1. Why you tankful wen peopo patient?

 ERYBODY like peopo dass patient. We respeck da guys who no get all futless wen dey gotta wait fo someting. Wen we mess up, we happy wen oddas patient wit us. Wen we was learning da Bible an we had hard time undastand someting, believing um, o even doing um, we tankful dat oua Bible teacha was patient wit us. But moa den anyting, we tankful dat Jehovah is patient wit us!—Rome 2:4.

2. Wen might be hard fo be patient?

² Even tho we like um wen odda peopo is patient, sometimes az hard fo us be lidat. Fo exampo, can be hard fo no get nutz wen we stuck in traffic, an moa worse wen we stay late. Wen peopo irritate us az easy fo lose um. An can be hard fo hang in dea an wait fo Jehovah’s new world fo come. You like be moa patient? In dis lesson, we going go ova wat it mean fo be patient an how come dass importan. An we going talk about wat going help us fo come moa patient.

3. Wat one patient person do wen somebody try make um mad?

³ We go look four ways us can show we patient. Numba one, somebody who patient is slow fo get mad. Wen peopo do stuff fo try make dem mad o dey get plenny  stress, dey going try hold back an keep one cool head. Da words “slow fo get mad” firs pop up in da Bible wea Jehovah tell about himself, “I one God dat get pity fo peopo, an I like do good tings fo peopo! I slow fo get mad. I stay tight wit my peopo plenny, an I do wat I tell I goin do erytime.”—Egypt 34:6.

4. How one patient person ack wen he gotta wait?

⁴ Numba two, one patient person going stay calm wen he wait. If someting taking long time, he going try real hard fo no get all futless. (Mat 18:26, 27) Get plenny diffren times wea we gotta stay calm wen we wait. Like wen somebody stay talking, we gotta lissen good an no cut dem off. (Job 36:2) We gotta be patient wen we helping one learna fo undastand someting in da Bible o helping dem fo stop doing someting dass no good.

5. Wass anodda way fo show we patient?

⁵ Numba three, one patient person tink befoa he ack. Yah going have some times gotta ack fas. But wen one patient guy get someting importan fo do, he not going rush fo start um o rush fo be pau wit um. Instead, he make shua he get nuff time fo plan out wat he going do so dat wen he do um he can finish um.

6. How one patient person ack wen dey get hard time?

⁶ Numba four, one patient person try fo hang in dea witout grumbling. Dass why being patient stay conneckted to hanging in dea. Notting wrong wit telling oua good fren how we really feel wen we go thru someting. But somebody who stay patient going hang in dea an tink about all da good stuff in dea life. (Col 1:11) Jehovah’s peopo gotta  show dey patient in all dese ways. We go look how come.

7. From James 5:7, 8 why us gotta be patient? (Go look da picha.)

⁷ We gotta be patient if we like live foeva an get da real kine life. We gotta be like God’s peopo from befoa who was patient an wen wait fo his promises come true. (Heb 6:11, 12) Da Bible tell we jalike one farma. (Read um From James 5:7, 8.) He work hard fo plant an watta his crops but he donno when going grow. So he jus wait cuz he know da ting going grow. Same ting, we stay busy an work hard fo follow Jesus even tho we “donno . . . wen yoa Boss going come back.” (Mat 24:42) We wait an be patient cuz we know fo shua Jehovah going make all his promises come true wen da time stay right. If we not patient, maybe we going come tired of waiting an start fo drift away from Jehovah. Anodda ting dat could happen is we could start fo go afta tings dat ony going make us happy now. But if we patient, we can hang in dea til all dis pau an get save.—Mic 7:7; Mat 24:13.

8. If we patient, how dat going help us deal wit oddas? (Fo Da Colosse Peopo 3:12, 13, NWT)

⁸ We no can have good relationships wit oddas if we not patient. Going help us fo lissen good wen somebody stay talking. (Jam 1:19) Can even help us have peace wit odda peopo. If we patient, even if we get stess we not going snap an say someting mean to somebody. An going even help us fo no get mad fas wen somebody hurt us. Instead of getting dem back, we going “let um go an no stay huhu wit dem.”—Read um Fo Da Colosse Peopo 3:12, 13, NWT.

9. Wen we patient, how dat going help us fo make good choices? (Smart Guys 21:5)

⁹ If we patient, dat going help us make good choices. Instead of jus acking fas an doing um witout tinking, we going take time fo learn about um an tink about um plenny. (Read um Smart Guys 21:5.) Like if we looking fo one job, we might tink we gotta take da firs offer we get, even if da job going get in da way of us going meeting o field service. But if we patient we going take time fo tink about wea da job stay, how much hours we gotta work, an how da ting going affeck oua ohana an oua frenship wit Jehovah. If we patient, dat going stop us from making one bad choice.

