1. How come az good fo go ery year to da Meeting Fo Rememba Wen Jesus Had Mahke?

 JEHOVAH wen give us one awesome gif wen he had sen his boy fo mahke fo us! (2 Cor 9:15) Cuz Jesus wen give his life fo us, you can come frenz wit Jehovah. An you can get da chance fo live foeva. You get plenny reasons fo tank Jehovah, who wen give us da ransom cuz he love us plenny! (Rome 5:8) Fo help us stay tankful an no foget wat Jehovah an Jesus did fo us, Jesus wen tell us fo go ery year to da Meeting Fo Rememba Wen He Had Mahke.​—Luk 22:19, 20, NWT.

2. Wat we goin talk about in dis lesson?

² Dis year, da Meeting Fo Rememba goin be on Saturday, April 12, 2025. Fo shua all us stay making plans fo be dea. Befoa an afta da Meeting Fo Rememba, goin be good fo us if we take time fo tink hard about wat Jehovah an his Boy wen do fo us. In dis lesson, we goin talk about wat da ransom teach us about Jehovah an Jesus. An da nex lesson goin help us undastan how da ransom iz good fo us an how we can show we tankful fo um.

WAT DA RANSOM TEACH US ABOUT JEHOVAH

3. How da death of one perfeck man cut loose plenny peopo from sin an death? (Go look da picha.)

³ Da ransom teach us dat eryting Jehovah do stay right. (Rules 32:4) Wen Adam neva lissen to God, he  wen come one sinner an had mahke. Cuz we his kids, we sin an mahke too. (Rome 5:12) Fo cut us loose from sin an death, Jehovah wen sen Jesus fo pay da ransom. How da death of one perfeck man cut loose plenny peopo from sin an death? Da aposal Paul wen tell, “Adam, he one guy dat neva lissen God. Dat make plenny peopo do da bad kine stuff dat God no like fo dem do. An da odda guy Jesus, he lissen wat God tell him fo do. Dat make plenny guys come peopo dat get um right wit God.” (Rome 5:19; 1 Tim 2:6) So Paul wuz saying dat all us sin an gotta mahke cuz one perfeck man neva lissen God. So fo cut us loose from sin an death, we wen need one perfeck man fo lissen God.

4. How come Jehovah neva jus let Adam’s kids who wen lissen live foeva?

⁴ Did Jesus really have fo mahke fo save us? How come Jehovah neva jus let Adam’s kids who wen lissen live foeva? Fo us guys who no stay perfeck, seem like dass one good way fo fix da problem. But fo Jehovah, dis wouldn’t be da right ting fo do. Cuz den, would be like Adam neva sin mayjah an his kids neva sin eidda. But dat no wuz tru.

5. How come we can kno fo shua dat Jehovah always goin do wass right?

⁵ Wat if Jehovah neva give da ransom an wen ignore wat he tell iz right an wrong by letting Adam’s imperfeck kids live foeva? Peopo could wonda if he goin stick to wat he tell iz right an wrong in odda tings. Like, maybe peopo goin tink Jehovah not goin keep all his promises fo da future. But we no need worry about dat happening. Cuz Jehovah wen do da right ting, even tho he had fo sacrifice his own Boy. So we kno fo shua dat he always goin do wass right.

6. Wass one way da ransom show Jehovah’s love? (1 John 4:9, 10)

⁶ Anodda ting dat wen make Jehovah really like sen his Boy fo mahke fo us, iz his love. (John 3:16; read um 1 John 4:9, 10.) Da ransom teach us dat Jehovah like us not ony live foeva but also fo be paht of his ohana. Wen Adam had sin, Jehovah wen kick him out from his ohana, an dass why wen we born we not paht of his ohana. But cuz da ransom wuz paid, Jehovah fogive us of oua sins an erybody who get fait in God an lissen Him can one day come paht of His family. Even now we can come close to Jehovah  an oua braddahs an sistahs. We kno Jehovah really love us!​—Rome 5:10, 11.

