1-2. Who wuz Zadok? (1 Records 12:22, 26-28)

 TRY picha dis. Ova 340,000 guys wen come togedda fo make David da king of Israel. Fo three days, da guys wuz dea in da rocky hills close by Hebron, singing to Jehovah, laughing, an talking story. (1 Rec 12:39) Ova dea had one young guy name Zadok who neva really stan out. But he wen stan out to Jehovah, an Jehovah like all us kno who him. (Read um 1 Records 12:22, 26-28.) Who dat guy Zadok?

² Zadok wuz one pries who wen work real close wit da Main Pries Abiatar. Jehovah wen help Zadok fo be real akamai an fo undastan wat He wanted fo happen. (2 Sam 15:27) Cuz Zadok wuz akamai, wen peopo needed help, dey would ask him fo advice. Anodda ting he had wuz plenny courage. In dis lesson, we goin see how Zadok wen show courage.

3. (a) Why Jehovah’s peopo need courage? (b) Wat we goin go ova in dis lesson?

³ Satan attacking God’s peopo moa den eva in dese las days. (1 Pet 5:8) While we stay wait fo Jehovah wipe out Satan an dis pilau world, we need courage. (Songs 31:24) We go look three ways we can copy Zadok’s courage.

 STAN UP FO GOD’S GOVAMENT

4. How come Jehovah’s peopo need courage fo stan up fo His Govament? (Go look da picha.)

⁴ Jehovah’s peopo need courage fo stan up fo His Govament. (Mat 6:33, NEW WORLD TRANSLATION) Cuz dis world iz so pilau, we need courage fo preach an live da way Jehovah like us live. (1 Tess 2:2) An cuz dis world stay getting moa split up wit political stuff, need courage fo no take one side. (John 18:36) Plenny of Jehovah’s peopo wen get money problems, wen get bus up, or even lock up cuz dey no take sides or sign up fo da military.

5. How come Zadok wen need courage fo back up David?

⁵ Zadok neva go Hebron jus fo celebrate making David king. He wen take his weapons an go dea ready fo war. (1 Rec 12:38) He wuz ready fo go wit David fo fight an proteck Israel. Zadok neva have too much experience fighting az one soldier. But he had plenny courage.

6. How David wuz one good exampo fo Zadok follow? (Songs Fo God 138:3)

⁶ How one pries like Zadok wen get so much courage? Had plenny guys aroun him dat wuz strong an had courage. So he wen probly learn from dem. One of dese guys dat wen set one good exampo wuz David. Cuz he wen show courage an “lead [da] Israel peopo wen [dey] fight,” all dem wanted him fo be dea king. (1 Rec 11:1, 2) David wen always go to Jehovah fo help agains his enemies. (Songs 28:7; read um Songs Fo God 138:3.) Had odda guys dat wuz good exampos too, like Jehoiada, his boy Benaiah, an 22 odda offissa guys  who wen back up David. (1 Rec 11:22-25; 12:26-28) All dese guys wen go all out fo proteck David an make him dea king.

7. (a) Wat exampos of courage we get oua time? (b) Wat you learn from Braddah Nsilu’s exampo in da video?

⁷ Wen we tink about how oddas show courage so dat dey can stay loyal to Jehovah an his govament, dat help us fo do da same ting. Wen Jesus wuz on eart, he neva get involved wit da politics in Satan’s world. (Mat 4:8-11; John 6:14, 15) He wen always rely on Jehovah fo give him courage. Oua time, we get choke exampos of young braddahs who neva join up wit da military or get involved wit political kine stuff. Would be good fo check out wat dey wen go tru on jw.org. a

HELP YOA BRADDAHS

8. Wen eldas maybe goin need courage fo help out dea braddahs?

⁸ Jehovah’s peopo love fo help each odda out. (2 Cor 8:4) But sometimes, take courage fo do dat. Like wen get war, da local eldas kno dat dea braddahs an sistahs need fo be built up, an dat dey gotta help dem get da spiritual an physical stuffs dey need. Even if az abunai fo da eldas take kea da braddahs an sistahs lidis, da eldas do um cuz dey love dem. (John 15:12, 13) Wen dey do dis, dey copy how Zadok wen show courage.

9. In 2 Samuel 15:27-29, wat David wen tell Zadok fo do? (Go look da picha.)

⁹ Try look how Zadok wen help his braddahs wen wuz dangerous. David’s boy Absalom wanted fo kill him so dat he could come da king. (2 Sam 15:12, 13) Fas David had fo bag from Jerusalem.  He wen tell his guys, “Go come! Us gotta run, o no mo nobody from us goin get away from Absalom.” (2 Sam 15:14) Wen dey wuz digging out, David wen realize dat would be good fo some guys stay back fo let him kno eryting Absalom wuz goin do nex. So David wen sen Zadok an odda prieses back to da city fo be spies. (Read um 2 Samuel 15:27-29.) Wat David wen tell dem fo do wuz risky, so dey had fo be supa keaful cuz if peopo wen find out wat dey wuz doin, dey would kill dem. Absalom wuz one pilau guy who wuz violent, an wen even stab his own faddah in da back. Imagine wat woulda happen to Zadok an da odda prieses if Absalom wen find out dey wuz working wit David!

10. How Zadok an da guys wit him wen proteck David?

¹⁰ David wen ask Zadok an anodda good fren, Hushai, fo help him wit one plan. (2 Sam 15:32-37) Da plan wuz dat Hushai wuz goin get Absalom fo trus him an den tell um how fo attack David. Dat plan would give David time fo get ready fo da attack. Afta dat, Hushai wen let Zadok an Abiatar know wat da plan wuz. (2 Sam 17:8-16) Den da two guys wen sen da message to David. (2 Sam 17:17) Wit Jehovah’s help, Zadok an da odda prieses wuz able fo proteck David’s life.​—2 Sam 17:21, 22.

