1-2. Wen one kid ask questions about wat we believe, how da parents should ack?

 PLENNY guys would agree dat bein one parent iz one full time job. If you stay one parent wit one young kid, garanz you stay help him make his fait come strong. (Rules 6:6, 7) Az yoa kid get olda, he might start fo ask questions about wat we believe, an why Jehovah no like us do some tings.

² At firs you might be worried dat yoa kid ask questions cuz he no moa trus in wat he learning. But wen kids come olda, dey gotta ask questions fo dea fait come moa strong. (1 Cor 13:11) So no need be sked. Wen dey ask questions, dass one good time fo help dem fo tink moa deep. Dat goin help dem fo build up dea fait in God an da Bible.

3. Wat we goin talk about in dis lesson?

³ In dis lesson we goin talk about how parents can help dea kids fo (1) make dea fait in God an da Bible moa strong, (2) undastan why iz good fo dem lissen to wat da Bible tell iz right an wrong, an (3) explain to oddas wat dey believe. An we goin see why iz good fo yoa kids ask questions an some tings parents can do wit da family dat can give dem chance fo talk story about wat dey believe.

 HELP YOA KID MAKE DEA FAIT MOA STRONG

4. Wat questions yoa kid might ask, an how come?

⁴ Parents undastan dat jus cuz dey get fait in God, dat no mean dea kid goin have um too. You not born wit fait in Jehovah. Same ting wit yoa kid. Afta a while, one kid might start fo ask questions like, “How I kno get one God? Can believe wat da bible tell o wat?” Da bible say iz good fo try figga tings out an “go check out eryting.” (Rome 12:1; 1 Tess 5:21) So how you can help yoa kid make his fait moa strong?

5. Wat parents can do fo help dea kid trus da Bible? (Fo Da Rome Peopo 12:2)

⁵ Help yoa kid find proof dat wat da Bible tell iz tru. (Read Fo Da Rome Peopo 12:2) Wen yoa kid get questions, use dat time fo show him how fo find ansas using da tools we get fo look up info like da Watch Tower Publications Index an da Research Guide for Jehovah’s Witnesses. In da Research Guide unda da subjeck “Da Bible,” he can look up “Inspired By God” fo find proof dat da Bible iz not jus one good book dat man had write. But it “stay wat God tell.” (1 Tess 2:13) Fo exampo, he could look up info about da old city Ninevah. Befoa, some guys dat kno da Bible real good wen say dat neva have one city called Ninevah. But aroun 1850 dey wen dig up da old city an dat wen prove da Bible wuz right. (Zef 2:13-15) Da article, “Did You Know” in da Novemba 2021 The Watchtower get info about how da Bible prophecy dat Ninevah wuz goin get wipe out had come tru. Teach yoa kids fo match up wat oua publications tell wit odda info you can trus. Dis goin help yoa kid fo make his fait in wat da Bible tell moa strong.

6. How parents can help dea kid see proof dat da Bible stay correck? (Go look da picha.)

⁶ Help yoa kid see proof dat da Bible stay correck. Parents get plenny chances fo talk story wit dea kids about da Bible or about fait in God. Might be wen you go to one museum, park or garden, or even to da Branch Office of Witnesses Fo Jehovah. Fo exampo wen you tour one museum, wedda in person or on da computa, you can show yoa kids how da stuff you looking at stay conneck wit someting in da Bible. Dis can help yoa kid see dat wat da Bible tell iz tru. Maybe you can teach yoa kid about da Moabite Stone. Dis stone stay  3,000 years old an get Jehovah’s name on top. Da original Moabite Stone stay inside da Louvre Museum in Paris, France. Get one copy of da Moabite Stone dat stay at “The Bible and the Divine Name” display at da World Headqwatahs of Witnesses Fo Jehovah at Warwick, New York. Da Moabite Stone show dat King Mesha of Moab wen go agains Israel. Dat match up wit wat da Bible tell. (2 Ki 3:4, 5) Wen yoa kid see wit his own eyes proof dat da Bible stay correck, his fait come moa strong.​—Go check 2 Records 9:6.

