STUDY LESSON 3
SONG 35 “Pick da Bestes Kine Tings”
Make Choices Dat Make Jehovah Happy
“If you come sked wen you tink bout who Da One Charge, cuz you get plenny respeck fo him, den you ready fo start fo learn wat fo do. An if you know da One dat stay good an spesho, den you stay ready fo start fo undastan stuff.”—SMART GUYS 9:10.
MAIN TING WE GOIN LEARN
How fo use wat you kno an undastan, an den figga wass good fo make akamai choices.
1. Wass someting hard fo all us do?
ERY DAY we gotta make choices. Some choices moa easy fo make, like wat you goin eat fo breakfast or wen you goin go sleep. Odda tings iz moa hard fo choose. Wat we choose can affeck oua healt, oua ohana, how happy we stay, or oua worship. We like da stuff we choose fo do be good fo us an oua family. But da main ting iz, we like oua choices make Jehovah happy.—Rome 12:1, 2.
2. Wat tings goin help you make akamai choices?
2 You get moa chance fo make one akamai choice if you (1) get all da facts, (2) tink about how Jehovah look at um, an (3) tink about all da choices you get. Dis lesson goin talk about dose three tings, an iz goin help us learn how fo figga wass good fo do.—Heb 5:14.
GET DA FACTS
3. Wat word picha can help you undastan how come you gotta get all da facts befoa you make one choice?
3 Da firs ting you gotta do fo make one akamai choice iz get da facts. How come? Try picha dis, one guy stay really sick an he go to da docta fo help. You tink da docta would pick wat medicine fo give witout firs looking at da guy or asking him questions firs? No ways. You too goin make one betta choice if you firs tink about all da facts dat can affeck wat you goin tru. How you can do dat?
4. From wat Smart Guys 18:13 tell, wat you can do fo get da facts? (Go look da picha.)
4 You can get da facts by asking questions. Fo exampo, somebody invite you to one get togedda. You goin go? If you donno da guy who setting up da get togedda or wat he planning fo do, you gotta ask him some questions like, “Wen an wea da ting goin be? How much peopo goin come? Who goin make shua eryting go good? Who goin be dea? Wat dey planning fo do at da party? Dey goin be drinking alcohol dea?” Da ansas to dese questions goin help you make one akamai choice.—Read um Smart Guys 18:13.
Ask questions fo get da facts (Go look numba 4) a
5. Afta you get all da facts, wat you should do?
5 Afta you get all da facts, now you can tink real good about eryting dat stay goin on. Fo exampo, wat if you find out dat guys who no lissen to Jehovah goin be dea, or dat goin have alcohol but nobody goin watch fo make shua peopo no drink too much? You tink get chance dis get togedda goin get outa control? (1 Pet 4:3) Or wat if you find out da get togedda goin jam up yoa plans fo go meeting or field service? Wen you tink about all da facts fo wass goin happen, iz goin be moa easy fo make one good choice. But get someting else you gotta do. You kno how you feel about um, but how Jehovah feel?—Smart Guys 2:6.
TINK ABOUT HOW JEHOVAH FEEL
6. Cuz wat From James 1:5 tell, how come we gotta ask Jehovah fo help?
6 Ask Jehovah fo help you undastan how he tink. Jehovah promise fo give us da smarts fo figga wedda one choice goin make him happy. Wen he give us smarts, “He no goin give you guys hard time. He goin help you guys. God give plenny to erybody.”—Read um From James 1:5.
7. How you can get fo kno how Jehovah tink?
7 Afta you wen pray to Jehovah fo help, look fo ways he ansa yoa praya. Fo exampo, if you go travel an you get los, maybe you goin ask somebody who live dea fo help. But you would jus walk away befoa he give you one ansa? No ways. You goin lissen real good to wat he tell fo help you. Same ting, afta you pray to Jehovah fo help, look fo his ansa by learning wat Bible rules an truts fit wat you goin tru. Like wen you trying fo figga out if you goin go to da get togedda we wen talk about earlia, try tink about wat da Bible tell about rayjahs, hanging aroun bad kine guys, an how you like make God’s Govament moa importan den da tings you like do.—Mat 6:33; NWT., Rome 13:13; 1 Cor 15:33.
8. Wat you can do if you need help fo find da info you looking fo? (Go look da picha.)
8 But get times maybe you need help fo find da info you looking fo. Maybe one solid braddah or sistah can give you good advice. But goin be good fo you if you do yoa own research. Get choke stuff you can learn from oua study tools, like da Research Guide for Jehovah’s Witnesses an Scriptures for Christian Living. Rememba dat yoa goal iz fo make one choice dat goin make Jehovah happy.
