STUDY LESSON 1
SONG 2 Jehovah, Das Your Name
Give Jehovah Respeck
OUA YEARTEXT FO 2025: “Give Jehovah da respeck his name suppose to get.”—SONGS 96:8, New World Translation.
MAIN TING WE GOIN LEARN
Learn how fo give Jehovah da respeck he deserve.
1. Wat plenny peopo today kea about?
PLENNY peopo today no kea about odda peopo. Dey ony kea about demselfs. Like on social media, peopo brag about demselfs an all da stuff dey doin. But ony litto bit peopo give Jehovah respeck. In dis lesson, we goin talk about wat mean fo respeck Jehovah an why we should do um. An we goin learn how we can give Jehovah da respeck he deserve an how pretty soon he goin show how awesome he stay.
WAT MEAN FO TELL HOW AWESOME JEHOVAH STAY?
2. How Jehovah wen show how awesome him at Mount Sinai? (Go look da picha.)
2 Da Bible show dat Jehovah iz one awesome God. He wen show dis a few days afta he wen let da Israel peopo go from Egypt. Try picha dis. Millions of da Israel peopo wen hui up at da bottom of Mount Sinai fo hea wat Jehovah wuz goin tell dem. One dark cloud wen cova da whole mountain. Da groun wen shake plenny an had lightning, thunda, an da soun of one loud horn. (Egypt 19:16-18; 24:16, 17; Songs 68:8) Wen Jehovah wen do all dis an show how awesome he stay, garanz dis wen blow da Israel peopos minds.
Jehovah wen show da Israel peopo at Mount Sinai how awesome him (Go look numba 2)
3. How we can show oddas how awesome Jehovah?
3 We can help odda peopo fo see dat Jehovah iz one awesome God too. One way we can do dat iz by telling oddas about his unreal powa an his good qualities. Anodda way we show how awesome Jehovah, iz wen we give him da credit fo all da tings he help us wit. (Isa 26:12) King David iz one good exampo of somebody who wen do dis. Wen he had pray in front all da Israel peopo, he wen say to Jehovah, “You da One stay real importan. You strong. You stay awesome. You da winna foeva! You stay unreals, cuz you own eryting inside da sky an on top da earth.” Afta David wen pau his praya, “all da peopo dat come togedda dea, tell “Mahalo!” to Da One In Charge.”—1 Rec 29:11, 20.
4. How Jesus wen show how awesome Jehovah?
4 Wen Jesus wen do miracles on top da eart, he wen show how awesome his Faddah wuz by telling peopo dat Jehovah wuz da one who wen give him da powa fo do um. (Mar 5:18-20) Anodda way Jesus wen show how awesome his Faddah stay wuz by da way he wen talk about his Faddah an da way he wen treat odda peopo. One time wen Jesus wuz teaching da peopo, had one wahine who wuz possessed by one demon fo 18 years. Dis bad kine spirit wen make her so she wuz bent ova an no could stan up strait. Jesus wen undastan dat she wuz suffaring plenny an wanted fo help her. So he wen go up to her an talk to her real nice kine. He wen tell her, “Sistah, I make you come good from all yoa sick!” Den he wen put his hands on top her, “an right den an dea she stan up strait an tell how awesome God stay.” She wuz so tankful Jehovah wen make her good again. (Luk 13:10-13) Dat wahine, an all us, get good reason fo tell how awesome Jehovah.
WHY WE LIKE TELL HOW AWESOME JEHOVAH?
5. Wat reasons we get fo respeck Jehovah?
5 We tell how awesome Jehovah cuz we get plenny respeck fo him. We get choke reasons fo respeck him. Jehovah get da powa fo do anyting he like, an he neva get tired. (Songs 96:4-7) From all da stuff he had make, we can see how smart him. He wen give us life an eryting we need fo live. (Jesus Show 4:11) He stay tight wit his peopo. (2 Sam 22:26) Eryting he do come out good, an he keep his promises. (Josh 23:14) Dass why da prophet Jeremiah wen say about Jehovah, “Da diffren peopos get dea guys dat know wat fo do erytime, An dey get dea kings, But still yet no mo nobody stay jalike you!” (Jer 10:6, 7) We get plenny reasons fo respeck oua Faddah. But we no ony respeck Jehovah, we love him.
