1. How you feel about da trut?

 JEHOVAH’S peopo love da trut dat stay in da Bible. Oua fait stay based on dat. (Rome 10:17) We kno fo shua Jehovah da one who wen set up da Christian hui az “da foundation an da main pos” fo “da true stuff.” (1 Tim 3:15) We happy fo lissen “da guys dass showing [us] da way fo go” cuz dey explain da trut from da Bible an show us how fo do wat Jehovah like us do.​—Heb 13:17, NWT.

2. In da scripcha, From James 5:19, wat can happen to us afta we learn da trut?

² But even if we awready had accept da trut an kno we gotta follow wat God’s hui tell, we can still go way from wass tru. (Read um From James 5:19.) Satan really like us fo no trus da Bible or no follow wat God’s hui tell us fo do.​—Efe 4:14.

3. How come we gotta stick to da trut? (Fo Da Efesus Peopo 6:13, 14)

³ Read um Fo Da Efesus Peopo 6:13, 14. Pretty soon, da Devil goin use big bulais fo trick whole nations fo go agains Jehovah. (Jesus Show 16:13, 14) We even kno dat Satan goin work real hard fo bulai Jehovah’s peopo. (Jesus Show 12:9, NWT) Dass why az importan fo kno da diffrence between wass tru an wass one bulai, an fo lissen to da trut. (Rome 6:17; 1 Pet  1:22) If we like make um tru da big trouble, dass wat we gotta do!

4. Wat we goin talk about in dis lesson?

⁴ In dis lesson, we goin see two qualities we need fo help us kno da trut dat come from da Bible an fo lissen an do wat God’s hui tell. Den we goin talk about three tings we gotta do fo help us no let go of da trut.

QUALITIES WE NEED FO KNO WAT STAY TRU

5. How bein sked of Jehovah help us kno wass tru?

⁵ Be sked of Jehovah. Fo be sked of Jehovah, dat mean we love him so much dat we neva goin do anyting fo make him sad. We like learn da diffrence between wass right an wrong, wass tru an wass one bulai, so Jehovah stay happy wit us. (Smart Guys 2:3-6; Heb 5:14) We no like us bein sked of man be moa strong den oua love fo Jehovah, cuz mos times wat make humans happy, make Jehovah sad.

6. How bein sked of humans wen cause ten of da Israel spy guys fo twist da trut?

⁶ If we sked of humans moa den God, we might start fo believe someting dass not tru. Try tink about da 12 spy guys who wen check out da land Jehovah wen promise fo give da Israel peopo. Fo ten of dem, bein sked of da Canaan peopo wuz stronga den dea love fo Jehovah. Dey wen tell da Israel peopo, “Us no can go agains dose peopo! Dey mo strong den us!” (Cens 13:27-31) If we ony look at um da way man look at um, yeah, da Canaan peopo wuz moa strong den da Israel peopo. But anybody who wen tell dat da Israel peopo no can beat dea enemies, dey wen hemo Jehovah outa da picha. Da ten  spies shoulda look real good at wat Jehovah wanted da Israel peopo fo do. An dey shoulda tink hard about wat he jus wen do fo dem. Den dey woulda see dat da Canaan peopo wuz notting compared to Jehovah’s powa. Joshua an Caleb no wuz like da spy guys who neva have fait. Dey wanted fo make Jehovah happy. Dey wen tell da peopo, “If Da One In Charge stay good inside bout us guys, he goin take us inside dat land . . . an he goin give um to us guys.”​—Cens 14:6-9.

7. Fo be sked of Jehovah, how we can make dat moa strong? (Go look da picha.)

⁷ Fo be sked of Jehovah an make dat moa strong, we gotta tink about wat goin make him happy ery time we choose fo do someting. (Songs 16:8) Wen you read wat wen happen in da Bible, try ask yoaself, “If dat wuz me, wat I would do?” Fo exampo, try picha yoaself lissening to da ten Israel spy guys tell dat da Israel peopo no can beat da Canaan peopo. You goin believe wat dey tell an come sked of man, or yoa love fo Jehovah goin be moa strong an you goin do wat make him happy? Mos of da Israel peopo neva believe dat Joshua an Caleb wuz telling da trut. Cuz of dat, Jehovah neva let dem go inside da Land He Wen Promise Dem.​—Cens 14:10, 22, 23.

8. Wat quality we gotta work hard fo grow, an why?

⁸ Be humbo. Jehovah show da trut to da guys who stay humbo. (Mat 11:25) We wuz happy fo let somebody teach us da trut cuz we wuz humbo. (Jesus Guys 8:30, 31, NWT) Same time, we gotta watch out dat we no come big head. If we come lidat, we might start fo tink dat wat we say iz jus az good az Bible truts an wat Jehovah’s hui tell.

9. How we can stay humbo?

⁹ Fo stay humbo, we gotta rememba how manini us compared to Jehovah. (Songs 8:3, 4) We can pray fo be da kine peopo dass humbo an easy fo teach. Jehovah goin help us make his tinking, dat he give us tru da Bible an his hui, moa importan den ouas. Wen you read da Bible, try look fo tings dat show how Jehovah love peopo who humbo, an hate da guys who big head, make tantaran, an tink dey all dat. An try hard fo stay humbo, speshly if you get one kuleana wea peopo goin kno who you.

