1-2. Wat can make us cry?

 ALL us cry sometimes. Sometimes we cry cuz we stay real happy. Maybe you wen cry cuz someting spesho wen happen like wen yoa baby wuz born, you had rememba one real good time, or you wen see one fren you neva see long time.

² But mos time we cry cuz we sad or we stay suffa. Fo exampo we might cry wen somebody we trus do someting fo hurt us. Or maybe we cry cuz we sick an suffa long time or somebody we love had mahke. Wen dat happen we might feel like Jeremiah wen Jerusalem had get wipe out from Babylon. Jeremiah tell, “I stay cry plenny . . . I goin stay cry erytime. I no can stop.”​—Sad Song 3:48, 49.

3. How Jehovah feel wen he see his guys suffa? (Isaiah 63:9)

³ Jehovah kno how much times we cry cuz of da tings dat make us soa inside. Da Bible tell dat fo shua he kno weneva we suffa, an he hea wen we yell to him fo help. (Songs 34:15) But Jehovah do moa den jus see an hea us. He stay oua Faddah an he love us plenny, so wen we cry, he stay real sad an he goin be dea fo help us.​—Read um Isaiah 63:9.

4. Wat Bible exampos we goin talk about, an wat dat tell us about Jehovah?

 ⁴ In da Bible Jehovah tell us how he feel wen his guys cry an how he help dem. Fo see dis we go look at da exampos of Hannah, David, an King Hezekiah. Wat wen make dem cry? Wat Jehovah wen do fo help dem? An wat we learn from dea exampo about how Jehovah make us feel betta wen we stay sad, wen somebody we trus hurt us, or wen we feel like no moa hope?

WEN YOU CRY CUZ YOU REAL SAD

5. How Hannah wen feel about wat she wuz goin tru?

⁵ Hannah had some problems dat wen make her supa sad an made her cry. One problem wuz Hannah’s husban had anodda wife. Her name wuz Peninnah an she wuz real mean to Hannah. Fo make um moa worse, Peninnah had kids an Hannah neva. (1 Sam 1:1, 2) Peninnah neva stop rubbing um in dat Hannah no could have kids. If dat wuz you, how you would feel? Dis wen bodda Hannah an she wen “cry plenny an she no like eat notting” an her heart wen “feel real junk.”​—1 Sam 1:6, 7, 10.

6. Wat Hannah did fo feel betta?

⁶ Wat Hannah did fo feel betta? One ting dat wen help her wuz she wen go to da tent wea dey worship Jehovah. Ova dea, she start “fo pray to [Jehovah] an she start fo cry an no can stop.” She wen beg Jehovah, “you know how plenny I stay suffa, so I like fo you no foget me.” (1 Sam 1:10b, 11) Hannah wen tell Jehovah wat she wuz tinking an feeling. Wen Jehovah wen see Hannah crying plenny, wen make Him feel hurt too. He wen love her plenny an wanted fo make her feel betta.

7. How Hannah wen feel betta afta she wen tell Jehovah her problems?

⁷ Afta Hannah wen tell Jehovah how she feel in praya, da Main Pries Guy Eli, wen tell her dat Jehovah would ansa her. How she wen feel afta dat? Da scripcha tell, “She no feel sad no mo, she go eat someting.” (1 Sam 1:17, 18) Even tho her problem neva go away yet, she wen feel way betta. She wen hand her problem um ova to Jehovah, trus dat he wen undastan how she feel, an wuz goin help her. An dass wat Jehovah wen do. Layta on he wen bless her wit one kid.​—1 Sam 1:19, 20; 2:21.

8-9. How come we gotta try oua bes fo go to da meetings? (Fo Da Hebrew Peopo 10:24, 25) (Go look da picha.)

⁸ Wat we learn. You get problems dat  make you feel real sad? Maybe somebody in yoa ohana or one fren wen mahke? Times lidat, ony natural fo like be by yoaself. But, jus like how Hannah wen feel betta wen she had go to da tent fo worship Jehovah, you can feel betta wen you go to da meetings wit da local hui, even if you stay tired an sad. (Read um Fo Da Hebrew Peopo 10:24, 25.) At da meetings we lissen to scripchas dat give us good tings fo tink about. Dass how Jehovah can help us fo no tink about da tings dat make us sad an fo feel betta even if oua problem neva go away yet.