Tink about how Jehovah feel (Go look numba 8) b
9. How we can kno fo shua dat oua choice goin make Jehovah happy? (Fo Da Efesus Peopo 5:17)
9 How we can kno fo shua dat oua choice goin make Jehovah happy? Da firs ting we gotta do iz get fo kno Jehovah real good. Da Bible tell, “If you know da One dat stay good an spesho, den you stay ready fo start fo undastan stuff.” (Smart Guys 9:10) Fo really undastan stuff, you gotta kno Jehovah’s qualities, his goal fo da future, an wat he love or hate. Try ask yoaself, “From wat I awready kno about Jehovah, wat choice I can make dat goin make him happy?”—Read um Fo Da Efesus Peopo 5:17.
10. How come Bible truts iz moa importan den family traditions or local culture?
10 Fo make Jehovah happy, sometimes we gotta choose fo do someting dat not goin make da guys we love happy. Some parents tink dey helping dea daughtah if dey try get her fo marry one guy dat get plenny money, but he not strong spiritually. Iz ony natural parents like someone take kea dea daughtah, but she gotta ask herself, who goin take kea her spiritually? How Jehovah feel about dis? We can find da ansa at Matthew 6:33, NWT. Ova dea Jesus wen tell Christians fo “make God’s Govament an doing wat he tell da mos importan tings in yoa life.” Even tho we respeck oua parents an da peopo in oua community, da main ting we like do iz make Jehovah happy.
TINK ABOUT ALL DA CHOICES
11. Wat Fo Da Philippi Peopo 1:9, 10 tell dat can help you fo tink about all yoa choices?
11 Afta you find da Bible truts dat goin help wit wat you goin tru, you gotta look at all da choices you can make. (Read um Fo Da Philippi Peopo 1:9, 10; go look da study note on “full discernment.”) Da moa you try fo figga wass good an wass bad, den dat goin help you fo see how each of yoa choices can turn out. Sometimes iz easy fo make one choice. But not all choices iz simpo fo make. Wen you try fo figga wass bes, dat goin help you fo make akamai choices even wen you dealing wit someting hard.
12-13. If you tink real good, how dat goin help you fo figga wass da akamai choice fo pick one job?
12 Try picha dis. You looking fo one job fo take kea yoa family. You get two jobs fo choose from. You tink about all da facts, like wat kine work you goin do, da skedule, how long goin take you fo get dea, an odda tings. Both jobs no go agains wat da Bible tell. Maybe you like one of da jobs moa cuz of da kine work you goin do or cuz da pay iz moa betta. But get odda tings you gotta tink about befoa you make one choice.
13 Try tink, would one of da jobs make you miss some of yoa meetings wit da local hui? Would one of dese jobs take away from da time you need fo help yoa family feel safe, happy, an closa to Jehovah? Wen you ask questions lidis, dat goin help you fo pick “da bestes kine stuff,” which iz yoa worship an wat yoa family need, radda den making moa money. Den you can make one choice dat Jehovah goin bless.
14. Wen we try fo figga wass bes an show love, how dat goin help us fo no jam up oddas?
14 Wen we try fo figga wass bes dat goin make us like tink about how oua choice goin affeck odda peopo, so dat we no jam up oddas. (Php 1:10) Iz importan wen we make choices about wat we goin wea an how we goin look. Fo exampo, maybe we get one way we like dress or clothes we like fo wea. But wat if iz goin bodda oddas inside or outside da local hui. Wen we figga wass bes, dat goin help us respeck how dey feel. Love goin help us fo tink about oddas an not tink too much about ouaself. (1 Cor 10:23, 24, 32; 1 Tim 2:9, 10) Den we goin make one choice dat show oua love an respeck fo oddas.
15. Wat you should tink about befoa you make one importan choice?
15 If you get one importan choice fo make, tink about wat you goin need fo do fo make um happen. Jesus wen teach us fo “figga out how much goin cost.” (Luk 14:28) So tink about da tings you need, da time, an da work you gotta put in fo make da choice work. Sometimes, maybe you gotta talk to yoa family fo find out wat erybody gotta do fo support da choice. How come iz importan fo plan lidis? Cuz maybe goin help you see dat you gotta change tings up or dat get anodda choice dass moa betta. An wen you talk to yoa family an lissen to wat dey tink, den moa dey goin like help you make da choice come out good.—Smart Guys 15:22.
MAKE ONE CHOICE DAT GOIN COME OUT GOOD
16. Wat tings goin help you fo make one akamai choice? (Go look da box “ How Fo Make Akamai Choices.”)
16 If you wen do all da tings we wen talk about, den you stay ready fo make one akamai choice. You wen get all da facts an check out da Bible truts dat goin help you fo make one choice dat goin make Jehovah happy. Now you can ask Jehovah fo help you make yoa choice come out good.
17. Wat da main ting dat goin help you make good choices?
17 Even if you wen make plenny akamai choices befoa, rememba dat da main ting dat goin help you make good choices iz fo trus, not on yoa own smarts or wat you wen go tru, but on da smarts from Jehovah. He da ony one dat can make us fo real kine akamai, cuz he help us fo kno tings, undastan tings, an figga wass good. (Smart Guys 2:1-5) Jehovah can help you make choices dat make him happy.—Songs 23:2, 3.
SONG 28 Come Jehovah’s Fren