HOW WE CAN STICK TO DA TRUT

10. Who Jehovah use fo give his peopo instrucktions an directions?

¹⁰ Keep trusting wat Jehovah’s hui tell. Befoa time in Israel, Jehovah wen use Moses an den Joshua fo give instrucktions to His peopo. (Josh 1:16, 17) Tings wuz good fo da Israel peopo wen dey wen look dese guys az Jehovah’s reps. Hundreds of years layta, in da time of da firs Christians, da 12 aposals wen tell wass good fo do. (Jesus Guys 8:14, 15) Bumbye had odda eldas in Jerusalem in dat group. Cuz dey wen follow wat dose faitful braddahs wuz telling, “dat make da peopo trus Jesus moa. An den had plenny odda peopo dat trus da Good Stuff Bout Jesus too.” (Jesus Guys 16:4, 5) Today, good tings happen fo us wen we follow wat Jehovah’s hui tell az  good fo do. But how you tink Jehovah would feel if we no lissen da guys he wen choose fo take da lead? Fo ansa dat, we go look wat had happen wen da Israel guys wuz goin go da Land Jehovah Wen Promise Dem.

11. Wat wen happen to da guys in Israel befoa time who wen go agains Moses, da one Jehovah wen pick fo take da lead? (Go look da picha.)

¹¹ One time wen da Israel peopo wuz on dea way to da Land Jehovah Wen Promise Dem, had importan guys who wen go agains Moses an da kuleana Jehovah had give him. Dey wen tell, “All da peopo [not jus Moses] stay spesho fo Da One In Charge, an he stay wit dem.” (Cens 16:1-3) Even if Jehovah wen look at “all da peopo” az spesho, Jehovah wen pick Moses fo lead His peopo. (Cens 16:28) By talking bad about Moses, dem guys wuz really talking bad about Jehovah. Dey neva look at wat Jehovah wen like, dey wen look at wat dey wen like, moa powa an fo peopo kno who dem. God wen wipe out da leada guys who wen go agains Moses, an all da odda guys who wuz on dea side. (Cens 16:30-35, 41, 49) Today we kno fo shua dat Jehovah no like da guys who no respeck wat his hui tell az good fo do.

12. How come we can keep trusting Jehovah’s hui?

¹² We can keep trusting Jehovah’s hui. Wen come clear dat we gotta change how we undastan one Bible trut or da way we serve Jehovah, da guys taking da lead no hold back fo change wat dey gotta. (Smart Guys 4:18) Dey do dat cuz dey like make Jehovah happy moa den anyting else. Dey try real hard fo choose wat fo do from wat da Bible tell az right. Dass da way all of Jehovah’s peopo gotta do um.

13. Wat iz “da importan stuffs, an . . . da right way,” an wat we gotta do wit um?

 ¹³ “I wen tell you da importan stuffs, an you know how fo teach um da right way . . . Do all dis.” (2 Tim 1:13) “Da importan stuffs, an . . . da right way” iz da Christian teachings dat stay in da Bible. (John 17:17) Dese teachings az da foundation fo eryting we believe. Jehovah’s hui wen teach us fo stick to dat. Az long az we do dat, we goin be blessed.

14. How some Christians wen let go “da importan stuffs, an . . . da right way?”

¹⁴ Wat can happen if we let go “da importan stuffs, an . . . da right way”? Try tink about dis. In da firs years, some Christians wen spread one bulai dat Jehovah’s day wen come. Peopo wen tink da aposal Paul maybe had write one letta dat wen tell dis. Cuz dey neva check da facts, some Christians in Tessalonika wen believe da bulai an even wen tell oddas about um. Dey woulda known dat wuz one bulai if dey had rememba da tings Paul wen teach dem wen he wuz wit dem. (2 Tess 2:1-5) Paul wen tell his braddahs no lissen to eryting dey hea. An fo help dem layta on, Paul wen pau his numba two letta to da Tessalonika peopo wit da words, “Eh! Dis me Paul. I stay writing dis stuff now wit my hand. I do dat fo show you guys dat dis letta from me. Dis da way I stay write all my lettas.”​—2 Tess 3:17.

15. How we can proteck ouaself from bulais dat look like az real? Try tell one exampo. (Go look da pichas.)

¹⁵ Wat we can learn from wat Paul wen tell da Tessalonika peopo? Wen we hea someting dat no match up wit wat we wen learn from da Bible or wen we hea one shocking story, we gotta use oua smarts. One time in da old Soviet Union, oua enemies wen give da braddahs one letta dat dey wen make like wuz from world headqwatahs. Da letta wen tell some of da braddahs fo make  one odda hui dat no wuz goin be part of da main hui. Da letta wen look like wuz real. But da faitful braddahs neva get trick by dis. Dey wen figga dat wat da letta tell neva match up wit wat dey wuz taught. Today, enemies of da trut sometimes use stuff like da Intanet an social media fo try throw us off an split us up. Radda den “let [oua] head come all hamajang,” we can proteck ouaself by tinking real good if wat we hea or read match up wit da truts we awready wen learn.​—2 Tess 2:2; 1 John 4:1.

16. From wat Fo Da Rome Peopo 16:17, 18 tell, wat we should do if some go way from da trut?

¹⁶ Stay togedda wit da guys who stick to Jehovah. God like us fo worship him da same way. We can do dat az long az we stick to da trut. Anybody who tell stuff dat go agains da trut can split up da hui, so God tell us fo “watch out fo da kine peopo” who do dat. If we no watch out, we can start fo believe stuff dat no stay tru an go way from da trut.​—Read um Fo Da Rome Peopo 16:17, 18.

17. Wat good kine tings we get wen we kno wass tru an wen we no let um go?

¹⁷ Wen we kno wass tru an no let um go, we goin stay close to Jehovah an keep oua fait strong. (Efe 4:15, 16) We no goin be tricked by Satan’s fake kine teachings an bulais, an Jehovah goin kea fo us an keep us safe during da big trouble. No let go of wat stay tru, “den, da God dat can make you guys so notting bodda you, he goin stay wit you guys.”​—Php 4:8, 9.