1. Why Jehovah wen give us da gif of marriage?

 JEHOVAH “stay . . . good inside,” an he like us fo be happy too. (1 Tim 1:11) He wen give us all kine gifs fo help us have one good life. (Jam 1:17) One of dose gifs iz marriage. Wen one man an one lady get married, dey promise fo love an respeck each odda. Wen dea love fo each odda iz strong, both of dem can be supa happy.​—Smart Guys 5:18.

2. How plenny husbans treat dea wifes today?

² Sad fo say, plenny husbans an wifes today wen foget da promises dey wen make to each odda on dea wedding day. An cuz of dat, dey no stay happy. From one study not too long ago, some expert guys wen see dat plenny husbans bus up dea wifes, say mean tings to dem, or treat dem bad in odda ways. One husban who do dis might treat his wife good in front oddas, but den treat her bad at home. An plenny husbans look at porn, an dis can mess up da marriage to.

3. How come some husbans treat dea wifes bad?

³ How come some husbans treat dea wifes bad? Maybe dea faddah wuz violent to dea maddah so dey tink iz ok fo do da same ting to dea wife too. Odda guys treat dea wifes bad cuz dass wat mos guys in dea culture do. Dese guys maybe feel like dey gotta be mean lidat so dat da wife kno who’s boss an dat he “da man.” Odda guys neva learn how fo hold back how dey feel, even wen dey angry. Some guys watch porn all da time an dat can make dem look at wahines an sex da wrong way. On top of dat, studies had show dat da COVID-19 pandemic had make all dese problems  moa worse. But none of dese tings make um ok fo one husban treat his wife bad.

4. Wat Christian husbans gotta watch out fo, an how come?

⁴ Husbans who serve Jehovah gotta watch out fo no let da world’s wrong tinking of wahines affeck dea tinking. a How come? One reason iz cuz, how somebody tink, dass how he goin ack. Da aposal Paul wen tell da anointed Christians in Rome fo “no do wat da peopo nowdays stay tell you fo do!” (Rome 12:1, 2) Wen Paul had write to dem, da guys in dat hui wuz Christians fo years awready. But, from wat Paul wen tell, it had show dat da customs an tinking of da world still had one stong pull on some in da hui. Dass why he wen help dem fo see dat dey had fo change how dey tink an ack. Wat Paul wen tell iz good fo Christian husbans today too. So sad how da world’s tinking wen affeck some of dem, an dey wen even abuse dea wife. b How Jehovah expeck one husban fo treat his wife? Da ansa stay in da main scripcha fo dis lesson.

5. From wat 1 From Peter 3:7 tell, how one husban gotta treat his wife?

⁵ Read um 1 From Peter 3:7. Jehovah tell husbans dey gotta respeck dea wife. One husban who respeck his wife goin be nice to her an show her love. In dis lesson, we goin see how one husban can show respeck to his wife. But firs, we go talk about tings dat one husban should neva do to his wife.

NO DO NOTTING DAT GOIN HURT YOA WIFE

6. How Jehovah feel about husbans who beat up dea wife? (Fo Da Colosse Peopo 3:19)

⁶ Bein violent. Jehovah hate anybody who bus up odda peopo. (Songs 11:5) He really hate um wen husbans beat up dea wife. (Mal 2:16; read um Fo Da Colosse Peopo 3:19.) Da main scripcha in, 1 From Peter 3:7, show dat if one husban no treat his wife good, dat goin mess up his frenship wit God. Jehovah maybe goin make deaf ear to his prayas.

7. From wat Fo Da Efesus Peopo 4:31, 32 tell, how one husban no should talk? (Go look “Wat Dis Mean?”)

⁷ Bein mean wit how you talk. Some husbans talk to dea wife in one mad kine way an say tings dat hurt her plenny. But Jehovah hate wen somebody “get mad an snap . . . stay huhu . . . yell pilau kine stuff at each odda . . . [an] talk bad.” c (Read um Fo Da Efesus Peopo 4:31, 32.) He hea eryting. Jehovah kea about da way one husban talk to his wife, even wen nobody else stay aroun. One husban dat talk mean to his wife no ony jam up his marriage, but he jam up his frenship wit God too.​—Jam 1:26.

8. How Jehovah feel about porn, an why?

⁸ Looking at porn. How Jehovah feel about porn? He hate um. So one husban dat look dis pilau kine stuff mess up his frenship wit Jehovah an he no show respeck to his wife. d Jehovah expeck one  husban fo stay loyal to his wife not ony in wat he do but also in wat he tink. Jesus wen tell dat one guy who look at one odda wahine in one romantic kine way awready wen fool aroun wit her “in his heart.” e​—Mat 5:28, 29, NWT.

9. How come Jehovah hate wen one husban no show respeck to his wife wen come to sex kine tings?

⁹ Forcing sex kine tings dat no show respeck. Some husbans no show dea wife respeck wen dey presha her fo do tings wen dey having sex dat make her feel pilau an dat bodda her conscience. Jehovah hate wen somebody ack in one selfish an no kea kine way. Jehovah expeck one husban fo love his wife, treat her nice, an respeck how she feel. (Efe 5:28, 29) Wat if one Christian husban awready stay presha his wife fo do tings she no like, stay violent or talk mean to her, or look at porn? How he can change how he tink an ack?

HOW FO STOP DOIN TINGS DAT NO SHOW RESPECK

10. How Jesus exampo can help husbans?

¹⁰ Wat can help one husban fo stop doin bad tings dat no show respeck to his wife? He can work hard fo copy Jesus. Even tho Jesus neva wuz married, da way he wen treat his followas iz one good exampo of how one husban gotta treat his wife. (Efe 5:25) We go look wat husbans can learn from how Jesus wen treat his aposals an da way he wen talk to dem.

