1. How come we need Jehovah fo show us wea fo go?

 TRY TINK, you stay los in da fores. Get danger all aroun you, wild animals, bugs an plants dat can make you sick, an big pukas you can fall inside. If you had somebody wit you dat could show you wea fo go an keep you away from da danger, you would be supa tankful. Dis world jalike dat fores, get plenny danger dat can jam up how tight we stay wit Jehovah. But cuz He da perfeck Guide, He can keep us away from da danger an can help us get to wea we going, da fo real kine life dat going las foeva in paradise.

2. How Jehovah show us wea fo go?

² How Jehovah show us wea fo go? Da main way is da Bible. But he even use peopo. Like “da akamai worka guy dat da boss trus” who give us da spiritual kaukau dat we need fo make good choices. (Mat 24:45, NWT.) Jehovah even use odda guys who know how fo show us da way fo go. We get circuit ovaseahs an da local hui eldas dat give us good kine words an show us how fo hando wen we get hard time. We so tankful Jehovah help us know wat fo do in dese hard times jus befoa da world come pau. Dis help us stay Jehovah’s fren so dat we can have one good life now an foeva.

3. Wat we going talk about in dis lesson?

³ But sometimes might be hard fo do wat Jehovah tell us fo do, speshly wen da guys telling us wat fo do no stay perfeck. How come? Wat dey tell might not be wat we like hear. O we might tink dat wat dey tell no make sense  an so we figga mus not come from Jehovah. Wen dat happen, we gotta trus dat Jehovah da one dat tell his peopo wea fo go. Wen we lissen, always going be good fo us. Fo help keep oua trus moa strong, in dis lesson we going look at (1) how Jehovah wen show his peopo wea fo go in Bible times, (2) how he stay doing um today, an (3) how going be good fo us if we follow him all da time.

HOW JEHOVAH WEN SHOW DA ISRAEL PEOPO WEA FO GO

4-5. How Jehovah had show he was using Moses fo show da Israel peopo wea fo go? (Go look da picha.)

⁴ Jehovah wen choose Moses fo be da guy da Israel peopo wen follow outa Egypt. He wen give dem proof dat He was using Moses fo show dem wea fo go. In da day time he wen use one cloud an night time he wen use fire. (Egypt 13:21) Wen Moses had follow da cloud dat wen take dem to da Red Sea, da peopo wen freak out cuz dey wen tink dey was trap between da sea an da Egypt army. Dey had tink Moses wen make one mistake bringing dem to da Red Sea. But no was. Jehovah wen use Moses fo lead da peopo dea on purpose. (Egypt 14:2) Den God wen save dem in one unreal way.​—Egypt 14:26-28.

⁵ Wen dey was in da boonies fo 40 years, Moses wen keep using da cloud fo know wea fo take God’s peopo. a Fo awhile Jehovah wen put da cloud by Moses tent wea all da Israel peopo could see um. (Egypt 33:7, 9, 10) From da cloud Jehovah wen talk to Moses an den he would tell da peopo wat Jehovah wen tell him. (Songs 99:7) Da Israel peopo had plenny proof dat Jehovah was using Moses fo show dem da way fo go.

6. Wen Jehovah had show da Israel peopo wea fo go, how dey wen ack? (Da Census 14:2, 10, 11)

⁶ Was sad cuz even tho had plenny proof dat Jehovah was using Moses fo show da peopo wea fo go, mos of dem neva like lissen. (Read um Da Census 14:2, 10, 11.) Ova an ova dey neva like go along wit da fact dat Jehovah was using Moses fo rep him. Cuz a dat Jehovah neva let dem go inside da Promise Land.​—Cens 14:30.

7. Give exampos of guys who wen follow wat Jehovah tell. (Da Census 14:24) (Go look da picha.)

⁷ But had some Israel peopo dat wen follow wat Jehovah wen tell. Fo exampo, Jehovah wen tell, “Caleb . . . wen stay tight wit me to da max.” (Read um Da Census 14:24.) Jehovah wen give Caleb good kine tings an even wen let him pick wea he like live in da Promise Land. (Josh 14:12-14) Da Israel peopo dat could go inside da Promise Land was good exampos cuz dey had lissen to wat Jehovah wen tell. Wen Joshua wen take Moses place as da leada fo da Israel peopo, dey wen “get plenny respeck fo him all da time he stay alive.” (Josh 4:14) Cuz a dat, Jehovah wen bless dem an bring dem inside da land he wen promise dem.​—Josh 21:43, 44.

