1. How come plenny peopo tink dey no can live foeva?

 PLENNY peopo try fo eat good an exercise fo stay healthy so dey can live long time. Still yet, dey kno dey not goin live foeva. Dey probly tinking dat no can live foeva. But Jesus wen tell in John 3:16 an 5:24 dat peopo can “get da real kine life dat goin stay to da max foeva!”

2. Wat John chapta 6 tell about who can live foeva? (John 6:39, 40)

² Had one time Jesus wen do one miracle fo feed bread an fish to tousands of peopo. a Dat wuz awesome, but wat he wen say da nex day to plenny peopo who wen follow him to Capernaum in Galilee wuz even moa unreal. He wen tell dem dat he wuz goin bring back to life dose who wen mahke an dey wuz goin live foeva. (Read um John 6:39, 40.) Try tink about wat dat mean fo yoa ohana an frenz who wen mahke. Wat Jesus tell show dat plenny who wen mahke can come back to life an both you an da ones you love can live foeva. But wat Jesus wen say in da nex verses in John chapta 6, wuz hard fo plenny peopo fo undastan back den, an still hard fo plenny peopo today. Wat Jesus wen say?

3. Wat Jesus wen tell about himself at John 6:51?

³ Afta Jesus miracle fo feed da crowd of peopo, dey wen tink about da manna dat Jehovah wen give da Israel  peopo wen dey wuz in da boonies. Da peopo Jesus wen talk to wen kno dat da scripchas had call dat manna “bread from da sky.” (Songs 105:40; John 6:31) Jesus wen take wat dey wen kno about manna fo teach dem someting supa importan. Even tho da manna wuz one miracle from God, da guys dat wen eat um wen die layta on. (John 6:49) But Jesus wen tell dat he “da real kine bread from da sky,” “da bread from God,” an “da bread . . . [dat] make da peopo come alive.” (John 6:32, 33, 35) Jesus wen explain had one big diffrence between him an da manna. He tell, “I da real bread. I da one fo make peopo come alive fo real kine. I wen come down from da sky. Anybody take dis bread, dey goin live to da max foeva.” (Read um John 6:51.) Dis wen confuse da Jews. Dey neva get how Jesus can say dat he wuz “da bread” dat wen come from da sky, an dat dis bread wuz moa betta den da manna dat Jehovah wen give dea ancesta guys. An den Jesus wen tell dem, “Dis da bread I goin give wen I mahke, az my body.” Wat he wen mean? Az importan fo us undastan wat he wen mean cuz it show how us an da guys we love get da chance fo live foeva. We go spock out wat Jesus wen mean.

BREAD DAT MAKE PEOPO COME ALIVE AN HIS BODY

4. How come some peopo wuz shock from wat Jesus had tell?

⁴ Some peopo wuz shock wen Jesus had tell dem da bread dey should eat wuz his body dat he wuz goin give so dat dey could “live to da max foeva.” Maybe dey wen tink he wanted dem fo eat his body fo real kine. (John 6:52) But den Jesus wen tell dem someting dat wen shock dem even moa. He wen say, “eat my body an drink my blood.”​—John 6:53.

5. How we kno fo shua Jesus neva mean peopo gotta drink his fo real blood?

⁵ Back in Noah’s time, God wen tell peopo fo no eat blood. (Start 9:3, 4) Layta on, Jehovah wen tell da Israel peopo fo no eat blood too. Anybody who eat blood wuz fo be cut off, dat mean dey gotta mahke.” (Pries 7:27) Jesus wen teach da Jews fo lissen to all da rules God wen give dem. (Mat 5:17-19, NWT) So no ways Jesus would eva ask da Jew guys fo eat his fo real body or drink his fo real blood. Even tho wat Jesus wen tell had shock some peopo, he wuz actually teaching dem how fo “live to da max foeva.”​—John 6:54.

