STUDY LESSON 5
SONG 108 God’s Solid Love
Da Blessings We Get Cuz Jehovah Love Us
“Jesus wen come hea inside dis world, fo take peopo outa da bad kine stuff dey stay do.”—1 TIM 1:15.
MAIN TING WE GOIN LEARN
Da blessings we get cuz of da ransom an how we can show Jehovah we tankful.
1. Wat we can do fo make Jehovah happy?
TRY picha giving somebody you love one spesho gif dass beautiful an dat dey can use. You would feel so bum out if dey jus put um away an foget about um. On da odda hand, you would feel real good if dey wen use yoa gif an show you dey wuz tankful. Wat dis gotta do wit Jehovah’s gif of da ransom? Jehovah wen give his Boy fo die fo us. So Jehovah must be real happy wen we show we tankful fo dat spesho gif an fo his love, dat wen make him like give us da ransom!—John 3:16; Rome 5:7, 8.
2. Wat we goin talk about in dis lesson?
2 Ova time we might not be az tankful fo da ransom az we wuz befoa. Az like we pack up Jehovah’s gif an put um away. We happy fo have um but we no even tink about um. Fo make shua dis no happen, all da time we gotta tink about wat God an Christ wen do fo us. Dis lesson can help us do dat. We goin talk about da blessings we get from da ransom now an how we can get um in da future. An we goin check out wat we can do fo show we tankful fo Jehovah’s love, speshly befoa an afta da Meeting Fo Rememba.
DA BLESSINGS WE GET NOW
3. Wass one blessing we get from da ransom right now?
3 We awready getting blessings from Jesus sacrifice. Fo exampo, cuz of da ransom, Jehovah fogives oua sins. He no need fogive us. But he like. Da song writa wen tell, “You my Boss, an you get one good heart. You stay ready erytime fo let me go fo da bad tings I wen do.”—Songs 86:5; 103:3, 10-13.
4. Who Jehovah wen give da ransom fo? (Luke 5:32; 1 Fo Timoty 1:15)
4 Some of us feel we no deserve fo have Jehovah fogive us. Iz tru, we all no deserve um. Even da aposal Paul wen feel lidat too cuz he tell, “I not good enuff fo peopo call me one messenja guy fo God. But God, he unreals good to me! He wen make me come how I stay now.” (1 Cor 15:9, 10) Wen we come sorry fo oua sins, Jehovah fogive us. How come? Not cuz we deserve um but cuz he love us. If you get hard time cuz you feel like Jehovah no goin fogive you, rememba dat Jehovah neva give da ransom fo perfeck peopo, he wen give da ransom fo sinners dat come sorry.—Read um Luke 5:32; 1 Fo Timoty 1:15.
5. Iz right fo feel like Jehovah gotta fogive us?
5 Nobody should feel dat Jehovah gotta fogive dem jus cuz dey wen serve him fo long time. Of course, Jehovah rememba all da tings we wen do fo him. (Heb 6:10) He wen give da ransom az one gif fo free, not fo pay us back fo all da good tings we wen do fo him. So if we tink we deserve Jehovah’s fogiveness cuz of wat we wen do fo him, den dass jalike we saying we no need da ransom an Jesus wen die fo notting.—Go check Fo Da Galatia Peopo 2:21.
6. How come Paul wen work hard fo Jehovah?
6 Paul wen kno dat no matta wat he do fo Jehovah, Jehovah neva need fogive him. But den how come he wen work so hard fo Jehovah? He neva do um fo try show he deserve um, but fo show dat he wuz tankful fo Jehovah’s free gif of love. (Efe 3:7) Like Paul, we keep goin all out fo serve Jehovah, not fo get his mercy, but fo show we tankful fo it.
7. Wass anodda blessing we get from da ransom right now? (Fo Da Rome Peopo 5:1; From James 2:23)
7 Anodda blessing we get from da ransom right now iz dat we can come close to Jehovah. a Like we wen talk about in da las lesson, wen we born, az not automatic dat we frenz wit God. But cuz of da ransom, we can be pono wit God an come close to him.—Read um Fo Da Rome Peopo 5:1; From James 2:23.
8. How come we should be tankful dat we can pray to Jehovah?
8 Praying to Jehovah iz someting spesho we can do cuz we stay tight wit him. Jehovah no ony hea da prayas we say out loud wen we at da meeting or aroun odda peopo, but he even hea da prayas we tell wen we by ouaself. Wen we pray, we no feel az stress. But dass not da ony ting good about praya. It can make oua frenship wit God moa strong. (Songs 65:2; Jam 4:8; 1 From John 5:14) Wen Jesus wuz on eart, he wen pray all da time cuz he wen kno Jehovah wuz lissening to him an dat wuz goin keep him tight wit his Faddah. (Luk 5:16) We so tankful dat cuz of Jesus sacrafice we get da chance fo be frenz wit Jehovah an talk to Him in praya!
WAT KINE BLESSINGS WE CAN GET IN DA FUTURE
9. Wat kine blessings faitful worshipas can get in da future from da ransom?
9 Wat kine blessings Jehovah’s faitful worshipas can get in da future from da ransom? Dey goin get fo live foeva. Plenny guys tink dat dis no can happen cuz peopo been dying fo tousands of years. From da start, Jehovah wanted peopo fo live foeva. If Adam neva sin, nobody would tink dat living foeva iz too good fo be tru. Even tho seem unreal fo live foeva right now, we can trus dass goin happen, cuz Jehovah wen pay one unreal price fo make dat come tru, he wen give up his Boy’s life.—Rome 8:32.