6. Why we love Jehovah?
6 We tell how awesome Jehovah cuz we love him. We go check out some of da good qualities Jehovah get dat make us love him. He get pity an show plenny aloha fo us. (Songs 103:13; Isa 49:15) He feel fo us wen we hurt. (Zek 2:8) He make um easy fo us come real close to him an be his fren. (Songs 25:14; Jesus Guys 17:27) An he humbo, “he bend down fo see wass happening inside da sky an da earth. Da peopo dat no can do notting, [he] pick dem up outa da dirt.” (Songs 113:6, 7) Cuz of all dis, we like tell how awesome Jehovah stay.—Songs 86:12.
7. Wat spesho chance we get?
7 We tell how awesome Jehovah cuz we like oddas kno him. Plenny peopo donno da trut about Jehovah. How come? Cuz Satan tell plenny bulais about him an peopo believe um. (2 Cor 4:4) Satan wen get peopo fo believe dat Jehovah always mad, he no kea about us, an he da one dat make us suffa. But we kno da trut about Jehovah. We get da chance fo shut down all da lies about Jehovah an help erybody see how awesome him. (Isa 43:10) Songs 96 focus on giving Jehovah respeck. Az we go ova dis Song, tink about ways you can give Jehovah da respeck he deserve.
HOW WE CAN GIVE JEHOVAH DA RESPECK HE DESERVE?
8. Wat iz one way we can show respeck fo Jehovah? (Songs Fo God 96:1-3)
8 Read um Songs Fo God 96:1-3. We can show respeck to Jehovah by wat we say about him. Dese verses tell us fo “Sing fo Da One In Charge,” fo “tell how he da kine God dat give you da powa fo do eryting he like you fo do,” fo “tell da good stuff bout how he get you outa trouble,” an “wen you stay wit da diffren nations tell da story bout how awesome Da One In Charge stay!” All dese iz ways we can show respeck fo oua Faddah in da heaven. Jehovah’s peopo in da pas neva hold back from telling all da good tings Jehovah wen do fo dem. (Dan 3:16-18; Jesus Guys 4:29) How we can copy dem?
9-10. Wat you wen learn from wat had happen to Angelena? (Go look da picha.)
9 Try look wat wen happen to Angelena, a one sistah who live in da United States. She wen show courage an talk about Jehovah wea she work. Wen she firs started working ova dea, all da new workas had one meeting wea dey could share someting about demself. Angelena wen get some pichas ready fo show how happy she stay az one Witness Fo Jehovah. But right befoa she wen talk, anodda worka wen tell erybody dat he wuz raise az one Witness Fo Jehovah. He wen start fo talk stink about da Witnesses. Angelena wen say, “My heart wuz pounding. But I wen tink to myself, I goin let somebody tell bulais about Jehovah? Or I goin stan up fo Him?”
10 Wen her workmate wuz pau talking, Angelena wen say one quick praya. Den she wen tell um in one nice kine way, “I wen grow up same like you, I wuz raise one Witness Fo Jehovah too, an I still one Witness.” Even tho wuz small kine stressful, Angelena wen stay calm. She wen show her workmate da pichas of her an her frenz all happy serving Jehovah an she wen tell um wat she believe. (1 Pet 3:15, NWT) Wat wen happen cuz of dat? Wen Angelena wuz pau talk, da guy wen calm down. He even wen talk about some of da good tings dat wen happen growing up az one Witness. We gotta defend Jehovah an tell da trut about him, he deserve dat. Wen oddas disrespeck Jehovah, we get da spesho chance fo stan up fo him an show him respeck.
We can show Jehovah respeck by da way we talk, da tings we get, an da way we ack (Go look numba 9-10, 12, 14) b
11. Tru da years, how Jehovah’s peopo wen do wat tell at Songs Fo God 96:8, NWT?
11 Read um Songs Fo God 96:8. We can show respeck fo Jehovah wit da stuff dat we get. Jehovah’s peopo wen always show him respeck lidat. (Smart Guys 3:9) Like da Israel peopo wen give money an odda stuff fo build da temple an take kea of um. (2 Ki 12:4, 5; 1 Rec 29:3-9) Some of Jesus followas wen “use dea money fo help take kea” Jesus an da aposals. (Luk 8:1-3) Da Bible say dat wen some Christians wen suffa cuz neva have nuff food, dea braddahs an sistahs who live someplace else wen give wat dey could. (Jesus Guys 11:27-29) Today, us too can show respeck fo Jehovah wit oua donations.