6. How we kno wat Jesus wen tell about eating his body an drinking his blood wuz one word picha?

⁶ Iz clear dat Jesus wuz using one word picha wen he wuz talking to da peopo. Like da time Jesus had use one word picha wen he had tell da wahine from Samaria, “Whoeva drink da kine watta I goin give, dey no goin come thirsty no moa. Cuz da kine watta I goin give dem goin come jalike watta dat stay come out all da time. An dat watta goin make dem live to da max foeva!” (John 4:6-8, 14) b Jesus neva mean dat da wahine from Samaria wuz  goin live foeva by jus drinking da watta from da puka. Same same, wen Jesus wuz talking to da guys in Capernaum, he neva mean dey would live foeva if dey eat his fo real body an drink his fo real blood.

DA TWO TIMES STAY DIFFREN

7. Wat some guys tell about wat Jesus wen say at John 6:53?

⁷ Some guys tell dat at John 6:53 Jesus wuz explaining wat peopo gotta do at da Lord’s Evening Meal, cuz ova dea dat time he wen use almos da same kine words. (Mat 26:26-28) Dass correck o wat? Az importan fo us find out da ansa cuz ery year get millions aroun da eart dat hui up wit us fo dat meeting. We goin see dat wat Jesus wen tell at John 6:53 stay diffren from wat he wen tell at da Lord’s Evening Meal.

8. Wat some tings dat show dese two times stay diffren? (Go look da pichas.)

⁸ We go spock out how dese two times stay diffren. Firs, wen an wea Jesus had tell wat stay in John 6:53-56. He wen say dese tings to da crowd of Jews in 32 C.E. in Galilee. Dat wuz about one year befoa he wen firs start da Lord’s Evening Meal in Jerusalem. Secon, who he wuz talking to? He wen say dese tings to peopo who had kea  moa about getting food fo eat from him radda den learning about Jehovah or God’s Govament. (John 6:26) In fact, wen Jesus wen say someting dey had hard time fo undastan, ony fas dey wen stop lissening to him. Even some of his followas had bag from him. (John 6:14, 36, 42, 60, 64, 66) Dese guys wuz way diffren from da 11 aposals who wuz wit Jesus about a year layta in 33 C.E. at da Lords’ Evening Meal. Dat nite, his 11 aposals wuz dea wit him even tho dey neva undastan eryting he wen teach dem. Still yet, not like mos of da guys in Galilee, Jesus faitful aposals wuz shua dat he wuz God’s Boy who had come from heaven. (Mat 16:16) He had tell dem good kine words, “You da guys dat wen stay tight wit me wen I suffa plenny.” (Luk 22:28) Jus dese two tings show dat at John 6:53, Jesus no wuz trying fo explain wat would happen at da Lord’s Evening Meal. But get even moa stuffs dat show dat da two times stay diffren.

WAT JESUS WORDS MEAN FO YOU?

9. Wat group of peopo Jesus wuz talking about at da Lord’s Evening Meal?

⁹ At da Lord’s Evening Meal, Jesus wen give his aposals bread dat no moa yeast an tell dem dat it rep his body. Den he wen pass aroun one cup of wine fo drink an sed it rep da “blood fo make solid da New Deal.” (Mar 14:22-25; Luk 22:20; 1 Cor 11:24) Wat Jesus wen say about da deal iz real importan. He had call um da “new deal,” cuz dis wuz ony fo da guys who goin rule wit Jesus in God’s Govament, not erybody. (Heb 8:6, 10; 9:15) At dat time, da aposals neva undastan eryting about da deal, but pretty soon dey wuz goin get God’s spesho spirit an come one paht of da new deal fo have one place wit Jesus in heaven.​—John 14:2, 3.

10. Wass one odda ting dass diffren between wat Jesus wen tell at da Lord’s Evening Meal an wat he wen say in Galilee? (Go look da picha.)