11. How Jesus wen treat his aposals?

¹¹ Jesus wuz nice to his aposals an wen treat dem wit respeck all da time. He neva wuz mean or bossy. Even tho he wen have moa powa den dem, he neva ack high makamaka fo make dem feel weak or sked. Radda, he wuz humbo an had do tings fo dem. (John 13:12-17) He wen tell his followas, “Learn fo do wat I stay teach you. I stay gentle kine an I like take kea odda peopo befo I take kea me, fo notting bodda you guys.” (Mat 11:28-30) Try look how Jesus wuz gentle. Somebody who stay gentle no mean he weak. But he strong enuff fo hold back wen gotta. Wen he mad, he control how he feel an he stay calm.

12. How Jesus wen talk to oddas?

¹² Da way Jesus wen talk had build oddas up an make dem feel betta. He neva talk mean to his followas. (Luk 8:47, 48) Even wen da guys who wen hate him wen try fo make him mad, “he neva ansa back.” (1 Pet 2:21-23) Had times wea Jesus wen choose fo no say notting radda den ansa back in one mean way. (Mat 27:12-14) Dass one awesome exampo fo Christian husbans!

13. How one husban can “stay wit his wife”? (Matthew 19:4-6) (Go look da picha.)

¹³ Jesus wen tell husbans fo be loyal to dea wife. Jesus wen point out wat his Faddah wen say, dat one husban gotta “stay wit his wife.” (Read um Matthew 19:4-6.) Da Greek word dey wen use ova hea fo “stay wit” mean “fo glue.” So da love between one husban an one wife gotta be so strong dat iz jalike dey stay glued togedda. If one of dem wen do someting fo hurt dea odda half, den both of dem goin suffa. One husban who get strong love fo his wife goin stay away from all kines of porn. He goin turn away ony fas fo no “look at da wase time kine tings.”  (Songs 119:37) Wen he do dis, he show he make up his mind fo no look at any wahine, odda den his wife, in one romantic kine way.​—Job 31:1.

14. Wat tings one husban dat abuse his wife gotta do fo fix his relationship wit Jehovah an his wife?

¹⁴ One husban dat abuse his wife gotta do some moa tings fo fix his relationship wit Jehovah an his wife. Wass dose tings? Numba one, he gotta see dat he get one serious problem. Jehovah see an hea eryting. (Songs 44:21; Teacha 12:14; Heb 4:13) Numba two, he gotta stop abusing his wife, an change how he ack. (Smart Guys 28:13) Numba three, he gotta be fo real kine sorry fo how he wen hurt his wife an Jehovah, an ask dem fo fogive him. (Jesus Guys 3:19) He gotta beg Jehovah in praya fo help him like change, an tink, talk, an ack da way Jehovah like. (Songs 51:10-12; 2 Cor 10:5; Php 2:13) Numba four, he work along wit wat he pray fo an he do eryting he can fo hate any kine violent stuff an talking bad. (Songs 97:10) Numba five, he go strait to da eldas in da local hui so dat dey can help him. (Jam 5:14-16) Numba six, he make one plan fo help him no do dese bad stuffs again. One husban who look at porn gotta do dese same six tings. Jehovah goin bless da hard work he do fo change how he ack. (Songs 37:5) But not good enuff fo one husban ony stop doin tings dat hurt his wife. He also gotta learn fo show respeck to her. How he can do dat?

HOW FO SHOW LOVE AN RESPECK TO YOA WIFE

15. How one husban can show he love his wife?

¹⁵ Show yoa love fo her. Some braddahs who stay happy in dea marriage do someting eryday fo show dea wife how much dey love her. (1 John 3:18) One husban can show his love fo his wife by doin someting simpo, like hold her hand or give her one hug. Maybe he can sen her one  text an tell her, “I miss you” or ask “How yoa day goin?” Or once in a while, he can write her one letta fo tell her how much he love her. Wen one husban do dese tings, he show love an respeck to his wife an make dea marriage moa strong.

16. How come one husban should tell his wife wat he love about her?

¹⁶ Tell her how much she mean to you. One husban who love an respeck his wife build her up an make her feel good about herself. One way he do dis iz fo rememba fo mahalo her fo all dat she do fo help him az his wife. (Col 3:15) Wen one husban tell his wife wat he love about her, she goin feel his love an respeck, an feel safe.​—Smart Guys 31:28.

17. How one husban can show respeck fo his wife?

¹⁷ Be nice an show respeck. One husban who love his wife take kea her cuz she wort plenny to him. He see her az one spesho present from Jehovah. (Smart Guys 18:22; 31:10) Cuz of dat he treat her nice an wit respeck, even wen dey having sex. He not goin presha her fo do any sex kine tings dat no show her respeck, make her feel pilau, or bodda her conscience. f Same time, he like do all he can fo have one clear conscience in front Jehovah.​—Jesus Guys 24:16.

18. Wat husbans gotta make up dea mind fo do? (Go look da box “ Four Ways Fo One Husban Show Respeck.”)

¹⁸ Jehovah stay happy wen he see dat you trying hard fo love an respeck yoa wife in eryting you say an do. Make up yoa mind fo no do notting dat can hurt her by showing her respeck, bein nice, an showing yoa love fo her. Wen you do dat, you show dat you kea an she wort plenny to you. Show love an respeck to yoa wife, an you goin proteck da mos importan relationship you get, dass yoa frenship wit Jehovah.​—Songs 25:14, NWT.