1-2. (a) How Jehovah feel about guys dat choose fo sin? (b) Wat Jehovah like sinners do?

 JEHOVAH no like wen peopo ack anykine, an he hate sin. (Songs 5:4-6) Jehovah expeck us fo lissen an do wat he tell in da Bible. Jehovah no expeck us fo do tings perfeck cuz we not. (Songs 130:3, 4) Same time, Jehovah no put up wit guys dat “ack jalike God no matta. Dey take all da good tings oua God stay do, an try change all dat fo dem go buckaloose an make any kine how dey like.” (Jude 4) Da Bible tell at Armageddon, God goin be da judge an “wipe out da peopo dat ack jalike God notting.”.​—2 Pet 3:7; Jesus Show 16:16.

² But Jehovah no like nobody get wipe out. In dis magazine, we wen learn dat da Bible tell Jehovah “like erybody fo come sorry an no do all da bad kine stuff no moa.” (2 Pet 3:9) Like Jehovah, da eldas stay patient wen dey try help one sinner fo come sorry an come close to Jehovah again. But sometimes one sinner no like come sorry. (Isa 6:9) Some guys keep doin wat stay wrong, even tho plenny times da eldas wen try fo help dem come sorry. Wat da eldas gotta do if dis happen?

 HEMO DA SINNER

3. (a) Wat da Bible tell gotta do wit sinners dat no come sorry an change? (b) How come we can say dat da sinner wen choose fo be hemo from da hui?

³ Wen one sinner no stay sorry fo wat dey wen do, da eldas no moa choice but fo follow da direction at 1 Fo Da Corint Peopo 5:13, “Da guy dat tell he stay tight wit God, but still yet do real bad kine stuff, throw out da buggah!” Da sinner kno dat if he no come sorry an change, he goin get hemo from da hui. So in a way he a wen choose fo hemo himself from da hui. (Gal 6:7) How come we can say dat? Cuz da sinner neva like change, even tho da eldas wen try fo help um plenny times. (2 Ki 17:12-15) Da tings he wen do, show he no like lissen wat Jehovah tell.​—Rules 30:19, 20.

4. How come get one announcement wen somebody who no come sorry fo wat dey wen do get hemo from da hui?

⁴ Wen somebody who no come sorry fo wat dey wen do get hemo from da hui, get one announcement fo let da local hui kno he no stay one Witness Fo Jehovah no moa. b Da announcement iz not fo make da person feel shame. Radda, dass so da hui can follow wat da Bible tell fo “no hang aroun” dat person an “no even eat wit um!” (1 Cor 5:9-11) Get good reasons why Jehovah tell us fo do dat. Da aposal Paul tell, “litto bit yeast inside da bread dough can make da whole ting come big.” (1 Cor 5:6) If somebody who no repent no get hemo from da hui, oddas too can start fo tink dey no need lissen wat Jehovah tell.​—Smart Guys 13:20; 1 Cor 15:33.

5. How we should feel about somebody who wen get hemo from da hui, an how come?

⁵ Wen one braddah o sistah get hemo from da hui, how we should feel about dem? Even tho we not goin talk story o hang out wit dem, we gotta rememba dey one los sheep, not one los cause. One sheep dat had bag, can still come back. No foget, dat person wen give his life to Jehovah. Sad fo say, right now he no stay keeping da promise he wen make to Jehovah, an dat put him in danger. (Eze 18:31) But az long az Jehovah like show mercy, get hope dat da person can come back. So how da eldas can help somebody dat wen get hemo from da hui?

HOW ELDAS HELP DA ONES DAT GET HEMO FROM DA HUI

6. Wat da eldas goin do fo help somebody dat had get hemo from da hui?

⁶ Wen somebody get hemo from da hui, da eldas stop trying fo help him come back to Jehovah, o wat? No ways! Wen eldas tell somebody he goin get hemo from da hui, dey goin tell um too wat he gotta do fo come back to da hui. But da eldas goin do moa den dat. Mos times, dey goin tell da sinner dat dey like meet wit him again afta some monts wen go by fo see if his heart wen change. If afta some monts go by an da person like meet wit da eldas again, da eldas goin try help him fo come sorry an come back to Jehovah. Even if he neva come sorry dat time, da eldas goin try fo meet  wit him bumbye an try help him come sorry an change.

