1. How importan wuz bread to peopo in Bible times?

 BREAD wuz one of da main food fo peopo in Bible times. (Start 14:18; Luk 4:4) Wuz so common dat da Bible sometimes wen use da word bread fo mean food. (Mat 6:11, New World Translation; Jesus Show 20:7) Jesus wen use bread in two of his miracles dat plenny wen kno about. (Mat 16:9, 10) We can read about one of dose times in John chapta 6. We goin talk about wat wen happen, an see wat we can learn about um fo use today.

2. How come tousands of peopo wen need food?

² Jesus aposals wuz real tired afta one supa busy preaching trip an dey had fo res, so dey wen get on one boat an cross da Sea of Galilee. (Mar 6:7, 30-32; Luk 9:10) Dey wen end up at one quiet place near Betsaida. But litto bit afta dat, peopo wen hea dat Jesus wuz dea an tousands wen go fo see him. Jesus neva ignore dem. He wuz nice an wen take his time fo teach dem about God’s Govament an wen heal da sick peopo. Cuz it wen start fo get late, Jesus followas wen tink how dese guys wuz goin get someting fo eat. Maybe some wen bring litto bit food wit dem, but mos guys wuz goin need fo go into da villages fo buy food. (Mat 14:15; John 6:4, 5) Wat Jesus goin do?

 ONE MIRACLE FO MAKE BREAD

3. Wat Jesus wen tell his aposals fo do fo da guys dea? (Go look da picha.)

³ Jesus wen tell his aposals, “Nah! Dey no need go way. You guys, you give um someting fo eat.” (Mat 14:16) Wen seem like no can cuz had 5,000 guys. An if you count da wahines an keiki too, maybe dea wuz 15,000 peopo dey had fo feed. (Mat 14:21) Andrew wen say, “Get one boy hea dat get five small barley kine bread an two small fish. But how dat can feed plenny peopo?” (John 6:9) Barley bread wuz da kine food dat plenny peopo eat all da time, an da small fish maybe wuz salted an dried. But da food da boy had no wuz goin be nuff fo feed erybody.

4. Wat we can learn from John 6:11-13? (Go look da pichas.)

⁴ Jesus wanted fo show aloha to da peopo, so he wen tell dem fo sit down on da grass. (Mar 6:39, 40; read um John 6:11-13.) Den, Jesus wen tell mahalo to his Faddah fo da bread an da fish. Cuz he wen do dis, he wen show dat God wuz da one who wen give da food an dat he wuz tankful fo da food. Jesus exampo iz one good one fo us rememba fo pray befoa we eat, no matta we stay by ouaself or get oddas aroun us. Afta dat, Jesus wen give out da food an da peopo wen eat til dey wuz full. So Jesus wen tell his followas fo get da lef ovas togedda so dey could use um layta. Jesus neva like wase anyting. Dis one good exampo fo us copy. If you  one parent, you can use dis story fo teach yoa kids about praying, showing aloha, an giving to oddas.

5. How da peopo wen reack to da miracles Jesus wen do, an wat he wen do afta?

⁵ Jesus wen blow da minds of da peopo by da way he had teach an by his miracles. Dey wen kno dat Moses wen promise dat God wuz goin sen dem one spesho prophet, so maybe dey wen tink dat Jesus wuz da prophet. (Rules 18:15-18) Dey probly wen tink dat Jesus would be one awesome king, who could even give enuff food to erybody in Israel. So da peopo wuz goin “grab [Jesus] fo make him come king.” (John 6:14, 15) If Jesus wen let dat happen, he would be getting into da politics of da Jews who wuz unda da rule of Rome. But he neva do dat. Da Bible tell he wen go away from da peopo fo be by himself. No matta he had presha from oddas, he no wuz goin take sides in politic kine stuffs. So good fo us learn from dis!

6. How we can copy Jesus exampo? (Go look da picha.)

⁶ Nobody goin ask us fo use one miracle fo make bread or heal sick peopo, an dey not goin try make us one king. But dey might try get us fo vote or back up somebody dey tink goin make tings betta. Jesus exampo show us wat fo do. He  no wuz goin get mix up wit political kine stuff, he even tell, “I not da kine king from dis world.” (John 17:14; 18:36) Az Christians we gotta tink da way Jesus did an copy his exampo. Like him we support God’s Govament. We tell oddas about um an pray fo it come. (Mat 6:10, NWT) Get moa we can learn from Jesus miracle of da bread.

