1-2. (a) Wat Jesus had warn his followas about? (b)  How come Jesus followas wen bag from him? (Go look da pichas.)

 “I KNOW you guys like do da right ting, but no can, cuz you not strong inside.” a (Mat 26:41b) Jesus wen say dat cuz he kno we no stay perfeck an goin jam up sometimes. But Jesus wen say dat too fo warn us fo watch out an no tink we always gettum. A coupo hours befoa Jesus wen say dis, his followas wen promise dat dey would neva bag from him. (Mat 26:35) Dey had like do da right ting. But dey neva tink how fas dey wuz goin crumble unda presha. An dass how come Jesus wen warn dem, “Watch out an go aks God fo help you fo no do bad kine stuff wen you get chance fo do um.”​—Mat 26:41a.

² Wuz sad tho, cuz Jesus followas neva lissen wat he had tell dem. Wen Jesus got arrested, wat dey wen do? Dey wen stay wit him or wen get sked an run away? Cuz dey neva watch out, dey wen end up doin wat dey sed dey neva wuz goin do, bag from Jesus.​—Mat 26:56.

3. (a) Fo stay loyal to Jehovah, how come we no like tink we strong enuff by ouaself? (b) Wat we goin talk about in dis lesson?

³ We no like tink dat we strong enuff fo do da right ting erytime. Fo shua we no like do anyting dass goin hurt Jehovah. But we no stay perfeck an get preshas all ova dat  make um hard fo do wat is right. (Rome 5:12; 7:21-23) Dose preshas can come outa nowea, an can make someting bad look good. Fo stay loyal to Jehovah an his Boy, we gotta follow Jesus an watch out fo da preshas fo do bad. Dis lesson can help us do dat. Firs, we go talk about wat weak spots we really gotta watch out fo. Afta dat, we goin talk about how we can proteck ouaselfs from da presha. Den, we goin talk about how we can always stay ready fo any kine preshas.

WATCH OUT FO YOA WEAK SPOTS

4-5. How come we gotta watch out fo no do even mynah kine sins?

⁴ Even mynah sins can hurt oua relationship wit Jehovah. An dey can end up making us do moa worsa kine stuff.

⁵ All us get presha fo sin. But we all get oua own weak spots, so get some tings dat goin make us like do someting dat stay wrong. Jus like somebody maybe stay trying real hard fo no have pilau kine sex. Or maybe somebody get hard time fo no do pilau kine stuff, like masturbate or look at porn. An maybe somebody else fight hard fo no get one big head, no get mad fas, or fo no be sked of wat oddas tink. We see how come James wen tell, “Wen we start fo tink, “Eh, I like do bad kine stuff!” . . . da bad kine tinking pull us all ova. We come jalike da fish dat go afta da bait.”​—Jam 1:14.

6. Wat we gotta be honest about?

⁶ You kno yoa weak spots dat presha you fo do bad? We ony goin hurt ouaselfs if we tink we no moa weak spots or if we tink we strong enuff fo no do anyting bad. (1 John 1:8) Rememba, Paul wen even tell solid braddahs an sistahs dat dey gotta watch out fo no do bad kine stuffs too. (Gal 6:1) We gotta be honest wit ouaselfs an kno dat we get weak spots.​—2 Cor 13:5.

7. Wat we gotta proteck ouaselfs from? Give one exampo.

⁷ Wen we find da tings dass goin tempt us da mos, wat we should do? Work hard fo come moa solid an no give in. Befoa in Bible times, dea weak spot in da city wall wuz da gates. Dass why dey wen put plenny guys fo watch da gates fo proteck da city. Same ting, we gotta kno real good wea oua weak spots stay, so dat we can proteck ouaselfs moa betta.​—1 Cor 9:27.

 HOW FO PROTECK OUASELFS

8-9. How da young guy in Smart Guys chapta 7 coulda proteck himself from one mayjah kine sin? (Smart Guys 7:8, 9, 13, 14, 21)

⁸ How we can proteck ouaselfs? We go look wat we can learn from one young guy dat stay in Smart Guys chapta 7. He wen have pilau kine sex wit one wahine dat like fool aroun. Verse 22 tell dat real fas da young guy wen go wit her. But da verses befoa wen show dat he had make odda stupid choices dat wen slowly make um moa easy fo him sin.