7-8. (a) Wat can learn from shapes we see in nature? Give one exampo. (Go look da picha.) (b) Fo help yoa kid get stronga fait in one Creator, wat questions can ask him?

⁷ Help yoa kid tink about da tings Jehovah made. Wen you stay walking in da country or in da garden, try show yoa kids da diffren kine shapes dat stay in nature. Wat fo? Da shapes show proof dat somebody real smart had make um. Fo exampo plenny stuff in nature stay in da shape of one spiral. Da science guys wen study dis long time. One science guy Nicola Fameli tell dat wen you count da numba of spirals in nature, you goin find da same pattern of numbas. Dey call um da Fibonacci sequence. You can find spirals in plenny stuff, like da shape of galaxies, inside nautilus shells, on top leaves, an on sunflowas. a

⁸ In skool yoa kid might learn about odda shapes dat stay in nature. Fo exampo ery snowflake get one repeated shape dat stay called fractals. You can find dose patterns in odda tings in nature. But who wen make dese beautiful designs? Da moa yoa kid tink about da unreal tings Jehovah wen make, dis goin help him get strong fait. (Heb 3:4) Az yoa kid get olda you gotta help him undastan why iz importan fo lissen Jehovah. You can ask um da question, “If God wen make us, you tink he would kno wat we gotta do fo be happy?” Den you can explain to him dat God gave us da Bible fo show us how fo be happy.

HELP YOA KID UNDASTAN WHY IZ GOOD LISSEN WAT DA BIBLE TELL

9. Why yoa kid might ask questions about wat da Bible tell iz wrong?

⁹ Sometimes yoa kid goin ask questions about tings da Bible tell iz wrong.  Try find out how come he asking dose questions. He asking dat cuz he no believe wat da Bible tell iz tru? Or cuz he get hard time fo explain to oddas wat he believe? Eidda way, you can study da Live Good Foeva! book fo help him undastan why iz good fo us lissen wat Jehovah tell. b

10. How you can help yoa kid tink about his frenship wit Jehovah?

¹⁰ Help yoa kid like be frenz wit Jehovah. Wen you study da Bible wit yoa kid, try find out how he really feel by using da questions an pichas in da Live Good Foeva! book. (Smart Guys 20:5) Like how lesson 8 tell dat Jehovah jalike one fren who give us remindas dat can keep us safe an dat stay good fo us. Afta talking about 1 From John 5:3, you can ask, “Knowing dat Jehovah iz one real good fren, how we should feel about wat he tell us fo do?” Might soun like one simpo question, but wen you ask yoa kid dat, might help him fo see dat Jehovah give us laws cuz he love us.​—Isa 48:17, 18.

11. How you can help yoa kid undastan why iz good fo lissen to da Bible? (Smart Guys 2:10, 11)

¹¹ Talk about why iz good fo us lissen wat da Bible tell. Wen you read da Bible or da daily text togedda, talk story about how Bible truts wen help yoa ohana. Fo exampo, yoa kid see why iz good fo us work hard an always tell da trut? (Heb 13:18) You can even sho how lissening wat da Bible tell can help us be moa happy an moa healthy. (Smart Guys 14:29, 30) If yoa kid undastan why iz good fo do wat da Bible tell, den moa chance he goin like lissen to um.​—Read um Smart Guys 2:10, 11.

12. How one faddah help his boy undastan why iz good fo lissen to da Bible?

¹² Steve, one faddah in France, tell how him an his wife help dea boy, Ethan, fo undastan dat Jehovah make laws cuz he love us. He wen say, “We ask um questions like, how come Jehovah make us follow dis rule? How dis show he love us? Wat goin happen if we no lissen?” Asking dese kine questions wen help Ethan fo get strong fait dat wat Jehovah tell iz good fo us. Steve wen say, “Oua goal iz fo help Ethan see dat da smarts in da Bible iz way betta den wat peopo tink iz da bes ting fo do.”