11. How we copy Zadok’s courage wen we help oua braddahs?

¹¹ How we can be like Zadok an show courage wen oua braddahs iz in danger an dey need help? (1) Lissen to da instrucktions. Wen tings iz dangerous, az importan fo us lissen so dat we can all stick togedda. Lissen to da instrucktions dat yoa local branch give you.  (Heb 13:17, NWT) Ery so often, da eldas should go ova how fo get ready fo one distasta, an wat fo do wen get one disasta. (1 Cor 14:33, 40) (2) Show courage but be keaful. (Smart Guys 22:3) Use common sense, tink befoa you ack, an no take anykine risk. (3) Rely on Jehovah. Rememba dat Jehovah kea wat happen to you an yoa braddahs. He can help you fo keep dem safe.

12-13. Wat you wen learn from wat wen happen to Viktor an Vitalii? (Go look da picha.)

¹² Try look wat wen happen to two eldas, Viktor an Vitalii, who wen bring food an watta to dea braddahs in Ukraine. “We wen look erywea fo food,” Viktor wen say. “Plenny times, had get shooting all aroun us. One braddah wen give food dat he wen stash away. Dis wuz nuff kaukau fo feed plenny braddahs fo a while. Wen we wuz loading up da truck, one rocket wen land on da groun about 66 feet away from us, but neva blow up. Dat whole day I wen beg Jehovah fo give me da courage fo keep helping da braddahs.”

¹³ “Fo do dis, wen take guts,” Vitalii wen say. “My firs trip wen take 12 hours an I wen pray to Jehovah da whole way.” Vitalii wen show courage, but same time wuz keaful. He sed, “I wen keep asking Jehovah fo be smart, but kno my limits too. I wen drive ony on da roads dat da govament sed can. Fo see all da braddahs an sistahs work togedda, dat wen build up my fait. Dey wen clear up da roads, wen get togedda all da stuff da braddahs wen need, an dey wen give me an Viktor food an places fo res.”

STICK TO JEHOVAH

14. How we might feel if somebody we love no stick to Jehovah?

¹⁴ One of da mos hardes tings you can go tru iz wen somebody in yoa family or one close fren leave Jehovah. (Songs 78:40; Smart Guys 24:10) Da moa you love da person, da moa hard can be fo hando. If you wen go tru someting dat wen make yoa heart soa lidat, Zadok’s exampo of sticking to Jehovah can make you moa strong.

15. How come Zadok wen need courage fo stick to Jehovah? (1 Kings 1:5-8)

¹⁵ Zadok wen stick to Jehovah even wen his close fren, Abiatar, neva. Dis wen happen wen David wuz almos pau rule az king. Wen David wuz old an dying, his boy Adonijah wen try make himself king, even tho Jehovah wen promise Solomon wuz goin be da one. (1 Rec 22:9, 10) Abiatar wen choose fo back up Adonijah. (Read um 1 Kings 1:5-8.) Wen Abiatar wen do dat, he neva ony turn his back on David, but on Jehovah too. Try tink how sad Zadok musta been. Fo moa den 40 years, him an Abiatar wuz close an wen work togedda az prieses. (2 Sam 8:17) Dey wen kea fo “da Box Fo God” togedda. (2 Sam 15:29) Both of dem had back up David az king, an dey wen do plenny moa odda stuff fo Jehovah.​—2 Sam 19:11-14.

16. Wat probly wen help Zadok stick to Jehovah?

¹⁶ Even tho Abiatar wen turn his back on David an Jehovah, Zadok wen stick to Jehovah. David wen kno he could always trus Zadok. Wen David wen find out wat Adonijah’s plan wuz, he knew he could trus Zadok, Nathan, an Benaiah  fo make Solomon king. (1 Ki 1:32-34) Probly wen really help Zadok fo be wit Nathan an odda guys dat wen stick to Jehovah. (1 Ki 1:38, 39) Wen Solomon wen come king, he wen “make Zadok da Main Pries Guy afta Abiatar.”​—1 Ki 2:35.

17. If somebody close to you no stick to Jehovah, how you can copy Zadok?

¹⁷ How you can copy Zadok? If somebody close to you choose fo leave Jehovah, make um clear dat you goin stick to Jehovah no matta wat. (Josh 24:15) He goin give you da courage fo do wass right. Pray to Jehovah an stay close to yoa frenz who stick wit Him. If you loyal to Jehovah, dass someting spesho to him, an he goin bless you.​—2 Sam 22:26.

18. Wat you learn from wat wen happen to Marco an Sidse?

¹⁸ Try look wat wen happen to Marco an his wife, Sidse, whose two grown up girls wen leave da trut. Marco wen say, “From da time yoa kids born, you love um so much an you do anyting fo proteck dem. So wen dey choose fo leave Jehovah, dat break yoa heart.” An den he wen say, “But Jehovah help us fo hando. He make shua dat wen I weak, my wife strong, an wen she weak, I strong.” Sidse tell, “We wouldn’t of been able fo hando if Jehovah neva make us strong. I wen struggle tinking wuz my fault, so I wen tell Jehovah how I feel. Few days afta dat, one sistah I neva see long time wen come up to me, put her hands on top my shoulders, look me in da eyes an sed, “Rememba Sidse, az not yoa fault!” Wit Jehovah’s help, I wuz able fo stay happy serving him.”

19. Wat you wen make up yoa mind fo do?

¹⁹ Jehovah like all da guys dat serve him have courage like Zadok. (2 Tim 1:7) But he no like us rely on ouaself. He like us rely on him. So wen you need courage, go to Jehovah. You can kno fo shua dat he goin give you courage like Zadok!​—1 Pet 5:10.