⁹ At da meetings oua braddahs give us good kine words dat show how much dey love us, an we feel betta cuz we stay wit dem. (1 Tess 5:11, 14) Try look wat dis spesho pionea braddah whose wife had mahke wen tell. He sed, “Sometimes I like be by myself cuz I miss my wife so much an I no can stop crying. But wen I go to da meetings, dat help me fo hang in dea. Da good kine words from my braddahs an sistahs make me feel good inside. No matta how worried I stay befoa I go meeting, I always feel betta wen I stay dea.” Wen we at oua meetings, Jehovah can use oua braddahs an sistahs fo help us.

10. How we can copy Hannah’s exampo wen we stay real sad?

¹⁰ Hannah wen feel betta afta she wen pray to Jehovah an tell him how she feel. Even you can let God take kea all da stuff dat bodda you an kno fo shua He goin listen. (1 Pet 5:7) One sistah whose husban wen get killed wen guys wen rob him wen tell, “My heart wen feel so soa I thought I neva would be happy again. Weneva I wen pray to my Faddah, Jehovah, who love me plenny, I wen feel moa betta. Sometimes I neva kno wat fo say, but he wen undastan me. Wen I wen feel I wuz goin lose um, I would pray to Jehovah fo keep me calm. Right den and dea, I wen feel betta and I could do wat I needed fo do.” Wen you cry to Jehovah an tell him wat make you sad, he goin come sad too and he goin undastan how you feel. Even if da problem no go away, Jehovah goin help you feel betta and help you stay calm. (Songs 94:19; Php 4:6, 7) Fo shua, he goin bless you cuz you hang in dea an trus him.​—Heb 11:6.

WEN YOU CRY CUZ SOMEBODY YOU TRUS HURT YOU

11. How David had feel wen oddas wen treat him bad?

¹¹ Even David had go tru hard times dat made him cry. Had plenny guys who wen hate him, even some of his frenz an ohana wen turn agains him. (1 Sam 19:10, 11; 2 Sam 15:10-14, 30) One time, he wen write, “I stay tired cuz I stay moan all da time. Ery nite, I cry till da bed all wet. My pillow wet cuz I stay crying.” How come David wen feel lidat? “Cuz a all da peopo dat stay agains me,” he sed. (Songs 6:6, 7) Da way oddas wen treat David wen hurt him an make him cry plenny.

12. From wat Songs Fo God 56:8 tell, how David wen feel about Jehovah?

¹² Even tho David had one hard life, he had kno Jehovah love him. He had write, “Da One in Charge, he wen hea  me cry.” (Songs 6:8) Anodda time, David wen write dis nice kine words at Songs Fo God 56:8. (Read um.) Dat scripcha make um clear dat Jehovah love us plenny an kea about how we feel. David wen feel dat Jehovah wuz putting his tears in one bottle or writing um down in one book. He wuz shua dat Jehovah wen see and rememba da tings he wen suffa. An he wen kno dat his Faddah in heaven could see not ony wat he wuz goin tru but how he wen feel.

13. Even if oddas let you down, wat us can rememba? (Go look da picha.)

¹³ Wat we learn. Yoa heart stay broken cuz somebody you trus wen stab you in da back? Maybe yoa heart stay soa cuz da person you wuz goin marry or yoa husban or wife wen dig out on you, or somebody you love stop serving Jehovah. One braddah whose wife wen fool aroun an wen leave um sed, “I no could believe dis wen happen to me. I had feel sad, mad, an good fo notting.” If you stay go tru dis kine stuff, kno dat Jehovah neva goin leave you. Da braddah sed, “I come fo see dat peopo might not be dea fo you, but Jehovah always goin be dea no matta wat. He neva goin leave da guys dat stay tight wit him.” (Songs 37:28) Rememba, Jehovah love you moa den anybody else can. No matta how much you suffa cuz of wat somebody wen do to you, dat no goin change how much Jehovah kea fo you. (Rome 8:38, 39) No foget, yoa Faddah in heaven love you, even tho oddas treat you bad.