7. By letting Jesus suffa, how dat help us fo see how much Jehovah love us?

⁷ We can see how much Jehovah love us wen we tink about how much it wen hurt him fo see his Boy suffa. Satan tell dat none of God’s peopo goin stick to him wen get hard times. Fo prove Satan one liar, Jehovah wen let Jesus suffa befoa he wen mahke. (Job 2:1-5; 1 Pet 2:21) Jehovah wen see peopo make fun of Jesus, soldiers beat him, an nail him to one pos. Den Jehovah wen watch his spesho boy suffa an die in one real bad way. (Mat 27:28-31, 39, NWT) Jehovah had da powa fo stop all dis from happening. Fo exampo, peopo wen tell, “Us like see God get him outa dis stuff now, if God like him!” Jehovah coulda did dat. (Mat 27:42, 43, NWT) But if he wen do dat, Jesus no could pay da ransom an we would have no hope. So Jehovah wen let his Boy suffa an go tru all dat til he wen die.

8. Jehovah wen feel soa inside wen he had see his Boy suffa? (Go look da picha.)

⁸ Wen Jehovah wen watch his Boy suffa an neva step in, dat mean he no moa feelings? No. He wen create us fo be able fo have feelings, an da Bible tell he wen make us jus like him, so dat mean he get feelings too. Da Bible wen tell he wen feel “sore inside.” (Songs 78:40, 41) We go look wat wen happen wit Abraham an Isaac. Jehovah wen tell Abraham fo sacrifice his ony boy. (Start 22:9-12; Heb 11:17-19) Tink about how sad an stress out Abraham musta been wen he wuz getting ready fo kill his ony boy. So tink about how much moa sad an stress out Jehovah musta been fo see peopo torture an kill his Boy.​—Go look on jw.org da video Imitate Their Faith—Abraham, Part 2.

9. In Fo Da Rome Peopo 8:32, 38, 39, wat you can learn about Jehovah’s love?

⁹ Da ransom teach us dat no one love us moa den Jehovah, not even oua closes family memba or bes fren. (Read um Fo Da Rome Peopo 8:32, 38, 39.) We can kno fo shua Jehovah love us moa den we love ouaselfs. You like live foeva? Not az much az Jehovah like you live foeva. You like yoa sins be fogiven? Jehovah like dat happen even moa. All he like iz fo us show we tankful fo wat he wen do fo us, have fait in him, an lissen to him. Da ransom iz one real spesho gif dat  show how much Jehovah loves us. An in da new world, we goin learn moa about Jehovah’s love.​—Teacha 3:11.

WAT DA RANSOM TEACH US ABOUT JESUS

10. (a) How come Jesus wuz stress out about his death? (b) How Jesus wen clear Jehovah’s name? (Go look da box “ Jesus Sacrifice Wen Clear Jehovah’s Name.”)

¹⁰ Jesus kea plenny about his Faddah’s rep. (John 14:31) Jesus wuz stress out dat peopo wuz goin tink bad about his Faddah cuz he would be put to death az somebody who wuz one crook dat no respeck God. Dass how come he wen pray, “God, you my Faddah. If can, no let me suffa lidis.” (Mat 26:39) But cuz Jesus wen stay faitful til he wen mahke, he wen prove dat da lies Satan wen tell about his Faddah no wuz tru.