7. How da eldas copy how Jehovah feel about da guys who wen get hemo from da hui? (Jeremiah 3:12)

⁷ Da eldas try copy how Jehovah feel about da guys who wen get hemo from da hui. Fo exampo, befoa time, Jehovah neva wait fo da Israel peopo come sorry befoa he wen help dem. But he wen try fo help dem befoa dey wen come sorry an change. Da second lesson in dis magazine had show us how Jehovah wen tell Hosea fo fogive his wife, who wuz sinning still yet. Dass how Jehovah wen teach his peopo he feel plenny fo dem. (Hos 3:1; Mal 3:7) Like Jehovah, da eldas really like da sinner come back an dey no make um hard fo him do dat.​—Read um Jeremiah 3:12.

8. How da story Jesus wen tell about da los boy help us undastan moa betta how Jehovah feel about guys dat wen bag from Him? (Luke 15:7)

⁸ Tink about Jesus story of da los boy dat we wen talk about in da second lesson of dis magazine. Wen da faddah had see his boy coming back home, he wen “run to his boy. He hug his boy an kiss him.” (Luk 15:20) See how da faddah neva wait fo his boy beg him fo fogive um. But da faddah wen make da firs move, jus like any odda faddah who love his kid. Dass how Jehovah feel about da guys who wen bag from him, an da eldas do eryting dey can fo copy Jehovah. Dey like da los sheep fo “come back.” (Luk 15:22-24, 32) Jehovah, Jesus, da angels, an da whole hui stay supa happy wen one sinner come back!​—Read um Luke 15:7.

9. Wat Jehovah like sinners do?

⁹ From wat we wen learn so far, az clea fo see dat Jehovah no let guys dat no come sorry fo da bad tings dey do, stay in da hui. But dat no mean he turn his back on dem. He like dem fo come back. An wen peopo come sorry fo wat dey wen do, Jehovah tell how He feels about dem in Hosea 14:4, “I goin make dem come good, no matta dey wen tell ‘Laytas’ to me. I goin show plenny love an aloha fo dem cuz I no stay huhu wit dem no moa.” Cuz da eldas kno how Jehovah feel, dey look fo any changes dat show dey start fo come sorry. An wat Hosea tell, stay good fo anybody dat wen leave Jehovah fo kno fo shua He love dem an He like dem come back.

10-11. How da eldas goin try help da guys dat awready stay hemo from da hui?

¹⁰ Wat about guys who awready stay hemo from da hui, even ones from long time ago? Maybe dey wen stop doin da ting dat wen get dem hemo from da hui. Sometimes dey no even rememba how come dey wen get hemo from da hui. No matta how long dey been gone from da hui, da eldas goin try find an den go visit dem. Wen da eldas visit dem, dey even ask fo pray wit dem an show dem plenny love fo help dem come back to da hui. Somebody dat wuz gone from da hui fo plenny years gotta get fo kno Jehovah an Bible trut again. An if he like come back to da hui, da eldas can set up somebody fo study da Bible wit him even tho he not reinstated yet. Erytime dis happen, iz da eldas kuleana fo  choose one braddah o sistah fo study wit dem.

¹¹ Eldas try copy Jehovah’s love fo peopo. So da eldas goin look fo all da guys dat wen leave Jehovah an try help dem fo come back to him. Wen da sinner show he sorry an stop doin bad kine tings, den he can get reinstated right away.​—2 Cor 2:6-8.

12. (a) Wen da eldas gotta be real keaful? (b) How come we no should feel like some sinners neva goin get Jehovah’s mercy? (Go look da extra info.)

