Da aposal Paul wen write to Timoty, “In front God, Jesus Christ, an da angel guys God wen pick, I tell you dis: Do all dis tings. No ony make some peopo do um an same time let odda peopo no do um.”​—1 Tim 5:21.

Firs, we go talk about who dese angels no can be. For shua, dey not da 144,000. Wen Paul wen write to Timoty, da resurrection to heaven neva happen yet. Da aposals an odda guys dat goin heaven neva come spirits yet, so “da angel guys God wen pick” iz not dem.​—1 Cor 15:50-54; 1 Tess 4:13-17; 1 John 3:2.

Anodda ting, “da angel guys God wen pick” no can be da angels who neva lissen Jehovah da time of da Flood. Dose angels wen hui up wit Satan an go agains Jesus an wen come bad kine spirits. (Start 6:2; Luk 8:30, 31; 2 Pet 2:4) In da future, dey goin get thrown inside da deep, dark hole wea dey goin stay fo 1,000 years. Afta dat, dey goin get wipe out wit Satan.​—Jude 6; Jesus Show 20:1-3, 10.

So “da angel guys God wen pick” gotta be da angels in heaven who stick wit “God an Jesus Christ.”

Get uku pile faitful angels. (Heb 12:22, 23) Dat no mean all of dem get da same ting fo do at da same time. (Jesus Show 14:17, 18) Rememba one time, one angel wen wipe out 185,000 Assyria army guys. (2 Ki 19:35) Anodda time, a bunch of angels dat wen get da job fo “pull out all da guys dat broke da Rules from God an dat tell da odda guys fo broke da Rules too.” (Mat 13:39-41) Odda angels maybe wen “bring togedda da guys dat God wen pick” fo go heaven. (Mat 24:31) An still yet, get odda angels dat get da job “fo take kea you ery place you go.”​—Songs 91:11; Mat 18:10; go check Matthew 4:11; Luk 22:43.

“Da angel guys God wen pick” at 1 Fo Timoty 5:21 probly had da job fo take kea da local huis. In da odda verses, Paul wen tell da eldas how fo hando dea kuleana an dat da odda guys in da local hui had fo show dem respeck. Da eldas gotta be fair wen dey take kea dea kuleana. Dey “no ony make some peopo do um an same time let odda peopo no do um.” An dey gotta tink keafully wen dey making decisions an no rush. Paul wen give one real importan reason fo lissen wat he tell, dass cuz Jehovah, Jesus, an da angels stay watching. So iz supa clear dat God wen give some angels da work fo take kea da local huis, fo proteck dem, fo help dem wit da preaching, an fo tell Jehovah wat stay goin on.​—Mat 18:10; Jesus Show 14:6.