SOMETIMES da guys who wen write da Bible say da same exack ting ova an ova. We go look three reasons why maybe da writas wen do dis:

Wen dey wen write um. Long time befoa time in Israel, mos peopo neva have dea own copy of da Rules. Mos times, dey ony wen hear da Rules wen dey had to go da Tent Fo Come Togedda Wit God. (Rules 31:10-12) Garans was hard fo erybody lissen an pay attention wen dey was standing dea fo hours. (Neh 8:2, 3, 7) Dose times, telling da importan tings ova and ova was going make um moa easy fo da peopo rememba da scripchas an use um. Telling some words ova an ova again garans was going help dem rememba da main point of da laws Jehovah wen give dem.​—Pries 18:4-22; Rules 5:1.

How dey wen write um. Songs wen make up about 10 percent of da Bible, like da books Songs Fo God, Love Song, an Sad Song. Some songs had parts of da song wea dey tell da same ting ova an ova, dat tell da main point of da song an help da guys who wen lissen fo rememba da words. Fo exampo, try look da words at Songs Fo God 115:9-11: “Eh! You Israel ohana peopo! Trus Da One In Charge! He da one dat help you guys. He da one dat make shua you guys no get hurt. Eh! You pries guys dat come from Aaron! Trus Da One In Charge! He da one dat help you guys. He da one dat make shua you guys no get hurt. Eh! All you peopo dat feel jalike you sked wen you in front Da One In Charge! Trus Da One In Charge! He da one dat help you guys. He da one dat make shua you guys no get hurt.” Telling dose words ova an ova was going help da singas fo put dose spesho truts inside dea na‘au.

Why dey wen write um. Sometimes da Bible writas wen tell importan tings ova an ova. Like, wen Jehovah wen tell da Israel peopo fo no eat blood, he had Moses tell how come plenny times. God wanted fo make um clear dat da life of one animal o one guy stay in da blood, an dat blood rep life. (Pries 17:11, 14) Bumbye wen da aposals an eldas in Jerusalem wen write about wat Christians had fo stay away from fo make God happy, one moa time dey wen tell fo stay away from blood.​—Jesus Guys 15:20, 29.

Jehovah neva like us make one habit of telling da same scripchas in da Bible ova an ova. Like Jesus wen tell, “Wen you pray, no say da same ting ova an ova.” (Mat 6:7, NWT.) Den he wen tell tings dass good fo pray fo, dat God like. (Mat 6:9-13, NWT.) So even tho we no tell da same words ova an ova wen we pray, we can pray about da same tings ova an ova again.​—Mat 7:7-11, NWT.

Get good reasons how come da Bible tell some tings ova an ova. Dass one of da plenny ways oua Bestes Teacha teach us how fo live good.​—Isa 48:17, 18.