12. How oua donations can show Jehovah respeck? (Go look da picha.)
12 Try look someting dat wen happen dat show how oua donations show respeck fo Jehovah. One 2020 report wen tell wat wen happen wen neva have watta fo long time in Zimbabwe. Millions ova dea almos wen mahke cuz neva have nuff food, even one sistah name Prisca. Even tho da situation dea wuz supa bad, Prisca still wen preach ery Wednesday an Friday, even wen wuz plowing season. Her neighbas wen make fun of her fo goin preaching radda den working. Dey wen say, “You goin starve.” Prisca wen kno fo shua dat Jehovah would take kea her, so she wen say, “Jehovah neva goin let his peopo down.” Litto while afta dat, oua hui wen sen relief supplies, an she wen benefit from dat. Prisca wen get food an odda stuff she wen need cuz of da tings ery one of us donate. Prisca’s neighbas wuz blown away an dey wen tell her, “God always help you. We like kno moa about him.” Seven of her neighbas wen start fo go meetings wit da local hui.
We can show respeck fo Jehovah wit da stuffs we get (Go look numba 12) c
13. How da way we ack can show we respeck Jehovah? (Songs Fo God 96:9)
13 Read um Songs Fo God 96:9. We show respeck fo Jehovah by da way we ack. Da prieses had fo wash an be clean wen dey go work at Jehovah’s temple. (Egypt 40: 30-32) Even moa importan den keeping oua body clean, da way we ack gotta be clean. (Songs 24:3, 4; 1 Pet 1:15, 16) Da Bible tell us fo “throw out da ol kine way,” an “live da new kine way.” Dat mean we need fo stay away from wrong kine tinking an acking da way Jehovah no like. We gotta tink an ack in one way dat show we copy Jehovah an his good qualities. (Col 3:9, 10) Wit Jehovah’s kokua, even da mos pilau guys can change an live da new kine way.
14. Wat you learn from wat wen happen to Jack? (Go look da picha.)
14 Try look wat wen happen to Jack, one violent an dangerous guy dat peopo wen call Da Demon. Cuz da stuff he wen do wuz so bad, dey wen give him da death penalty. While he wuz on death row, one braddah wen visit da prison an ask him fo study da Bible, an he wen start fo study. Even tho Jack wen do plenny bad tings, he wen change an layta on get baptize az one Witness Fo Jehovah. Jack wen change so much dat on da day dey wuz goin put um to death, some of da prison guards wen cry wen dey wen tell um bye. One soldier dat wen work at da prison wen say, “Jack wuz one of da worstes guys ova hea, but now he one of da bes.” Da week afta Jack wuz put to death, wen da braddahs had go back fo do da meeting, had one prisona dea fo da firs time. Wat wen make him go to da meeting? He wuz so blown away by how much Jack wen change, he wanted fo kno wat he needed fo do fo worship Jehovah. Dis help us fo see dat da way we ack can bring respeck to oua Faddah in heaven!—1 Pet 2:12.
We can show respeck fo Jehovah by da way we ack (Go look numba 14) d
HOW JEHOVAH GOIN PROVE HE DESERVE FO BE WORSHIPPED?
15. How Jehovah goin show erybody he deserve fo be worshipped in da future? (Songs Fo God 96:10-13)
15 Read um Songs Fo God 96:10-13. Dese las verses in Songs 96 tell how Jehovah iz one fair Judge an King. How Jehovah goin prove he deserve fo be worhsipped in da future? By making eryting right. Pretty soon he goin smash Babylon Da Great fo all da bad tings she wen do an all da lies she wen tell about him. (Jesus Show 17:5, 16; 19:1, 2) Some guys who see dat happen might start fo worship Jehovah wit us. An den at Armageddon, Jehovah goin wipe out Satan’s world an anybody who hate him an tell lies about him. But, he goin save dose who love him, lissen to him, an who like show him respeck. (Mar 8:38; 2 Tess 1:6-10) Wen Christ pau rule az King fo tousand years an afta da final tes, Jehovah goin prove he deserve fo be worshipped by erybody. (Jesus Show 20:7-10) Wen dat happen, “jalike da watta fill up all da oceans, all da peopo dat fill up da world goin know how awesome [Jehovah].”—Hab 2:14.
16. Wat you wen make up yoa mind fo do? (Go look da picha.)
16 Goin be so awesome wen erybody alive goin give Jehovah da respeck he deserve! But till dat time come, ery chance we get, we can talk about Jehovah an ack in one way dat show how awesome him. Fo focus on dis importan kuleana, Jesus Luna Guys wen choose Songs Fo God 96:8, NWT az oua yeartext fo 2025, “Give Jehovah da respeck his name suppose to get.”
Pretty soon erybody goin give Jehovah da respeck he deserve! (Go look numba 16)
SONG 12 Awesome Jehovah
a Some names wen get change.
