In dat lesson, we wen learn dat ony get one big issue dat affeck all humans an angels, dass making Jehovah’s name spesho. One part of da big issue is sovereignty, dat mean Jehovah’s way of doing tings is da bes. Anodda part of da big issue is wedda o not humans going lissen to wat God tell.

Wen come to da big issue, how come now we focus on eryting being about Jehovah’s name an making um spesho. We go look three reasons.

Numba one, inside Eden, Satan wen attack Jehovah’s name, o rep. Satan was sly, he wen go ask one question fo make like Jehovah was stingy an made um hard fo his guys lissen wat he tell. Satan wen say da opposite of wat Jehovah wen say, calling him one bulaia. So he wen tell bulais about Jehovah’s name fo damage his rep. Right dea he wen come “da Devil”, dat mean “bulaia”. (John 8:44) Cuz Eve wen believe Satan, she neva lissen God an wen show dat she neva like God be her rula. (Start 3:1-6) Still yet Satan telling bulais about God’s name an wat kine God him. Da guys who believe dose lies probly not going lissen Jehovah. So to God’s peopo, da bulais about Jehovah’s name being spesho, no can get moa worse den dat. Dass da main reason get plenny suffaring an pilau kine tings inside da world.

Numba two, going be good fo all peopo an da angels wen Jehovah going clear his name of all da bulais. Dass da mos importan ting to Jehovah. Dass how come he tell, “I going make erybody know my spesho name.” (Eze 36:23, NWT) An Jesus wen make um clear dat da mos importan ting all us should pray fo is dat “peopo get plenny respeck fo yoa name.” (Mat 6:9, NWT) Ova an ova again da Bible tell how importan it is fo make Jehovah’s name spesho. Try look some of um. “Give Jehovah da respeck his name suppose to get.” (1 Rec 16:29, NWT; Songs 96:8, NWT) “Play music fo his spesho name.” (Songs 66:2, NWT) “I going tell how spesho yoa name stay foeva.” (Songs 86:12, NWT) One time Jesus wen pray to Jehovah at da temple in Jerusalem, “Faddah, make yoa name spesho.” Jehovah himself wen ansa from heaven, “I wen make um spesho awready an going do um again.”—John 12:​28, NWT. a

Numba three, wat Jehovah like happen always stay conneckted to his name, o rep. Try tink, Wat going happen afta da las tes dat going come wen Jesus Tousand Year Reign pau? How all da peopo an angels going feel about Jehovah’s name  dat time? Fo help us get da ansa, try rememba da two parts of da big issue—wedda o not peopo going lissen to Jehovah, an dat his way of doing tings is da bes. Dat time, humans no need prove dat dey loyal to Jehovah anymoa. Dey going get fo live foeva. An no going have to prove dat Jehovah’s way of doing tings is bes cuz eryting in heaven an on earth going all agree fo let Jehovah be dea rula. But Jehovah’s name still going be da mos importan ting to his peopo?

Dat time, erybody going know Jehovah’s name is spesho, an clear of all da bulais. But Jehovah’s name going still be da mos importan ting fo all da guys who serve Him in heaven an on da earth. Cuz dey going see Jehovah do awesome kine tings. Try tink, Jesus going be humbo an hand tings ova to Jehovah so dat He going come “eryting, fo erybody”. (1 Cor 15:28) Afta dat, all da peopo on earth going live good cuz “eyting God make goin come awesome.” (Rome 8:21) Den Jehovah going bring togedda his kids in heaven an on earth fo be one ohana jalike he wen plan from da start.—Efe 1:10.

Afta all dis happen, how Jehovah’s ohana in heaven an on earth going feel? Pretty much garans we still yet going really like tell how awesome Jehovah’s name stay. Da song writa David wen write, “I like erybody tell good tings bout God . . . all da time.” (Songs 72:18, 19) We going keep finding new reasons fo do dat foeva.

Jehovah’s name rep eryting about him. Wen we tink about his name, we tink about da love an aloha he get. (1 From John 4:⁠8) We going rememba dat Jehovah wen make us cuz he love us, dat he wen give his boy’s life cuz he love us, an he wen show dat how he rule is pono cuz he love us. But we going feel Jehovah’s love fo us foeva. Dat going make us come moa tight wit oua Faddah an tell about his awesome name.—Songs 73:28.