14. Wat Songs Fo God 34:18 help us kno fo shua?

¹⁴ If you wen get stab in da back, wat can help iz wat David wen tell at Songs Fo God 34:18. (Read um.) One book about da Bible tell, “da peopo dat stay all bus up inside” might be da guys dat feel notting good goin happen fo dem bumbye. How Jehovah help da guys dat feel dis way? Jehovah “stay real nea” to us, like one maddah or faddah who hug dea kids wen dey stay crying. Jehovah kno how we feel and like help us right away. He stay ready fo help us if oua heart stay broken or we tink we good fo notting. He goin give us plenny good tings bumbye an dat goin help us hando da bad tings we goin tru.​—Isa 65:17.

 WEN YOU CRY CUZ YOU NO MOA HOPE

15. Wat wen make Hezekiah real sad an like cry plenny?

¹⁵ Wen King Hezekiah wuz 39 years old, he wen find out he wuz real sick. Isaiah wen give one message from Jehovah to Hezekiah dat he no would get betta an would mahke. (2 Ki 20:1) Look like Hezekiah neva have hope. Dat wen make him so sad an he wen cry plenny. He wen beg Jehovah fo help him.​—2 Ki 20:2, 3.

16. Wat Jehovah wen do wen he heard Hezekiah cry?

¹⁶ Wen Jehovah wen hea Hezekiah pray an saw him cry, he felt sorry fo him an he wen tell um, “I wen hear you pray awready, an see how you stay cry. Now, I . . . goin make you come good.” Isaiah wen tell um dat Jehovah wen promise fo let him live moa long, an dat he was goin rescue dem from da Assyria King.​—2 Ki 20:4-6.

17. How Jehovah help us hang in dea wen we stay real sick? (Songs Fo God 41:3) (Go look da picha.)

¹⁷ Wat we learn. Wat you can do if you stay sick an no moa hope fo get betta? Try tell Jehovah how you feel, an he goin lissen even wen you cry. Da Bible tell us “He da Faddah dat pity us an . . . erytime give us good kine words.” (2 Cor 1:3, 4) Right now we kno dat Jehovah not goin get rid of all oua problems, but he always goin be dea fo help us get tru um. (Read um Songs Fo God 41:3.) Tru his spesho spirit, Jehovah give us da powa fo hando, da smarts fo kno wat fo do, an he help oua hearts res inside. (Smart Guys 18:14; Php. 4:13) He give us da hope in da Bible dat in da future nobody goin be sick anymoa, an dat help us fo keep goin.​—Isa 33:24.

18. Wat scripcha help you wen you goin thru hard times? (Go look da box “ Wat Jehovah Tell Fo Help Us Come Calm.”)

¹⁸ Wat Jehovah wen tell Hezekiah wen make him feel good inside. Same ting, wat Jehovah tell in da Bible help us feel betta. Wen we go tru someting real soa, Jehovah give us good kine words in da Bible dat help us fo be calm. (Rome 15:4) Wen one sistah in West Africa had find out she had cancer, she wen cry plenny. She tell, “One scripcha dat wen help me iz Isaiah 26:3. Even tho mos times we no can control da tings we go tru, dis verse promise dat Jehovah goin help us stay calm an help us fo hando anyting we go tru. Wen you get real hard times an look  like no moa one way out, get one scripcha you like fo read dat help you?

19. Wat oua future goin be like?

¹⁹ Dis world stay almos pau an we kno goin get moa tings dat make us soa an like cry. But we wen learn from Hannah, David, an King Hezekiah dat Jehovah see wen we cry, an dat bodda him plenny. He love us fo staying tight wit him even wen we soa, an he no foget wen we cry. So wen we go tru hard times, we like make shua fo pray to Jehovah an tell um eryting we feel. We gotta stay close to oua braddahs an sistahs in da local hui. An keep reading da Bible wea we get good kine words from Jehovah. We can kno fo shua dat if we hang in dea to da end, Jehovah goin bless us. He promise us he goin wipe away all da tears we cry cuz we sad, cuz somebody we trus wen hurt us, or cuz we no moa hope. (Jesus Show 21:4, NWT) Den bumbye, if we cry, ony goin be cuz we happy.