10. How one Christian come moa patient an stay lidat?

¹⁰ Pray fo be moa patient. Being patient is part of da fruit of God’s spesho spirit. (Gal 5:22, 23, NWT) So we can pray fo da spesho spirit an ask Jehovah fo help us get da fruit of dat spirit. Den if we going thru someting dat make um hard fo us be patient, we “go aks” fo spesho spirit fo help us. (Luk 11:9, 13) We can even ask Jehovah fo help us see tings da way he see um. Den afta we pau pray, we try oua bes fo be patient eryday. Da moa we pray about um an try oua bes fo be lidat, da moa Jehovah going help us fo be patient.

11-12. How Jehovah wen show he patient?

 ¹¹ Tink hard about da exampos inside da Bible. Da Bible get plenny exampos of guys dat was patient. By tinking hard about dem, we can learn fo be moa patient like dey was. But befoa we talk about dose guys, we go look Jehovah, cuz he show us da bes way fo be patient.

¹² Inside Eden, Satan wen bulai an bad mout Jehovah an say dat He no was fair an loving az one Rula. Instead of smashing Satan right dea, Jehovah was patient an wen hold back cuz he wen know would take time fo prove dat his way fo do tings is da bes. Da whole time he waiting, he gotta deal wit all da bulais an attacks on his name. On top of dat, Jehovah is so patient cuz he like plenny peopo get chance fo live foeva. (2 Pet 3:9, 15) An cuz of dat, uku pile a peopo wen get fo know him. If we tink about all da good dat wen happen cuz Jehovah patient, going be moa easy fo us wait fo da end come.

13. How Jesus patient jalike his Faddah? (Go look da picha.)

¹³ Wen Jesus was on earth he wen copy his Faddah perfeck an was patient. Probly no was easy fo him be patient, speshly to da fake Jew leadas. (John 8:25-27) Jus like his Faddah, he was slow fo get mad. Wen dey wen try make him mad an make anykine to him, he neva try get um back. (1 Pet 2:23) Wen he had hard time, Jesus was patient an neva grumbo. Dass how come da Bible tell us fo “tink plenny bout Jesus! How he wen hang in dea an no give up wen all  kine bad stuff from all da bad peopo go agains him”! (Heb 12:2, 3, NWT) Wit Jehovah’s help, we can be patient an get thru anyting we gotta hando.

14. How us can learn from how Abraham was patient? (Fo Da Hebrew Peopo 6:15) (Go look da picha.)

¹⁴ Maybe some of us was tinking dat da end was going come long time ago. But now we stay worry dat we might mahke befoa da end come. Wat can help us fo be patient an wait? Try tink about Abraham. Wen Abraham was one 75 year ol man an neva have one kid, Jehovah wen promise him, “Da peopo dat goin come from you, bumbye I goin make dem come one big, importan nation.” (Start 12:1-4) Abraham wen get fo see dat happen? Ony small kine. Afta he wen cross da Euphrates Riva, he had fo wait 25 years fo see da unreal birth of his boy, Isaac, an den anodda 60 years fo his grankids, Esau an Jacob, fo be born. (Read um Fo Da Hebrew Peopo 6:15.) But Abraham neva did get fo see his ohana come one big, importan nation an live in da Promise Land. But he was good frenz wit Jehovah. (Jam 2:23) Wen Abraham come back alive, he going be so happy fo find out dat cuz he was patient an had plenny faith, good tings wen happen to da peopo all ova da world! (Start 22:18, NWT) So wat we learn from dis? Maybe we not going see eryting Jehovah promise come true right now. But if we patient like Abraham, we know garans Jehovah going take kea us right now, an  even moa in da new world.—Mar 10:29, 30.

15. Wat some stuff we can study about by ouaself?

¹⁵ Da Bible get plenny odda exampos of peopo who was patient. (Jam 5:10) Go study about um so you can learn moa. b Like David, he was ony young wen he was pick fo be King of Israel, but he had fo wait long time befoa he had come king. Simeon an Anna wen stay faithful da whole time dey was waiting fo da Messiah. (Luk 2:25, 36-38) While you stay study about dese kine guys, try tink about dis, Wat wen help dem fo be patient? How wen turn out good fo dem cuz dey was patient? How I can copy dem? Can even learn someting from da guys who no was patient. (1 Sam 13:8-14) Try tink, How come dey wen ack lidat? An wat bad kine stuff wen happen cuz dey no was patient?

16. Wat good kine tings happen wen we patient?

¹⁶ Tink about da good tings dat happen cuz we patient. Wen we patient, we moa happy an we moa calm. Can even be good fo da mind an da body. Wen we patient wit odda peopo, can be betta frenz wit dem. Oua local hui come moa tight. If somebody ack up to us, we going be slow fo get mad an stop da problem from getting moa worse. (Songs 37:8; Smart Guys 14:29) Moa den anyting else, wen we patient, we copy oua Faddah in da heaven an come moa close to him.

17. Wat we gotta make up oua mind fo do?

¹⁷ See how good fo be patient! So even if sometime hard fo be patient, Jehovah can help us keep trying fo show um. Az we be patient an wait fo da new world, we no garans Jehovah “watch da peopo dat get respeck fo him, da ones dat stay wait.” (Songs 33:18) So all us guys gotta keep trying fo be patient.