8. Try tell how Jehovah wen show his peopo wat fo do in da time of da kings. (Go look da picha.)

⁸ Years layta, Jehovah wen pick local leadas fo tell his peopo wat fo do. Afta dat, in da time of da kings, Jehovah wen use guys dat talk fo him. Kings dat had  plenny trus wen follow wat da guys dat talk fo God wen tell. Like King David who was humbo an had lissen wen Nathan wen straiten him out. (2 Sam 12:7, 13; 1 Rec 17:3, 4) King Jehoshafat wen depend on Jahaziel fo know wat fo do an wen pump up da peopo fo “trus da guys dat talk fo [God].” (2 Rec 20:14, 15, 20) Wen he was in trouble, King Hezekiah wen ask Isaiah fo help. (Isa 37:1-6) Erytime da kings wen lissen to wat Jehovah wen tell, he wen bless an proteck dem. (2 Rec 20:29, 30; 32:22) Shoulda been easy fo see dat Jehovah was using da guys dat talk fo him fo show his peopo wat fo do. But mos of da kings an da peopo neva like lissen to dem.​—Jer 35:12-15.

HOW JEHOVAH WEN SHOW DA FIRS CHRISTIANS WAT FO DO

9. Who Jehovah wen use fo show da firs Christians wat fo do? (Go look da picha.)

⁹ Afta Jesus wen come back alive, Jehovah wen set up da Christian hui. How he wen show da firs Christians wat fo do? He wen pick Jesus fo be da head of da hui. (Efe 5:23) Jesus neva talk to each guy himself fo tell um wat fo do. He wen use da aposals an eldas in Jerusalem fo lead da peopo. (Jesus Guys 15:1, 2) An eldas wen get pick fo show da local huis wat fo do.​—1 Tess 5:12; Titus 1:5.

10. (a) How mos of da firs Christians wen ack wen dey wen hear wat fo do? (Jesus Guys 15:30, 31) (b) How come some in Bible times neva lissen to da guys Jehovah wen use? (Go look da box “ How Come Some No Believe.”)

¹⁰ Da firs Christians wen lissen, o wat? Mos of dem was happy fo follow wat dey wen hear. In fact, “dey come good inside, cuz da letta kokua dem.” (Read um Jesus Guys 15:30, 31.) But how Jehovah show his peopo wat fo do in oua time?

HOW JEHOVAH SHOW US WAT FO DO NOW

11. Tell one exampo how Jehovah stay show his leada guys da way fo go in oua time.

¹¹ Jehovah still yet stay lead his peopo today. He use da Bible an his Boy, da leada of da hui. Get proof dat Jehovah still use humans fo rep him? Fo shua. Try  tink wat wen happen afta da year 1870. Charles Taze Russell an his frenz started fo undastan dat 1914 was going be one importan year fo wen God’s Govament going start. (Dan 4:25, 26) Dey wen use wat da Bible tell fo figga dat out. Jehovah was helping dem wen dey wen go study da Bible, o wat? Yessah. Wat wen happen in da world in 1914 wen prove dat God’s Govament was in powa. World War I wen start an had all kine sick, earthquakes, an neva have enuff food. (Luk 21:10, 11) Fo shua Jehovah wen use dose guys who really wen love da Bible fo help his peopo.

12-13. Wen World War II was going on, wat da braddahs wen do so could preach even moa?

¹² Try tink wat wen happen wen World War II was going on. Afta dey wen study Jesus Show 17:8, some of da braddahs at world headqwatahs wen figga da war no was going end wit Armageddon. So dey wen know dat afta da war pau, was going have peace an da Witnesses Fo Jehovah could preach to moa peopo. Even if look like neva make sense, Jehovah’s hui wen start da Gilead School fo help missionaries learn how fo preach an teach all ova da world. Dey wen get sent out even wen da war was going on. On top of dat, da akamai worka guy wen start up one spesho school b in all da local huis fo help erybody come betta preachas an teachas. Dis how God’s peopo wen get ready fo do da preaching dat still had fo do.

