STUDY LESSON 34
SONG 107 Jah’s Way is Love
How Eldas Can Be Kind An Show Love To Guys Who Sin
“God get plenny good heart fo you . . . he like you come sorry an no do da bad kine stuff no moa.”—ROME 2:4.
MAIN TING WE GOIN LEARN
How da eldas try help da guys in da hui who wen sin real bad.
1. Wat can happen afta somebody sin real bad?
IN DA las lesson, we wen see wat da aposal Paul wen tell da hui in Corint fo do wen one guy wen sin real bad. Da guy no wuz sorry an wen get hemo from da hui. But like da main scripcha show, God can help somebody fo come sorry. (Rome 2:4) How Jehovah use da eldas fo help somebody come sorry?
2-3. Wat we gotta do if we find out dat oua braddah or sistah wen sin real bad, an how come?
2 Befoa da eldas can help, dey gotta kno about wass goin on. If we find out somebody wen do someting real bad, wat we should do? Firs we should try get dem fo go to da eldas fo help.—Isa 1:18; Jesus Guys 20:28; 1 Pet 5:2.
3 But wat if dey no like talk to da eldas? Den we would go to da eldas fo make shua dey get da help dey need. Wen we do dat, we show we love oua braddah or sistah cuz dey goin get da help dey need. If da person no change, he goin hurt his frenship wit Jehovah even moa. He can even give da local hui one bad rep. So even tho can be real hard, we like go to da eldas cuz we love Jehovah an oua braddah or sistah.—Songs 27:14.
HOW DA ELDAS HELP DA GUYS DAT SIN REAL BAD
4. Wass da eldas goal wen dey meet wit somebody who wen sin real bad?
4 Wen somebody in da local hui sin real bad, da body of eldas goin choose three eldas from dem fo make one committee. a Dese braddahs gotta kno dea limits an be humbo. Wen dey try help somebody fo come sorry, dey kno dat dey no can force somebody fo change. (Rules 30:19) Da eldas undastan dat not erybody goin be like King David an come sorry fo wat dey wen do. (2 Sam 12:13) Some guys might choose fo no lissen wen Jehovah try help dem. (Start 4:6-8) Still yet, da eldas goal iz fo try dea bes fo help da person come sorry fo wat dey wen do. Wat da eldas gotta rememba wen dey meet wit somebody dat wen sin?
5. Wat da eldas gotta rememba wen dey meet wit da guy who sin? (2 Fo Timoty 2:24-26, NWT.) (Go look da picha.)
5 Da eldas view da guy who wen sin like one sheep dat stay los but still matta plenny to Jehovah. (Luk 15:4, 6) Wen da eldas meet wit somebody, dey not goin be mean or talk ruff to dem. Da eldas no tink dey gotta do da same ting erytime an jus ask questions an get all da facts. Radda, dey goin show da qualities dat stay inside 2 Fo Timoty 2:24-26, NWT. (Read um.) Da eldas gotta be gentle, humbo, an kind cuz dey like help dem change da way dey tink.
Jus like sheep guys from long time ago, da eldas do eryting dey can fo find one los sheep (Go look numba 5)
6. How da eldas can get Jehovah’s tinking befoa dey meet wit da guy who wen sin? (Fo Da Rome Peopo 2:4)
6 Da eldas take da time fo get Jehovah’s tinking. Dey rememba wat Paul wen tell, “God get plenny good heart fo you . . . he like you come sorry an no do da bad kine stuff no moa.” (Read um Fo Da Rome Peopo 2:4.) So dey try copy da way Jehovah treat guys who sin. Eldas gotta rememba dat dea main job iz fo copy Jesus an take kea da sheep. (Isa 11:3, 4; Mat 18:18-20) Befoa da committee meet wit da person, dey pray fo rememba dea goal, fo help da guy come sorry. Dey goin look good in da Scripchas an da publications an pray fo undastan da person an da situation. Dey goin try tink about how da person wuz raise an dea backgroun dat maybe wen affeck how dey wen tink an ack.—Smart Guys 20:5.
7-8. How eldas can copy how Jehovah stay patient wen dey meet somebody who wen sin mayjah kine?