UNDASTAN WAT DA BREAD MEAN

7. Wat Jesus wen do an how his aposals wen ack? (John 6:16-20)

⁷ Afta Jesus wen feed da peopo, he wen tell his aposals fo leave an go back Capernaum by boat an he wen go to da mountain, fo get away from da peopo dat wuz trying fo make him king. (Read um John 6:16-20.) Wen da aposals wuz out on da boat, had one mean storm wit strong winds an waves. Den Jesus wen go by dem, an he wen walk on da watta. An den he had ask Peter fo come walk on da watta too. (Mat 14:22-31) Soon az Jesus had get in da boat da wind had stop. His followas wen tell, “Wow! Fo real, you God Boy.” a (Mat 14:33) Az crazy dat his aposals sed dis ony afta Jesus wen walk on watta but not afta da miracle fo make bread. Mark wen write moa about wat had happen. He tell, “Da guys, dat blow dea mind! Dey neva undastan how he wen feed all da peopo bread, cuz dey real hard head.” (Mar 6:50-52) Jesus aposals neva undastan dat Jehovah wen give him powa fo do moa den jus make bread. Litto bit afta dis, Jesus wen talk again about da miracle of da bread an teach us someting else.

8-9. How come da peopo wen try find Jesus? (John 6:26, 27)

⁸ Da nex day, da peopo wen go to da place wea Jesus had feed dem, but Jesus an his aposals no wuz dea. So da peopo wen go on boats dat wen come from Tiberias an dey had sail to Capernaum fo look fo Jesus. (John 6:22-24) Dey wen do dat cuz dey wen like learn moa about God’s govament? No. Da main ting dey wanted wuz fo Jesus give dem moa bread. How we kno dat?

⁹ Try look wat had happen wen da peopo wen find Jesus by Capernaum. Jesus wen tell dem strait up da ony reason dey wen find him wuz cuz dey wanted food. Even tho dey wen eat da bread an “come full,” Jesus wen tell dat food “bumbye come no good.” But he wen tell dem az moa betta dey “work fo da kine food dat las long time an make you guys live to da max foeva!” (Read um John 6:26, 27.) Jesus wen tell his Faddah wuz goin give dat kine food. Wen da peopo hea dat get food dat can make dem live foeva, dey probly wen trip out! Wat food wuz dat, an how dey could get um?

10. Wat da peopo had fo do fo “get da real kine life dat goin stay to da max foeva”?

¹⁰ Dose Jews wanted fo kno wat dey had fo do fo get dis food. Dey probly wen tink dey had fo do tings from da Rules from Moses. Jesus wen tell dem, “Dis wat God like you guys fo do: Trus me, cuz I Da Guy God Wen Sen.” (John 6:28, 29) Dey had fo put dea trus in Jesus all da time if dey like “get da real kine life dat goin stay to da max foeva!” Jesus awready wen talk about dis befoa. (John 3:16-18, 36) An layta on he wuz goin talk  moa about how we can live foeva.​—John 17:3.

11. How da Jews wen show dat dey ony wanted fo get someting fo eat? (Songs Fo God 78:24, 25)

¹¹ Dose Jews neva believe dis new ting Jesus wen tell dem God like dem fo do. Dey wen ask him, “Wat kine awesome ting you goin do fo show us who you, fo us guys trus you?” (John 6:30) Dey wen talk about how da peopo in Moses time wen get manna fo eat, an dat wuz dea eryday food. (Neh 9:15; read um Songs Fo God 78:24, 25.) Wuz clear da ony ting dey wen kea about wuz getting grindz fo eat. Nex, wen Jesus talk about da “real kine bread from da sky,” which wuz like manna dat could make dem live foeva, dey neva even ask question fo undastan. (John 6:32) Wuz so importan to dem fo get someting fo eat dat dey neva lissen to wat Jesus had try fo teach dem about how fo live foeva. Wat we can learn from dis?