¹⁰ Wat Jesus wen say at da Lord’s Evening Meal wuz ony fo da “small group of sheep.” His faitful aposals who wuz dea wit him in da room wuz da firs ones fo be paht of dat small group. Dey wuz da ones Jesus wen ask fo eat da bread an drink da wine dat nite. (Luk 12:32, NWT) Oddas who come paht of dat group layta on would eat da bread an drink da wine too wen dey celebrate da Lord’s Evening Meal. Dey da ones who goin be in heaven wit Jesus. So dis one odda ting dass diffren between da Lord’s Evening Meal an wat wen happen in Galilee. Wat Jesus wen say at da Lord’s Evening Meal wuz ony fo one small group of peopo. But wat he wen tell in Galilee wuz fo choke plenny peopo.

11. Wat Jesus wen say in Galilee dat show he no wuz talking about one small group?

¹¹ Mos of da guys Jesus wuz talking to in Galilee in 32 C.E, dey ony wen like food from him. But Jesus wuz trying fo help dem see dat get someting way moa importan den food. Wuz someting dat could give dem life to da max foeva. Jesus even wen tell dat dose who wen mahke can come back alive an get chance fo live foeva. He  no wuz talking to one small group of peopo like he wuz at da Lord’s Evening Meal. Radda, he wuz talking about one awesome blessing dat all peopo could get. Try look wat Jesus wen tell, “Anybody take dis bread, dey goin live to da max foeva. Dis da bread I goin give wen I mahke, az my body.”​—John 6:51.

12. Wat gotta do so can live foeva?

¹² Wat Jesus wen tell da Jews in Galilee neva mean dat ery person dat eva wen live would get fo live foeva. Ony da guys dat “take dis bread,” dose who show dey get fait in Jesus goin benefit. Plenny peopo today tell dey believe in Jesus an call him dea savior. (John 6:29) But need moa den dat. Had plenny guys in Galilee who at firs wen believe in Jesus, but den bumbye dey wen bag from him. How come?

13. Wat gotta do fo be one tru followa of Jesus?

¹³ Mos of da peopo in da crowd had follow Jesus ony cuz he gave dem wat dey wanted. Dey wen like him fo heal dem, give dem free food, an tell dem tings dey wanted fo hea. But Jesus wen make um clear dat he neva come to da eart jus fo give dem wat dey wanted. He wen come fo teach dem wat dey had fo do fo be one tru followa of him. Dey had fo take up his invite fo “come by” him. Dat mean dey had fo lissen an do eryting he teach.​—John 5:40; 6:44.

14. Wat we gotta do fo benefit from Jesus body an blood?

 ¹⁴ Jesus wen teach da crowd dat cuz he wen sacrifice his body an blood, dis would open up da way fo dem get chance fo live foeva. Dey had fo believe an have fait in dat, an we need dat same kine fait today. (John 6:40) So wat Jesus wen say at John 6:53 mean dat we gotta show we get fait in da ransom fo get chance fo live foeva. Dis chance stay open to uku plenny peopo.​—Efe 1:7.

15-16. Wat importan tings we wen learn from John chapta 6?

¹⁵ In John chapta 6, we wen learn plenny importan tings dat can kokua all us. We wen learn dat Jesus kea plenny fo peopo. Wen he wuz in Galilee, he wen heal da sick guys, teach dem about God’s Govament, an wen make shua dey had food fo eat. (Luk 9:11; John 6:2, 11, 12) Moa importan den dat, he wen teach he stay “da bread [dat] . . . make peopo live to da max foeva.”​—John 6:35, 48.

¹⁶ At da Lord’s Evening Meal, da guys Jesus wen call da “odda sheeps” no eat da bread an drink da wine, an dey not suppose to. (John 10:16) But dey still yet benefit from Jesus body an blood by showing fait in his ransom sacrifice. (John 6:53) On da odda hand, da guys who eat da bread an drink da wine show dat dey stay paht of da new deal an get da hope fo rule in God’s Govament in heaven. So den, wedda we stay anointed or paht of da odda sheeps, John chapta 6 iz supa importan fo us learn about. It teach us dat we all gotta have solid fait in da ransom fo live foeva.