Wat Paolo an his wife wen do not ony was good fo dis sistah, but was  good fo her ohana too. Layta, da sistah had write Paolo, “Mahalo fo teaching us kupunas. I neva going foget how much Jehovah kea about us an how hard you wen work fo help us.”

¹⁶ Tings lidis wen teach Paolo someting supa importan. It was one good reminda dat you can have skills an know plenny stuff, but love is moa importan den all dat. He wen say, “I used to be one circuit ovaseah, but I wen see dat even if not all da braddahs an sistahs wen rememba my talks, dey still rememba all da stuff I wen do fo help dem.”

17. Wen we show love, who else is good fo?

¹⁷ Wen we show love fo odda peopo, can be good fo us in ways we no even expeck. Jonathan who live New Zealand is proof of dat. One Saturday aftanoon wen was real hot, he wen see on pionea braddah preaching on da road by himself. Jonathan wen go work wit da pionea braddah on da Saturday aftanoons afta dat. He wen tink he was jus helping his braddah out, but neva know was going be good fo him too. Jonathan wen say, “Dat time in my life I neva love field service. But I wen see how da braddah wen teach an da good tings dat wen happen in field service, dass wen I wen start fo love doing um. On top of dat I wen get one good fren who wen help me fo grow up spiritually, fo have good fun in field service, an fo come moa close to Jehovah.”

18. Wat Jehovah like us do?

¹⁸ Jehovah like all us grow in oua love fo him an odda peopo. We wen learn dat we can make oua love fo Jehovah moa strong if we read da Bible, tink hard about um, an pray to him all da time. Oua love fo oua braddahs an sistahs can grow if we do tings fo help dem. Wen oua love come stronga, we going come moa close to Jehovah an to oua spiritual ohana. An we going be good frenz wit dem foeva!