7 Da eldas copy how Jehovah iz patient. Dey rememba how Jehovah help da guys who sin in da pas. Like how Jehovah wuz patient wit Cain, he wen warn um wat wuz goin happen if he neva change an dat He would bless um if he wen lissen. (Start 4:6, 7) Jehovah wen sen Nathan da prophet fo go counsel David, an Nathan wen use one word picha fo help David come sorry. (2 Sam 12:1-7) An fo da Israel peopo dat neva lissen, Jehovah “ery day, ova an ova,” wen sen his worka guys. (Jer 7:24, 25) He neva wait fo his peopo come sorry befoa he wen try help dem. But he wen take da firs step fo help dem come sorry.
8 Eldas copy Jehovah’s exampo wen dey try fo help da guys who wen sin mayjah kine. Like 2 Fo Timoty 4:2 tell, wen you helping somebody who stay in trouble, “you gotta stay tight wit dem guys fo long time.” So if one elda like help somebody who wen get in trouble fo do wass right, he gotta be calm an patient. If one elda come all irritated an come all nutz, da person probly not goin lissen or come sorry.
9-10. How eldas can help da person tink about da choices dat wen cause him fo sin?
9 Da eldas try fo figga out wat wen lead up to da sin. He wen stop studying all da time or stop goin out in field service? He wen stop praying all da time? He had stop trying fo fight da wrong tings he like do? He watching bad kine stuff or hanging wit da wrong peopo? How his choices wen affeck how he tink an how he feel? He undastan how his Faddah, Jehovah feel about wat he wen do?
10 Da eldas can ask da person questions fo help dem tink about da tings dat wen make his relationship wit Jehovah weak or wen cause him fo sin. Dey do um in one kind way an dey no ask questions about tings dey no need fo kno. (Smart Guys 20:5) On top of dat da eldas can use word pichas fo help da person tink about da stuff he wen do an how come wuz wrong, jalike how Nathan wen do wit David. Maybe at da firs meeting, da person goin start fo feel real bad fo da tings he wen do. Maybe he goin even come fo real kine sorry.
11. How Jesus wen deal wit sinners?
11 Da eldas try fo copy Jesus. Jesus wen help Saul from Tarsus by asking him dis question, “Saul, Saul, how come you make me suffa?” Wit dis question Jesus wen help Saul fo see wat he was doin wuz wrong. (Jesus Guys 9:3-6) An wen talking about Jezebel, Jesus wen tell, “I wen give dat wahine plenny chance awready fo come sorry.”—Jesus Show 2:20, 21.
12-13. How da eldas can give da guy who wen sin, time fo come sorry? (Go look da picha.)
12 Jus like Jesus, da eldas not goin be fas fo tink dat da person not goin be sorry. Some guys might feel sorry da firs time dey meet wit da committee, but oddas might need moa time. So da eldas might plan fo meet wit da person moa den one time. Maybe afta da person who wen sin goin tink hard about wat da eldas wen tell um. He might show dat he humbo an ask Jehovah fo fogive him fo da wrong ting he wen do. (Songs 32:5; 38:18) Maybe at da nex meeting da guy who wen do someting wrong goin have one diffren attitude den befoa.
13 Fo help da guy who wen sin come sorry, da eldas goin show dey feel fo him an goin be kind. Dey pray to Jehovah fo bless wat dey doin an dey hope da braddah wake up an see wat he doin iz wrong an come sorry.—2 Tim 2:25, 26, NWT.
Da eldas can meet wit one sinner moa den one time fo give him chance fo come sorry (Go look numba 12)
14. Who should get da credit wen one sinner come sorry, an how come?
14 We so happy wen da guy who sin come sorry! (Luk 15:7, 10) Who should get da credit? Da eldas? Rememba wat Paul had write about da sinners, “Maybe God going make dem change dea mind.” (2 Tim 2:25, NWT.) So Jehovah iz da one, not any odda person, dat help somebody change da way dey tink an ack. Paul talk about da good tings dat happen afta somebody come sorry. He goin undastan da trut moa betta, he goin wake up an come smart again, an get outa Satan’s trap he stay in.—2 Tim 2:26.