10. Wat kine life da anointed an da odda sheep no can wait fo?
10 Even tho living foeva iz one blessing dass goin happen bumbye, Jehovah like us tink about um right now. Da anointed no can wait fo go heaven an rule ova da eart wit Jesus. (Jesus Show 20:6) Da odda sheep no can wait fo live on paradise on eart wit no moa pain an suffaring. (Jesus Show 21:3, 4, NWT.) You one of da odda sheep who get da hope fo live foeva on eart? Dis blessing iz jus az spesho az living in heaven! Jehovah wen make us fo live foeva on eart, so living foeva ova hea goin make us supa happy.
11-12. Wass some blessings in Paradise we no can wait fo? (Go look da pichas.)
11 Try picha wat yoa life goin be like in Paradise. You no need worry about getting sick or dying. (Isa 25:8; 33:24) Jehovah goin give you all da good tings you like. Wat kine tings you like learn about? You like learn moa about da animals? You like learn how fo play one instrument? Or draw? In Paradise, we goin need farmas, an peopo dat kno how fo design an build houses. An we goin need peopo fo grow an make food, make tools, an plant gardens, an take kea of um. (Isa 35:1; 65:21) Wen you live foeva, you goin have plenny time fo learn how fo do all dis an moa.
12 We goin be so happy fo see da guys who wen mahke come back to life! (Jesus Guys 24:15) Try tink how much fun you goin have learning moa about all da tings Jehovah wen make. (Songs 104:24; Isa 11:9) An da bes part iz you neva goin sin again, so you can worship Jehovah an you neva goin need fo feel sorry again. You would give up life in Paradise jus fo live one life dat goin make you happy ony now? (Heb 11:25) No ways! Da unreal life we goin have iz moa betta den anyting we goin get in dis world right now. Rememba, da Paradise eart iz not always someting we goin be waiting fo. Pretty soon we goin live in um eryday. Da ony way we could get all dis iz cuz Jehovah wen love us so much dat he wen give up his Boy!
Wass some blessings in Paradise you no can wait fo? (Go look numba 11-12)
SHOW YOU TANKFUL FO JEHOVAH’S LOVE
13. How we show we tankful fo Jehovah’s love? (2 Fo Da Corint Peopo 6:1)
13 How we can show we tankful to Jehovah fo giving us da ransom? By making shua dat serving him iz da mos importan ting in oua life. (Mat 6:33, NWT.) Cuz Jesus wen mahke so dat “da peopo dat stay alive fo real kine no do stuffs fo ony dem no moa. Dey do eryting ony fo Christ, da Guy dat wen mahke fo dem an wen come back alive.” (2 Cor 5:15) Wen we go all out fo Jehovah we show dat we no foget how much he wen do fo us.—Read um 2 Fo Da Corint Peopo 6:1.
14. How we show we trus Jehovah an do da tings he like us fo do?
14 We even can show we tankful fo Jehovah’s love by trusting him an doin da tings he like us fo do. Wen we gotta choose wat fo do, like how much skool we need or wat kine job we goin work, we gotta tink about wat Jehovah like us do. (1 Cor 10:31; 2 Cor 5:7) Wen da tings we choose fo do iz cuz of oua fait in Jehovah, den oua fait in him an oua frenship wit him goin grow stronga. An oua hope fo live foeva come moa real to us.—Rome 5:3-5; Jam 2:21, 22.
15. How we can show we tankful befoa an afta da Meeting Fo Rememba?
15 Get anodda way dat we show we tankful fo Jehovah’s love. By goin all out fo show Jehovah how tankful we stay befoa an afta da Meeting Fo Rememba. We like make shua dat we go to da Meeting Fo Rememba but we like invite oddas fo go too.(1 Tim 2:4) Tell da ones who you wen invite wat goin happen at dis meeting. Goin be good fo show dem on top jw.org/hwc da videos How Come Jesus Had Mahke? an Jesus’ Death, No Foget Um. Eldas should make shua fo invite guys dass inactive. Try tink how happy erybody in heaven an eart goin be if some of Jehovah’s los sheep come back to him! (Luk 15:4-7) At da Meeting Fo Rememba, we like try oua bes fo go up to erybody but speshly da guys who stay new or neva come long time. We like make dem feel welcome!—Rome 12:13.
16. Why you should try fo do moa in yoa preaching befoa an afta da Meeting Fo Rememba?
16 You can do moa in yoa service befoa an afta da Meeting Fo Rememba? Dis one good way fo show you stay tankful fo all dat Jehovah an Jesus wen do fo you. Da moa we go preach da moa we goin see Jehovah help us an oua trus in him goin grow stronga. (1 Cor 3:9) Do yoa bes fo follow da Meeting Fo Rememba Bible reading in da Examining the Scriptures Daily or in da chart das in da middo of da week meeting workbook. You can choose fo use dat Bible reading fo one study projeck.
17. Wat make Jehovah happy? (Go look da box “ How We Can Show We Tankful Fo Jehovah’s Love.”)
17 Maybe cuz of tings goin on in yoa life you no can do eryting in dis lesson. Jehovah no compare wat you do wit wat oddas do, he like wen you give from da heart. He happy fo see how tankful you are fo da ransom.—1 Sam 16:7; Mar 12:41-44.
18. How come we tankful fo Jehovah an Jesus?
18 Jehovah can fogive oua sins, we can be frenz wit him, an have da hope fo live foeva, ony cuz of da ransom. We like always show we tankful fo Jehovah’s love, cuz dass wat wen make him like give us all dese blessings.(1 John 4:19) An we like show we tankful fo Jesus cuz he love us so much dat he wen mahke fo us!—John 15:13.
SONG 154 Love No Moa End