WAT SHOULD BE MOS IMPORTAN TO US

12. How Jesus wen show wat should be mos importan to us?

¹² Hea iz one importan lesson fo us dat stay inside John chapta 6. Lissening to God an having one good relationship wit him should be da mos importan ting to us. Wen he wuz getting tempted by Satan, Jesus wen show dat lissening to Jehovah wuz moa importan den food fo eat. (Mat 4:3, 4) An wen he wen teach on top da mountain he wen tell how iz real importan fo us have one good relationship wit God. (Mat 5:3, NWT) So we can ask ouaself, “Da way I live my life show I kea moa about my relationship wit Jehovah radda den stuffs I like get?”

13. (a) Why we can be happy wen we eat? (b) Wat Paul wen tell us fo watch out fo? (1 Fo Da Corint Peopo 10:6, 7, 11)

¹³ Az not wrong fo pray fo da tings we need an fo be happy wit um. (Luk 11:3) Da Bible tell iz good fo somebody “go eat, go drink, an stay good inside bout hard work” an “dass jalike one present from God.” (Teacha 2:24; 8:15; Jam 1:17) We gotta watch out dat da stuffs we get or like get no come da mos importan ting in oua life. We can learn from wat da aposal Paul wen write to da Christians. He wen talk about da bad tings dat da Israel guys wen do in da boonies, like wen dey wuz Mount Sinai side. He wen warn Christians fo no “go all out fo do da bad kine stuff, jalike da [Israel peopo].” (Read um 1 Fo Da Corint Peopo 10:6, 7, 11.) Jehovah wen use miracles fo give da Israel guys food. But cuz dey wen get greedy fo da food, dey wen make um one bad ting fo dem. (Cens 11:4-6, 31-34) Wen dey had worship da gold bebe bull da Israel guys had show dey kea moa about food, drinking, an having one good time den lissening to Jehovah. (Egypt 32:4-6) Paul wen talk about dese exampos fo warn Christians dat wuz living close to da time wen Jerusalem an it’s temple wuz goin get wipe out in 70 C.E. Right now we living befoa dis world come wipe out, so az importan fo us no make da same mistake az da Israel guys.

14. Wat da Bible say about food in da new world?

¹⁴ Wen Jesus had tell us fo pray fo “oua food fo today,” he wen teach us fo pray fo God do wat he like “on da earth . . . jalike in heaven.” (Mat 6:9-11, NWT) Wat you tink da world goin look like wen dat  happen? Da Bible tell one ting God like do fo da eart iz give good food. Isaiah 25:6-8 tell dat erybody goin be happy fo eat plenny ono kine food unda God’s Govament. Songs 72:16 tell dat in da future goin have “plenny food fo harves . . . all da way to da mountain tops!” You excited fo make da food you love fo eat or someting you neva wen make befoa? An maybe you excited fo plant yoa own fruits an eat um. (Isa 65:21, 22) Erybody on da eart goin be happy wit all dese awesome tings.

15. Wat da guys who come back to life goin learn? (John 6:35)

¹⁵ Read um John 6:35. Try tink about da peopo who wen eat da bread an fish from Jesus. Even if plenny of dem maybe neva put fait in Jesus, dey maybe goin come back to life an you get chance fo meet some of dem. (John 5:28, 29 NWT) But dose guys goin have fo learn wat Jesus had mean wen he tell, “Me, jalike da bread. I da One make da peopo come alive fo real kine. Anybody come by me fo be my guy, dey no goin come hungry eva!” Dey goin have fo build fait dat Jesus wen sacrifice his life fo dem. At dat time, da guys dat come back to life an any keiki born in da new world goin have fo learn da trut about Jehovah an wat he like do. Goin be so unreal fo teach dese guys all dese awesome tings! Helping oddas fo build dea relationship wit Jehovah goin make us way moa happy den all da ono food we get fo eat in da new world.

16. Wat we goin learn in da nex lesson?

¹⁶ We ony wen cova paht of John chapta 6, but Jesus had plenny moa fo teach about how fo “live to da max foeva.” Da Jew guys who Jesus wen talk to had fo lissen real good to wat he tell, an we gotta do da same ting too. In da nex lesson, we goin learn some moa from John chapta 6.