15. How da eldas keep helping somebody who wen come sorry?
15 Wen somebody come sorry, da eldas goin keep visiting him fo help him make his fait moa strong, keep fighting Satan’s traps, an do wat stay right. (Heb 12:12, 13) Of course, da eldas not goin tell anybody all da stuff da sinner wen do. But wat da local hui might need fo kno?
“CORRECK IN FRONT ERYBODY”
16. From wat 1 Fo Timoty 5:20, NWT tell, who da “erybody” Paul wen talk about?
16 Read um 1 Fo Timoty 5:20, NWT. Paul wen tell Timoty, one odda elda, fo “correck . . . da guys who stay sinning.” Paul wen mean dat da guy who wen sin gotta get correckted in front da whole local hui? Not really. Wen he wen say “erybody,” dat neva always mean da whole local hui. Radda, he wuz talking about da litto bit guys who already wen kno about da sin. Dey coulda seen um happen, or da person maybe wen tell dem wat he wen do. Da eldas would tell ony dese guys dat da sinner wen get correckted.
17. If plenny in da local hui awready kno about da mayjah sin or probly goin find out about um, wat announcement gotta make, an how come?
17 Sometimes in da local hui, plenny guys awready kno about da mayjah sin, or probly goin find out about um. In dat case, den “erybody” would be da whole local hui. So one elda would make one announcement dat da braddah or sistah wen get correckted. How come? Paul wen tell, “fo warn da oddas,” fo dem no sin too.
18. If somebody who baptize dass unda 18 sin mayjah kine, wat da eldas gotta do? (Go look da picha.)
18 Wat da eldas do wen somebody who baptize, dass younga den 18 years old, sin mayjah kine? Da body of eldas goin set um up fo two eldas meet wit da kid an his Christian parents. b Da eldas goin ask da parents wat dey wen do awready fo help dea keiki come sorry an change. If da kid get one good attitude an iz changing da way he tink an ack, da two eldas can decide dat one committee of eldas no need meet wit him an da parents. Da eldas kno dat Jehovah wen give da parents da kuleana fo correck dea kids in one loving way. (Rules 6:6, 7; Smart Guys 6:20; 22:6, NWT; Efe 6:2-4) Ery so often da eldas goin check wit da parents fo make shua da kid getting da help he need. But wat da eldas gotta do if da baptize kid no change da bad stuff he doin? In dat case, one committee of eldas goin meet wit him an his Christian parents.
Wen one kid younga den 18 years old sin mayjah, two eldas goin meet wit dem an dea Christian parents (Go look numba 18)
JEHOVAH “FEEL PITY FO US GUYS, AN GIVE US CHANCE”
19. How eldas try copy Jehovah wen dey meet wit somebody who wen do one mayjah sin?
19 Eldas who stay on committees get one kuleana in front Jehovah fo keep da local hui clean. (1 Cor 5:7) Same time, dey do eryting dey can fo help somebody who sin fo come sorry an change. An wen dey stay helping dat person, dey keep hoping dat person goin change. How come? Cuz dey like copy Jehovah who “feel pity fo us guys, an give us chance.” (Jam 5:11) Da aposal John wen treat his braddahs an sistahs wit love. He wen write, “Eh, my good frenz! I stay write dis stuff to you guys, so you no do bad kine stuff. But wen get somebody dat do bad kine stuff, us get one Guy dat stay talk to da Faddah fo us guys. Dass Jesus Christ, da Spesho Guy God Wen Sen. He erytime stay do da right ting.”—1 John 2:1.
20. Wat we goin talk about in da las lesson?
20 Sad fo say, get times wen one Christian no like come sorry an change. Wen dat happen, he gotta get hemo from da hui. Wat da eldas goin do if dis happen? Dass wat we goin talk about in da las lesson of dis magazine.
SONG 103 Eldas—One Awesome Present From Jehovah
a Befoa, dese groups wuz called judicial committees. But since judging iz ony one paht of dea work, we not goin call dem dis anymoa. Instead, we goin jus call dis group one committee of eldas.
b Wass sed about parents iz da same fo legal guardians or oddas who get da kuleana fo take kea one kid dass younga den 18 years old.