⁹ Wat da young guy had do befoa he wen sin? Firs, jus befoa dark, “he go down one street” dass close to wea da wahine dat like fool aroun live. Den he wen walk to da wahines house. (Read um Smart Guys 7:8, 9.) An den wen he had see da wahine, he neva leave. He wen let her kiss him an den he had lissen to her talk about da sacrifices she wen make dat day. She probly wen do dat fo make him tink she no wuz bad. (Read um Smart Guys 7:13, 14, 21.) Da young guy wen sin cuz he neva proteck himself an stay away from da dangers dat wen presha him fo do someting bad.

10. How somebody today can make da same stupid choices like da young guy?

¹⁰ Da story Solomon wen talk about, show wat can happen to anybody dat worship Jehovah. He might do someting really bad an den layta on feel like wen happen real fas. Or he tell, “Wen jus happen.” But if he really tink about wat wen happen, he goin see dat he wen make stupid choices dat wen end up making him sin. Maybe he get frenz dat no love Jehovah, he watch, lissen to, go places, or go on websites dat no stay good fo one Christian. Or maybe he wen stop praying, reading da Bible, goin meetings, or goin preaching. Like da young guy in Smart Guys, his sin neva jus happen. He wen make plenny bad choices dat wen lead up to um.

11. Wat we gotta stay away from fo no sin?

¹¹ Wat we can learn from dis? We no ony gotta stay away from doin someting bad, but we gotta stay away from da tings dat lead us to sin. Dis wat Solomon wuz trying fo say right afta he tell da story of da young guy an da wahine dat like fool aroun. Talking about da wahine he tell, “No hang aroun dat side.” (Smart Guys 7:25) An anodda ting he tell iz, “Stay away from dat kine wahine! No even go nea da door by da place wea she stay.” (Smart Guys 5:3, 8) Fo proteck ouaselfs from sin, we gotta stay away from tings dat goin lead us to doin someting bad. b Dis mean dat even if someting no stay bad fo Christians do, we goin stay away from um if goin tempt us fo do someting wrong.​—Mat 5:29, 30, NWT.

12. Wat Job wen make up his mind fo do, an how dat wen proteck him from doin someting bad? (Job 31:1)

¹² Fo stay away from tings dat goin make us sin, we gotta make up oua mind fo proteck ouaself. Dass wat Job wen do. He wen “make one strong promise” fo no check out odda wahines. (Read um Job 31:1.) Cuz he wen make up his mind fo do dat, it wen proteck him from even coming close to fooling aroun on his wife. Same fo us, we gotta make up  oua mind fo stay away from anyting dat can make us like do someting bad.

13. How come we gotta proteck oua tinking? (Go look da pichas.)

¹³ We gotta proteck oua tinking. (Egypt 20:17) Some peopo tink az okay fo jus tink about doin someting bad, az long dey no do um. But dass not right. Somebody who keep tinking about doin someting bad, ony goin like do um moa. Doin dat goin make um moa hard fo no do um. Az tru, bad kine thoughts goin pop up in yoa head sometimes. But wen dat happen we gotta be fas fo shut um down an tink about good kine stuff. Wen we do dat, we proteck ouaselfs from doin someting really bad, cuz we no give da bad thought chance fo grow inside us.​—Php 4:8; Col 3:2; Jam 1:13-15.

14. Wass anodda ting dat can proteck us from da presha fo do someting bad?

¹⁴ Wass anodda ting we can do fo proteck ouaselfs from da presha fo do someting bad? We gotta full on trus dat iz good fo us if we lissen an do wat Jehovah tell. Sometimes can be hard fo us tink an feel da way Jehovah like. But wen we try hard fo do dat, we goin be happy.

15. If we love fo do da right kine tings, how dat proteck us from da presha fo do someting bad?

¹⁵ We gotta grow oua love fo do da right kine tings. Wen we learn fo “hate da bad kine stuff an get love an aloha fo da good kine stuff,” goin be moa easy fo us stick to doin wat iz right an stay away from bad kine stuff dat can make us sin. (Amos 5:15) If we love fo do da right kine tings, den az goin be moa easy fo fight da presha fo do bad stuff, even if come outa nowea.