¹³ Today, easy fo see dat Jehovah was showing his peopo wat fo do wen had hard time. Eva since World War II, in plenny diffren places, Jehovah’s peopo can preach an nobody bodda dem. Cuz a dat, plenny peopo wen come fo know who Jehovah.

14. How come we can trus wat Jehovah’s hui an da eldas tell us? (Jesus Show 2:1) (Go look da picha.)

¹⁴ Today da Luna Guys keep looking to Jesus fo show dem da way fo go. Dey like make shua dat wat dey tell da braddahs  match up to how heaven like um. An den dey use da braddahs from da circuit an da eldas fo tell da local huis wat fo do. c Da eldas dat go heaven stay in Jesus right hand. (Read um Jesus Show 2:1.) Of course, no moa perfeck eldas, dey all screw up sometimes. Moses an Joshua wen screw up sometimes, even da aposals. (Cens 20:12; Josh 9:14, 15; Rome 3:23) Still yet Jesus stay show da akamai worka guy an all da eldas wat fo do, an he going keep doing dat “ery day, till da world come pau.” (Mat 28:20) So we can trus da guys dat Jesus use fo show us da way fo go.

IS GOOD FO US WEN WE KEEP DOING WAT JEHOVAH TELL

15-16. Wat you learn from da guys dat wen lissen to wat Jehovah tell?

¹⁵ If we do wat Jehovah tell, always going be good fo us, even now. Fo exampo, wen da akamai worka guy wen tell fo live simpo, Andy an Robyn wen lissen. (Heb 13:5) Cuz dey wen do dat, dey could go help build Kingdom Halls an odda buildings fo Witnesses Fo Jehovah. Robyn tell, “We wen live in some real small places, plenny times neva even have one place fo cook. An I had fo sell plenny of my camera stuffs even if I wen love fo take pichas. I wen cry up. Jus like Abraham’s wife Sarah, I neva like be sad about wat I wen give up. I wen like be happy about wat I can do fo Jehovah now.” (Heb 11:15) Was good o wat dat dey wen do dat? Robyn tell, “We so happy fo know we giving Jehovah eryting we get. Wen we do da work Jehovah give us fo do, we can see wat life going be like in da new world.” Andy tink da same ting, he tell, “We stay happy cuz we go all out fo do da work Jehovah give us.”

¹⁶ Wat anodda way going be good fo us wen we do wat Jehovah tell? Afta she wen grad from high school, Marcia wen lissen to da advice she wen get an wanted fo pionea. (Mat 6:33, NWT; Rome 12:11) She tell, “I coulda gone one four year college fo free. But I wanted fo do moa fo Jehovah. So I wen choose fo go one tech school so I could learn  one trade an make enuff money fo pionea. Dass one of da bestes tings I eva wen do. Now I one happy full time pionea preacha an cuz I can choose wen I work, I can be one commuta Bethelite an do odda awesome kine tings fo Jehovah.

17. Wat odda good kine tings we get wen we lissen to wat Jehovah tell us? (Isaiah 48:17, 18)

¹⁷ Sometimes, Jehovah’s hui tell us tings dat proteck us from stuffs like loving money an doing tings wea we end up broking God’s rules. Wen come to dose tings, is good fo us follow wat Jehovah tell. Dat way, we stay clean inside cuz we know we stay do da right ting an we no going get extra problems. (1 Tim 6:9, 10) Cuz a dat, we can go all out an work fo Jehovah. Notting going make us moa happy.​—Read um Isaiah 48:17, 18.

18. How come you like always follow wat Jehovah tell us fo do?

¹⁸ Fo shua Jehovah going keep using peopo fo rep him fo tell us wat fo do in da big trouble an wen Jesus going rule as king fo tousand years. (Songs 45:16) We going lissen dem even wen we like do someting else? Going be moa easy if we follow wat Jehovah tell us now. So always follow wat Jehovah tell, an dat mean we even follow da guys He wen pick fo tell us wat fo do. (Isa 32:1, 2; Heb 13:17, NWT.) Wen we do dat, we trus dat oua perfeck Guide, Jehovah, going keep us away from spiritual kine danger an show us how fo get to da real kine life in da paradise.