13. How parents can teach dea kids fo use Bible truts? Give one exampo.

¹³ Teach yoa kids fo use Bible truts. Like if yoa kid gotta read one book in skool, an maybe da book stay about peopo who do tings dat Jehovah say iz wrong. Maybe dey ony like do bad kine stuff or fight all da time, an da book make um look like dese tings no stay bad. You can ask yoa kid how he tink Jehovah feel wen peopo do stuff lidat. (Smart Guys 22:24, 25; 1 Cor 15:33; Php 4:8) Dat can help yoa kid kno wat fo say if da teacha or odda students ask wat he tink about da book.

HELP YOA KID EXPLAIN TO ODDAS WAT HE BELIEVE

14. Wass one ting oua kids can have hard time talk about in skool, an how come?

¹⁴ Sometimes kids stay sked fo tell oddas wat dey tink. Dey might be shame fo  say anyting wen evolution come up in class. How come? Cuz dea teachas might tell dat evolution iz one fact. If you stay one parent, how you can help yoa kids no sked tell oddas wat dey believe?

15. Wat can help one young Christian be moa shua in wat he believe?

¹⁵ Help yoa kid be moa shua in wat he believe. Yoa kid no need be shame cuz he believe in one Creator. (2 Tim 1:8) How come? Even plenny science guys believe dat life neva jus pop up outa no wea. Dey see proof dat all dese living tings had fo come from somebody real smart. Cuz of dat, dey no believe wat plenny skools teach about evolution. Yoa kid can make his fait moa strong by finding out wat wen help odda braddahs an sistahs believe get one Creator. c

16. How parents can help dea kid kno how fo tell oddas why he believe in one Creator? (1 From Peter 3:15) (Go look da picha.)

¹⁶ Make yoa kid ready fo tell oddas why he believe in one Creator. (Read um 1 From Peter 3:15.) Can be good fo look togedda at articles on top jw.org about creation an evolution. Den yoa kid can figga wat he like say fo help peopo undastan dat get one Creator. Practice wit him how he can explain um to oddas. Remind him he no gotta argue wit his classmates. Help him fo keep um simpo an easy fo undastan wen somebody like talk about um. Fo exampo one classmate might tell, “I believe ony wat I can see, an I neva see God.” One young Christian might tell um, “Wat if you wuz walking tru one forest an you find one nice house. Wat you would tink? Somebody had fo build da house. Same ting wit oua planet an all da living tings on um, somebody had fo make um!”

17. How parents can help dea kids look for ways fo tell oddas about da Bible? Try tell how.

¹⁷ Help yoa kid fo find ways fo tell oddas about da Bible. (Rome 10:10) You might compare da work he gotta put in fo talk about wat he believe, wit learning how fo play one instrument. Wen somebody jus  starting, dey goin practice songs dass easy fo play. Afta a while, dey get betta at playing um. Same ting, one young kid might start fo preach in one simpo way. Fo exampo, he might ask his classmate, “You kno dat wen peopo make stuff, dey copy nature. Let me sho you one mean video about dat.” Afta you show um one video from You Tink Somebody Wen Make Um Lidat? he can say, “If da science guy get credit fo someting he wen copy from nature, who you tink should get da credit fo making da original ting?” Dat might make da classmate like learn moa about Jehovah.

KEEP HELPING YOA KID MAKE DEA FAIT STRONG

18. How parents can keep on helping dea kid’s fait come moa strong?

¹⁸ We live in one world full of peopo who no moa fait in Jehovah. (2 Pet 3:3) So parents, wen you study wit yoa kid, help him fo study tings dat goin help him respeck da Bible and wat it tell iz right an wrong. Help him fo tink moa deep an make his fait moa strong by talking about da tings Jehovah wen create. Help him fo undastan da unreal prophecies in da Bible dat awready wen happen. And mos importan, pray wit yoa kid an pray fo him. You can kno fo shua dat Jehovah goin bless all da hard work you do fo make yoa kid’s fait come moa strong.​—2 Rec 15:7.