1. Thru history, wat good attitude guys who wen serve Jehovah wen show?

 GARUNTEE you love Jehovah plenny! An you not da ony one. From long time ago, choke odda guys wen feel da same way az you. (Songs 104:33, 34) Plenny of dem wen make sacrifices fo serve Jehovah. Dass wat da Nazirites in Israel wen do befoa. Who was da Nazirites, an wat us can learn from dem?

2. (a) Who was da Nazirites? (Da Census 6:1, 2) (b) Why some Israel guys wen choose fo come one Nazirite?

² In Hebrew, “Nazirite” o “Nazir guy” mean “somebody dass separate,” o “somebody who diffren.” Da Nazirites was from da Israel peopo an dey wanted fo go all out fo Jehovah, an so dey wen make sacrifices fo serve Him in one spesho way. Unda da Rules from Moses, one guy o wahine could make one spesho promise to Jehovah fo live az one Nazirite fo some time. a (Read um Da Census 6:1, 2.) Wen dey wen make dat promise, dey had fo follow some stuff dat da res of da Israel peopo neva have fo follow. So den, why one Israel guy would choose fo come one Nazirite? Dey probly wen do um cuz dey had plenny love fo Jehovah an was tankful fo all  da good tings He wen do fo dem.​—Rules 6:5; 16:17.

3. How God’s peopo today jalike da Nazirites?

³ Once “Christ rules” wen take ova da Rules from Moses, nobody could be one Nazir guy. (Gal 6:2; Rome 10:4) But jus like dem, Jehovah’s peopo today go fo broke fo serve him wit eryting inside, wit how dey feel, how dey tink, an wit all dea powa. (Mar 12:30) We make dat promise fo do dat wen we give ouaselfs to Jehovah. Fo live up to dat promise, we gotta do wat Jehovah like an make sacrifice fo serve him. Wen we check out how da Nazir guys wen live up to dea promise, we can learn plenny tings on how fo live up to ouas. b (Mat 16:24) We go check um out.

MAKE SACRIFICES

4. From Da Census 6:3, 4, wat sacrifice da Nazir guys wen make?

⁴ Read um Da Census 6:3, 4. One Nazir guy had fo stay away from alcohol an no could eat tings like grapes an raisins. Odda Israel guys wen drink wine an eat grapes an raisins cuz notting was wrong wit dose tings. Da Bible even tell, “wine dat make um feel good inside” is one gif from God. (Songs 104:14, 15) Even tho dose tings can make you feel good, da Nazirites wen sacrifice all dat. c

5. Wat kine sacrifice Madián an Marcela wen choose fo make, an how come?

⁵ Us too make sacrifices fo do moa fo Jehovah, jus like da Nazirites wen do. Jalike one coupo, Madián an Marcela, d who was loaded. Cuz Madián had one good job, dey could live in one supa nice apartment. But dey wanted fo do moa fo serve Jehovah. Fo do dat, dey wen choose fo make some changes. Dey wen say, “We wen start fo spen less money . . . we wen move to one smalla apartment, an we we sell oua car.” Madián an Marcela neva have to make dose sacrifices, but dey wen choose fo do um cuz dey wanted fo do moa fo Jehovah. Dey wen feel real good about da choice dey wen make an dey was happy.

6. How come Christians make sacrifices? (Go look da picha.)

 ⁶ Christians today happy fo make sacrifices fo do moa fo Jehovah. (1 Cor 9:3-6) Jehovah no force us fo make dese sacrifices, an da tings we give up, notting wrong wit um. Like some peopo give up one job dey like, owning dea own house, o even one pet. Plenny wen wait fo get married o have kids. Oddas wen go wea need moa help fo preach, even tho dey stay far from dea family an dea frenz. Plenny of us choose fo make dis kine sacrifices cuz we like give Jehovah oua bes. Wen we choose fo give up stuff fo do moa fo Jehovah, wedda big o small, rememba dat dis mean plenny to him.​—Heb 6:10.

BE READY FO BE DIFFREN

7. How come was hard fo one Nazirite stick to his promise? (Da Census 6:5) (Go look da picha.)

⁷ Read um Da Census 6:5. Da Nazirites wen make one promise fo no cut dea hair. Dat was one way dat wen show dey was going do wateva Jehovah wanted dem fo do. If one guy was one Nazirite fo long time, his hair would be long an erybody would be able fo see dat. Would be easy fo him if erybody aroun him wen help him stick to his promise. But sad fo say, dass not how was. Had times wea da Israel peopo neva respeck da Nazirites, o back dem up. Wen Amos wen talk fo God, da Israel peopo who was apostates, wen probly give dem wine fo “make da Nazir guys broke dea rules an drink wine.” (Amos 2:12) So wen take courage fo one Nazir guy fo stick to his promise an be diffren from erybody.

8. Wat you like about wat wen happen to Benjamin?

⁸ Even if we stay shy, Jehovah can help us fo have da guts fo be diffren. Try look wat wen happen to one ten year old Witness boy who live in Norway, name Benjamin. His school wen have someting fo support da peopo in Ukraine cuz of da war going on ova dea. Dey wen tell da kids fo dress in Ukraine’s national colors an sing one song. Benjamin wen plan fo no get involved by staying far away from wea dey was doing um. But one teacha wen spock him an wen yell, “Eh! Get ova hea. We all stay waiting fo you!” Benjamin wen show courage an go up to da teacha an say, “I no take sides. I no get  involved wit politics stuff. Jus like odda Witnesses Fo Jehovah, dey stay lock up cuz dey no go war.” Da teacha was good wit dat an wen tell Benjamin dat he neva need do um. But den da odda kids wen ask him how come he not doing um. Benjamin was so nervous he almos started fo cry. But he still yet wen have da guts fo tell da whole class wat he wen tell da teacha. Layta on, Benjamin wen tell his parents dat he wen feel like Jehovah wen help him fo stan up fo wat he believe.