¹² Sometimes da eldas gotta be real keaful befoa dey reinstate somebody. Like, if somebody wuz guilty of child abuse, apostasy, o dey wen set tings up fo end one marriage, da eldas gotta make shua dat dey stay fo real kine  sorry an wen change. (Mal 2:14; 2 Tim 3:6) Da eldas gotta proteck da braddahs an sistahs in da local hui. But we gotta undastan dat Jehovah goin take back any sinner dat wen come fo real kine sorry an wen stop doin bad kine stuff. Even tho da eldas like make shua dat guys who wen do real bad tings to oddas stay sorry, dey no should tink dat Jehovah neva goin show dem mercy. c​—1 Pet 2:10.

WAT DA LOCAL HUI CAN DO

13. How da way we treat somebody dat wen get correckted by da eldas stay diffren from somebody dat wen get hemo from da local hui?

¹³ Like we wen talk about in da las lesson, sometimes get one announcement dat somebody wen get correckted. We can still yet talk story an hang out wit him cuz we kno he wen come sorry an stop doin bad kine stuff. (1 Tim 5:20) He still stay paht of da local hui an he goin need good kine words an help from his braddahs an sistahs fo keep doin wass right. (Heb 10:24, 25) But az not da same if somebody get hemo from da local hui. We not goin “hang aroun” dat kine guy, an we “no even eat wit um!”​—1 Cor 5:11.

14. How one Christian can use wat dey wen learn from da Bible fo deal wit somebody who stay hemo from da hui? (Go look da picha.)

¹⁴ If we do wat tell at 1 Fo Da Corint Peopo 5:11, dat mean we no can invite somebody dat wen get hemo from da hui to one meeting, o say hi to dem if dey come meeting? No. Fo shua, we not goin talk story an cruz wit him. But Christians can use wat dey wen learn from da Bible fo choose fo invite to da meetings somebody who wen get hemo from da hui, maybe dey stay paht of oua ohana o wuz oua close fren befoa. Wat if dey come meeting? Back den, we no would say hi to dem. But dis anodda time dat ery Christian gotta use wat he wen learn from da Bible fo choose wat dey goin do. Some guys might feel okay  fo say hi to dem wen dey come meeting. But we no like talk story wit dem long time o spen time wit dem doin odda stuff.

15. Wat kine sinners 2 John 9-11 stay talking about? (Go look da box “ Wuz John An Paul Talking About Da Same Kine Sin?”)

¹⁵ Some guys might tink, “I thought da Bible tell dat if you say aloha to one sinner, dat mean you do da same kine bad stuff az him.” (Read um 2 John 9-11.) But da scripchas befoa an afta 2 John 9-11 shows dat dis is fo somebody who iz one apostate o somebody dat try fo make oddas do wat da Bible tell iz bad. (Jesus Show 2:20) If somebody keep pushing apostate teachings or odda bad kine stuff, da eldas not goin set up fo meet wit him. Still yet, get hope dat dey goin come sorry an change. But til dat happen, we not goin say hi to dat kine person o invite dem to one meeting wit da local hui.

COPY JEHOVAH’S PITY AN MERCY

16-17. (a) Wat Jehovah like sinners fo do? (Ezekiel 18:32) (b) How da eldas work wit Jehovah?

¹⁶ Wat we wen learn in dis magazine? Jehovah no like cut off anybody. (Read um Ezekiel 18:32.) He like sinners fo come back an make tings pono wit him! (2 Cor 5:20) Dass why Jehovah always tell peopo who wen bag from him fo come sorry an come back to him. Da eldas in da local hui work wit Jehovah fo help dose who wen sin real bad fo come sorry.​—Rome 2:4; 1 Cor 3:9.

¹⁷ Jehovah, Jesus, an da angels stay so happy wen sinners come sorry! Oua faddah in heaven, Jehovah, feel real happy ery time wen one of his los sheep come back to da hui. Oua love fo Jehovah goin keep growing wen we tink plenny about how he show pity, mercy, an his free gif of love to us.​—Luk 1:78.