16. How staying busy doin spiritual kine tings proteck us? (Go look da pichas.)

¹⁶ How we can grow oua love fo do da right kine tings? We can do dat if we stay busy doin spiritual kine tings. (Mat 28:19, 20; Heb 10:24, 25) Wen we stay at  oua meetings or out preaching, den even moa we goin like make Jehovah happy an we not goin have da presha fo do someting bad. Wen we read, study, an tink about da Bible, we goin make oua love fo wat iz good moa strong an we goin hate wat stay bad even moa. (Josh 1:8; Songs 1:2, 3; 119:97, 101) Rememba, Jesus had tell his guys, “Watch out an go aks God fo help you fo no do bad kine stuff wen you get chance fo do um.” (Mat 26:41) Wen we pray to oua Faddah in heaven we give him da chance fo help us an we goin like do eryting we can fo make him happy.​—Jam 4:8.

ALWAYS STAY READY FO PROTECK YOASELF

17. Wat problem wen keep coming up fo Peter?

¹⁷ We probly get some weak spots we can fix. But we probly get odda weak spots dat goin keep giving us hard time. Try tink about wat wen happen to da aposal Peter. Cuz he wuz sked of wat oddas tink, he wen tell he neva kno Jesus three times. (Mat 26:69-75) Wen seem like Peter wen fix his weak spot cuz he no wuz sked preach in front da Sanhedrin. (Jesus Guys 5:27-29) But den layta on, he wen stop eating wit da Christians dat no wuz Jews cuz he wen come sked of wat da Jewish Christians wuz goin tink about him. (Gal 2:11, 12) Peter’s weak spot wen come back again. Maybe cuz dat problem fo him neva really wen go away.

18. Wat can happen wit some of da stuff we wen work on?

¹⁸ Jus like Peter, sometimes we gotta work on stuff we wen tink wuz pau awready. Jus like one braddah wen tell, “I wen stop watching porn fo 10 years an I wen tell myself fo shua my problem wuz pau wit. But my problem wuz still dea, jalike wuz sleeping. But den wen someting come up, da presha come back fo watch um again.” So good he neva give up. He wen see eryday he wuz goin have fo fight agains his problem an he probly wuz goin have fo do dat til dis world  come pau. Da braddah wen do even moa fo proteck himself from watching porn, an his wife an eldas stay help him plenny too.

19. Wat we can do if one weak spot neva go away?

¹⁹ Wen we get weak spots dat no go away, wat we can do fo proteck ouaselfs from doin someting wrong? We gotta do wat Jesus tell, “watch out so you no do bad kine stuff.” Even wen you feel like you gettum, stay away from anyting dat can give you da presha fo do someting bad. (1 Cor 10:12) Keep doin da tings dat awready wen help you proteck yoaself from dis problem. So “go all out” fo always stay ready fo proteck yoaself from da presha fo do bad kine tings.”​—2 Pet 3:14.

HOW COME AZ GOOD FO PROTECK OUASELF

20-21. (a) How goin be good fo us if we always proteck ouaself? (b) If we work hard fo proteck ouaself from da presha fo do someting bad, wat Jehovah goin do fo us? (2 Fo Da Corint Peopo 4:7, NWT.)

²⁰ Az ony good fo us if we proteck ouaselfs from da presha fo do someting bad. Doin someting bad can “feel good but no las,” but if we live da way Jehovah like, we goin be way moa happy. (Heb 11:25; Songs 19:8) Dass cuz we wuz made fo lissen to him. (Start 1:27) Wen we live da way Jehovah like, we goin be all good wit him an we get chance fo live foeva.​—1 Tim 6:12; 2 Tim 1:3; Jude 20, 21.

²¹ Jesus wen tell dat we no “stay strong inside” but dat no mean we no can do notting fo proteck ouaself. Jehovah always stay ready fo give us da powa we need. (Read um 2 Fo Da Corint Peopo 4:7, NWT.) Da unreal powa we get no come from us but come from God. But firs we gotta use oua own powa fo proteck ouaself from doin someting bad. If we try oua bes, den we kno fo shua dat Jehovah goin ansa oua prayas an give us da extra powa we need fo hando. (1 Cor 10:13) Wit Jehovah’s help, we can proteck ouaselfs from da presha fo do someting wrong.