9. How we can make Jehovah feel real good inside?

⁹ Cuz we choose fo lissen to Jehovah, we diffren from erybody else an we stan out. Take courage fo tell da guys at work o school dat we one Witness Fo Jehovah. Cuz da world getting moa worse, ony going get moa hard fo live by da Bible an preach to peopo. (2 Tim 1:8; 3:13) No foget dat we “make [Jehovah] feel real good inside” wen we show courage an stan out az diffren from all da odda peopo dat no serve him.​—Smart Guys 27:11; Mal 3:18.

KEEP JEHOVAH NUMBA ONE IN YOA LIFE

10. How come wat tell at Da Census 6:6, 7 maybe was hard fo one Nazir guy?

¹⁰ Read um Da Census 6:6, 7. Nazirites no could go by one dead body. Maybe dat no seem like one big deal. But fo one Nazir guy, dat woulda been hard if somebody in dea ohana dey was close to wen mahke. Funerals dat time, da peopo had fo go by da body dat wen mahke. (John 19:39, 40; Jesus Guys 9:36-40) But cuz of da Nazir guy’s promise he wen make, he no could do dat. Wen take solid faith fo one Nazirite keep his promise speshly wen da ohana was all sad. Garans Jehovah wen help dese guys stay strong wen came to all da hard stuff dey had fo go thru.

11. Wat one Christian gotta make up his mind fo do wen dealing wit da ohana? (Go look da picha.)

¹¹ Az one Christian, da promise we wen make to Jehovah dat we going give oua life to him, we take um serious. Dis affeck wat we do an da choices we make wen come to da ohana. We work hard fo take kea oua kuleana in da ohana,  but we neva put wat dey like ova wat Jehovah like. (Mat 10:35-37; 1 Tim 5:8) Wen we choose fo make Jehovah happy, sometimes da family might get huhu wit us.

12. How Alexandru wen ack wen came to da hard ting he was going thru wit his wife?

¹² Try look wat wen happen to Alexandru an his odda half, Dorina. Dey was studying da Bible but afta one year Dorina wen stop, an she wanted Alexandru fo stop too. But he wen keep his cool an in one nice way he wen tell her he wasn’t going stop. Dorina neva like dat an she wen try force him fo stop studying. Wasn’t easy fo Alexandru, but he wen try undastan how come she wen feel lidat. Sometimes Dorina would say stuff to him dat would make him like give up his studies. But still yet, he neva give up an wen put Jehovah firs, an same time he wen show his wife plenny love an respeck. In da end, cuz of da good tings he wen do, dat wen make her like study again an she even wen get baptized.​—Go look jw.org da video Alexandru and Dorina Văcar: “Love Is Patient and Kind” in da series “Truth Transforms Lives.”

13. How we can show love fo Jehovah an oua ohana?

¹³ Jehovah wen make us fo have one ohana, an he like all us inside um fo be happy. (Efe 3:14, 15) If we like be fo real happy, we gotta do tings da way Jehovah like us do um. All da hard work an sacrifice you make fo serve Jehovah an take kea yoa family an treat dem wit love an respeck, know dat Jehovah is real happy wit dat.​—Rome 12:10.

KOKUA EACH ODDA FO BE LIKE DA NAZIR GUYS

14. Who we like try build up wit oua words?

¹⁴ Erybody who choose fo worship Jehovah today gotta make sacrifices cuz dey love him. But sometimes, az hard fo do. How we can help each odda out fo make dose sacrifices? By building each odda up wit oua words. (Job 16:5) Get guys in yoa local hui dat trying fo live moa simpo so dey can do moa fo Jehovah? Get young guys who show courage an stan out az diffren in school, even tho not easy? Get Bible studies an braddahs an sistahs who struggling cuz dea ohana giving dem hard time? Ery chance we get, mahalo  dem fo da sacrifices dey make an da courage dey show fo serve Jehovah.​—Fil 4, 5, 7.

15. How some wen kokua da guys who stay working fo Jehovah full-time?

¹⁵ Sometimes we can help oua braddahs an sistahs who working fo Jehovah full-time wit da tings dey need. (Smart Guys 19:17; Heb 13:16) Dass wat dis olda sistah in Sri Lanka wanted fo do. She wen start fo get moa money in her pension an she wanted fo help out two young pionea sistahs who was struggling cuz times was hard. So ery month she wen give dem da same amount of money fo help dem pay fo dea phone bill. Dass so nice wat da sistah wen do!

16. Wat us can learn from da Nazirites?

¹⁶ All us can learn plenny from da guys who wen choose fo be Nazirites. Learning about da Nazirites teach us about oua Faddah, Jehovah, too. He know we really like make him happy an dat we going make sacrifices fo do da tings we wen promise him. He show us plenny respeck by letting us choose fo show oua love fo him. (Smart Guys 23:15, 16; Mar 10:28-30; 1 John 4:19) Da way dat Jehovah wen set up da Nazirites show dat he see an he love all da sacrifices we make fo serve him. So we go make up oua mind fo no stop serving Jehovah, an keep giving him oua bes.