11. How Jesus wen show plenny love fo peopo? (John 13:1)

¹¹ Anodda ting da ransom teach iz dat Jesus kea plenny about peopo, speshly his followas. (Smart Guys 8:31; read um John 13:1.) Jesus had kno dat some tings he wuz goin have fo do on eart wuz goin be hard, like wen he had fo suffa an die. Jesus wen go tru all dese hard tings not jus cuz Jehovah wen sen um fo do dis but cuz he really wen love peopo. Jesus wen show plenny love fo peopo by preaching, teaching, an helping oddas. Even on da day he wuz goin mahke, Jesus wen take da time fo wash da feet of his aposals, fo teach dem, build dem up, an give dem good kine words. (John 13:12-15) Den wen he wuz on da pos, Jesus still wen take time fo give hope to one dying crook, an wen ask John fo take  kea his maddah. (Luk 23:42, 43; John 19:26, 27) Jesus wen show plenny love fo peopo not ony by dying fo dem but by treating dem wit love an aloha all tru his life on eart.

12. Wat Jesus doin fo us right now?

¹² Az tru dat Jesus wen die “one time fo da peopo,” but he still doin plenny tings fo us. (Rome 6:10) Wat he doin? Still yet he working hard fo give us good tings dat ony can happen cuz of da ransom. Tink about da kuleana he get. He stay oua King, Main Pries Guy, an head of da hui. (1 Cor 15:25; Efe 5:23; Heb 2:17) He stay in charge of getting togedda da anointed an da uku plenny peopo, an dis one work he gotta do befoa da big trouble pau. a (Mat 25:32; Mar 13:27) He also make shua his faitful peopo get da spiritual food dey need in dese las days. (Mat 24:45, NWT.) An wen he rule fo da tousand years, he goin keep doin tings fo us. Jehovah really wen give his Boy fo us!

NEVA STOP LEARNING

13. How tinking hard can help you keep learning about da love Jehovah an Jesus get fo us?

¹³ You can keep learning about da love Jehovah an Jesus get fo you if you tink hard about wat dey wen do fo you. Befoa an afta da Meeting Fo Rememba, try read one or moa of da Gospels. But no read too much chaptas all one time. Make shua fo take yoa time an look fo odda reasons why we should love Jehovah an Jesus. An den talk about wat you wen learn wit oddas.

14. How research can help us keep learning about da ransom an odda tings? (Songs Fo God 119:97) (Go look da picha.)

¹⁴ If you been in da trut long time, maybe you wonda if get anyting new you can learn about wat God tink iz right an wrong, his love, an da ransom. But always goin get new stuff we can learn about dese tings. So, wat you can do? Wit da choke info we get in oua Bible tools, use dat fo read an study. Wen you read someting in da Bible you no undastan, do research. Den tru da day, tink about wat you wen learn about Jehovah,  his Boy, an dea love fo you.​—Read um Songs Fo God 119:97.

15. How come iz importan fo keep learning new tings from da Bible?

¹⁵ No feel bad if no can find someting new or exciting ery time you read da Bible or you do research. You kinda like somebody who stay trying fo look fo gold. Plenny times one person spen long time befoa he even find da smalles piece of gold. But he no give up an keep looking cuz ery piece of gold stay spesho to him. Even moa spesho den gold iz da new tings we learn from da Bible. (Songs 119:127; Smart Guys 8:10) So keep reading da Bible an keep looking fo new tings fo learn.​—Songs 1:2.

16. How we can copy Jehovah an Jesus?

¹⁶ Wen you study look fo ways fo do wat you wen learn. Fo exampo, copy how Jehovah do wass right by treating oddas fair. Copy Jesus love fo his Faddah an fo oddas by doin wat Jehovah like an helping peopo even if it can make yoa life moa hard sometimes. An copy Jesus by preaching to peopo so dat dey get da chance fo kno about da awesome tings Jehovah had do fo us an show fait in da ransom.

17. Wat we goin learn in da nex lesson?

¹⁷ Da moa we keep learning about da ransom da moa we goin love Jehovah an his Boy. Cuz we love dem, dey goin love us moa an moa. (John 14:21; Jam 4:8) So keep using eryting Jehovah wen give us fo learn moa about da ransom. In da nex lesson, we goin learn moa about da good tings we get cuz Jesus wen die fo us an how we can show we tankful fo Jehovah’s love.