Wuz diffren fo Nicolas an Céline. Dey wen say “yes” wen da branch in France wen ask dem fo move to one new hui. “At firs we wuz real excited, but den we wen start fo miss oua frenz, cuz we no wuz close yet wit da braddahs in oua new hui.” a Even tho can be hard, how you can make moving to one new hui good? Wat oddas can do fo help? An wat kine spiritual blessings you can give an get in yoa new local hui?

FOUR TINGS DAT CAN HELP YOU

1. Trus in Jehovah. (Songs 37:5) Cuz her husban wen get one job in one odda place, Kazumi in Japan had fo leave da hui she wuz wit fo 20 years. How she wen let Jehovah “handle eryting [she] do”? She tell, “Ova an ova I wen tell Jehovah how I wen feel . . . sked, lonely an worried. I wen get all da mana from him, ery time I wen do dat.”

How you can trus Jehovah moa? Jalike one plant need watta an food from da dirt in order fo grow, we gotta feed oua fait so dat it come strong. Nicolas, who we wen talk about befoa, wen find dat tinking hard about guys who wen make plenny sacrifices fo do wat God like​—like Abraham, Jesus, an Paul​—dat wen make him moa shua dat Jehovah would help him. If you study da Bible fo yoaself all da time, dat goin help you hando all da changes in yoa life. An you goin learn tings dat you can share fo build oddas up in yoa new hui.

 2. No compare. (Teacha 7:10) Wen he wen move from Benin to da United States, Jules wen find one big diffrence in da culture. He tell, “I wen feel like I had fo tell my life story to erybody I wen meet.” Cuz he no wuz used to dat, he started fo stay away from da braddahs an sistahs. Afta he wen get fo know da braddahs an sistahs moa betta, he wen change how he wuz tinking. He wen say, “I wen come fo see dat no matta wea you stay, erybody da same. Dey jus talk an ack diffren. Az importan fo let peopo be demself.” So no compare yoa new hui wit da old one. Anne-Lise, one pionea sistah, wen tell, “I wen move cuz I wanted fo learn new tings, not cuz I wanted eryting fo be da same az wea I wen come from.”

Even da eldas gotta make shua dey no compare dea new hui wit da old one dey wen come from. Doin tings diffren, no mean dass wrong. Az moa betta fo find out how come dey do da tings dey do befoa you say anyting. (Teacha 3:1, 7b) Teach da braddahs by yoa good exampo, radda den try fo force dem da way you tink.​—2 Cor 1:24.

3. Get busy in yoa new hui. (Php 1:27) Moving take plenny hard work, but right from da start, az importan fo go all da meetings in person if can. Cuz if da guys in yoa new hui hardly see you, how dey goin help you? Lucinda, who wen move to one big town in South Africa wit her two girls wen tell, “My frenz wen tell me fo work real hard fo come tight wit da new hui, go out preach wit da frenz, an ansa at da meetings. We wen even tell da braddahs dey can use oua house fo da meetings fo preach.”

If we do dat an “go all out an work togedda” wit da braddahs an sistahs in oua new hui, dass one good way fo make erybody’s fait come moa strong. Da eldas wen tell Anne-Lise fo try go preach wit erybody in da new hui. So wat wen happen? She tell, “I wen see real quick dat dis wuz one good way fo fit in.” Anodda ting good fo do iz fo clean an take kea da Meeting Place. Dass how you show dis hui iz yoa hui. Da moa you do dese tings, da braddahs an sistahs goin feel moa relaxed aroun you, an you goin feel paht of da hui.

4. Make new frenz. (2 Cor 6:11-13) Da bes way fo make frenz iz fo show dat you interested in dem, so make shua you get enuff time befoa an afta da meeting fo talk story wit da braddahs an sistahs fo get fo kno dem. Try hard fo rememba dea names. If you do dat, an you frenly an easy fo talk  to, dey goin like get fo kno you, an you can come good frenz.

No need ack diffren. Jus be yoaself an let da braddahs an sistahs get fo kno da real you. Learn from wat Lucinda wen do. She tell, “Cuz we wen tell oddas come oua house, dat wen help us come moa close.”

“COME EACH ODDA OHANA”

Fo some guys, can be sked fo go inside one Kingdom Hall full of peopo you donno. How you can make um moa easy fo da guys who wen move to yoa hui? Da aposal Paul wen tell, “Come each odda ohana, jalike Christ make you guys come his ohana.” (Rome 15:7) Wen eldas copy Jesus, dey goin make da new guys feel paht of da hui. (Go look da box “ Wat Can Help Da Move Come Out Good.”) But erybody in da hui, even da kids, can help da new guys feel at home.

Coming each odda ohana mean telling guys come ova yoa house an helping dem in odda ways. Fo exampo, one sistah wen make da time fo show anodda sistah who wen jus move dea how fo get aroun town on da bus or train. Da new sistah wuz really tankful cuz dat wen help her get used to living ova dea.

ONE CHANCE FO GROW

Az da locust come moa big, he hemo da skin plenny times befoa can fly. Same ting, wen you move to one new hui, you gotta hemo anyting dat goin make you worry an stop you from doin moa fo Jehovah. Nicolas an Céline tell, “Moving, az good training. Getting used to new peopo an diffren places wen help us fo learn new qualities.” Jean-Charles, who we wen talk about, tell how moving wen help his ohana. “Da change wen help oua kids fo grow in  da new local hui. Afta ony few monts in da new local hui, oua girl wen take pahts in da middo of da week meeting an oua son wen come one preacha who no stay baptize yet.”

But wat if you like move wea da hui need moa help, but you no can right now? Why no try do moa wea you stay by using some of da tings we jus wen talk about? Wit Jehovah’s help, stay busy wit yoa hui by goin out preach wit oddas, making new frenz, an coming one betta fren wit da frenz you awready get. Maybe you can help da new guys or da guys dat need help in some odda ways. Since love show dat you one tru Christian, wen you help oddas, dat goin help you come moa close to Jehovah. (John 13:35) You can kno fo shua dat Jehovah happy, cuz you one of his guys.​—Heb 13:16.

Even tho dey had hard time, tings wen work out good fo plenny Christians who wen move to one new hui​—an can be fo you too! Anne-Lise wen tell, “Goin to one new hui wen help me show moa love.” Kazumi wen see dat wen you move, “you can see how Jehovah help you in ways you neva seen befoa.” An wat about Jules? He tell, “Da frenz I wen make wen help me feel at home. Cuz I stay real close to da new hui, would be hard if I had fo leave.”